9. තොදෙය්‍යමාණවපුච්ඡා

113. ‘‘යස්මිං කාමා න වසන්ති, [ඉච්චායස්මා තොදෙය්‍යො]

තණ්හා යස්ස න විජ්ජති;

කථංකථා ච යො තිණ්ණො, විමොක්ඛො තස්ස කීදිසො’’.

114. ‘‘යස්මිං කාමා න වසන්ති, [තොදෙය්‍යාති භගවා]

තණ්හා යස්ස න විජ්ජති;

කථංකථා ච යො තිණ්ණො, විමොක්ඛො තස්ස නාපරො’’.

115. ‘‘නිරාසසො සො උද ආසසානො [ආසයානො (ක.)], පඤ්ඤාණවා සො උද පඤ්ඤකප්පී;

මුනිං අහං සක්ක යථා විජඤ්ඤං, තං මෙ වියාචික්ඛ සමන්තචක්ඛු’’.

116. ‘‘නිරාසසො සො න ච ආසසානො, පඤ්ඤාණවා සො න ච පඤ්ඤකප්පී;

එවම්පි තොදෙය්‍ය මුනිං විජාන, අකිඤ්චනං කාමභවෙ අසත්ත’’න්ති.

තොදෙය්‍යමාණවපුච්ඡා නවමා.