406. ගන්ධාරජාතකං (7-2-1)

76. හිත්වා ගාමසහස්සානි, පරිපුණ්ණානි සොළස;

කොට්ඨාගාරානි ඵීතානි, සන්නිධිං දානි කුබ්බසි.

77. හිත්වා ගන්ධාරවිසයං, පහූතධනධාරියං [ධානියං (සී. පී.), ධඤ්ඤන්ති අත්ථො];

පසාසනතො [පසාසනිතො (සී. ස්‍යා.), පසාසනාතො (පී.)] නික්ඛන්තො, ඉධ දානි පසාසසි.

78. ධම්මං භණාමි වෙදෙහ, අධම්මො මෙ න රුච්චති;

ධම්මං මෙ භණමානස්ස, න පාපමුපලිම්පති.

79. යෙන කෙනචි වණ්ණෙන, පරො ලභති රුප්පනං;

මහත්ථියම්පි චෙ වාචං, න තං භාසෙය්‍ය පණ්ඩිතො.

80. කාමං රුප්පතු වා මා වා, භුසංව විකිරීයතු;

ධම්මං මෙ භණමානස්ස, න පාපමුපලිම්පති.

81. නො චෙ අස්ස සකා බුද්ධි, විනයො වා සුසික්ඛිතො;

වනෙ අන්ධමහිංසොව [අන්ධමහිසොව (සී. පී.)] චරෙය්‍ය බහුකො ජනො.

82. යස්මා ච පනිධෙකච්චෙ, ආචෙරම්හි [ආචාරම්හි (සී. පී.)] සුසික්ඛිතා;

තස්මා විනීතවිනයා, චරන්ති සුසමාහිතාති.

ගන්ධාරජාතකං පඨමං.