10. කප්පමාණවපුච්ඡා

117. ‘‘මජ්ඣෙ සරස්මිං තිට්ඨතං, [ඉච්චායස්මා කප්පො]

ඔඝෙ ජාතෙ මහබ්භයෙ;

ජරාමච්චුපරෙතානං, දීපං පබ්‍රූහි මාරිස;

ත්වඤ්ච මෙ දීපමක්ඛාහි, යථායිදං නාපරං සියා’’.

118. ‘‘මජ්ඣෙ සරස්මිං තිට්ඨතං, [කප්පාති භගවා]

ඔඝෙ ජාතෙ මහබ්භයෙ;

ජරාමච්චුපරෙතානං, දීපං පබ්‍රූමි කප්ප තෙ.

119. ‘‘අකිඤ්චනං අනාදානං, එතං දීපං අනාපරං;

නිබ්බානං ඉති නං බ්‍රූමි, ජරාමච්චුපරික්ඛයං.

120. ‘‘එතදඤ්ඤාය යෙ සතා, දිට්ඨධම්මාභිනිබ්බුතා;

න තෙ මාරවසානුගා, න තෙ මාරස්ස පට්ඨගූ’’ති [පද්ධගූ (සී.)].

කප්පමාණවපුච්ඡා දසමා.