413. ධූමකාරිජාතකං (7-2-8)

128. රාජා අපුච්ඡි විධුරං, ධම්මකාමො යුධිට්ඨිලො;

අපි බ්‍රාහ්මණ ජානාසි, කො එකො බහු සොචති.

129. බ්‍රාහ්මණො අජයූථෙන, පහූතෙධො [බහූතෙජො (පී. ක.), බහුතෙන්දො (ස්‍යා.)] වනෙ වසං;

ධූමං අකාසි වාසෙට්ඨො, රත්තින්දිවමතන්දිතො.

130. තස්ස තං ධූමගන්ධෙන, සරභා මකසඩ්ඩිතා [මකසද්දිතා (සී. ස්‍යා.), මකසට්ටිතා (පී. ක.)];

වස්සාවාසං උපාගච්ඡුං, ධූමකාරිස්ස සන්තිකෙ.

131. සරභෙසු මනං කත්වා, අජා සො නාවබුජ්ඣථ;

ආගච්ඡන්තී වජන්තී වා [ආගච්ඡන්ති වජන්ති වා (ස්‍යා. පී.), ආගච්ඡන්තිං වජන්තිං වා (ක.)], තස්ස තා විනසුං [විනස්සුං (සී.)] අජා.

132. සරභා සරදෙ කාලෙ, පහීනමකසෙ වනෙ;

පාවිසුං ගිරිදුග්ගානි, නදීනං පභවානි ච.

133. සරභෙ ච ගතෙ දිස්වා, අජා ච විභවං ගතා [අජෙ ච විභවං ගතෙ (ක.)];

කිසො ච විවණ්ණො චාසි, පණ්ඩුරොගී ච බ්‍රාහ්මණො.

134. එවං යො සං නිරංකත්වා, ආගන්තුං කුරුතෙ පියං;

සො එකො බහු සොචති, ධූමකාරීව බ්‍රාහ්මණොති.

ධූමකාරිජාතකං අට්ඨමං.