405. බකජාතකං (7-1-10)
68. ද්වාසත්තති ගොතම [භො ගොතම (ක.)] පුඤ්ඤකම්මා, වසවත්තිනො ජාතිජරං අතීතා;
අයමන්තිමා වෙදගූ බ්‍රහ්මපත්ති [බ්‍රහ්මුපපත්ති (ස්‍යා. ක.)], අස්මාභිජප්පන්ති ජනා [පජා (ක.)] අනෙකා.
69. අප්පඤ්හි එතං [අප්පඤ්ච හෙතං (ස්‍යා.), අප්පංසි එතං (ක.)] න හි දීඝමායු, යං ත්වං බක මඤ්ඤසි දීඝමායුං;
සතං සහස්සානි [සහස්සානං (සී. පී. සං. නි. 1.175), සහස්සාන (ස්‍යා. කං.)] නිරබ්බුදානං, ආයුං පජානාමි තවාහ බ්‍රහ්මෙ.
70. අනන්තදස්සී භගවාහමස්මි, ජාතිජ්ජරං සොකමුපාතිවත්තො;
කිං මෙ පුරාණං වතසීලවත්තං [සීලවන්තං (පී. ක.)], ආචික්ඛ මෙ තං යමහං විජඤ්ඤං.
71. යං ත්වං අපායෙසි බහූ මනුස්සෙ, පිපාසිතෙ ඝම්මනි සම්පරෙතෙ;
තං තෙ පුරාණං වතසීලවත්තං, සුත්තප්පබුද්ධොව අනුස්සරාමි.
72. යං එණිකූලස්මි ජනං ගහීතං, අමොචයී ගය්හක නිය්‍යමානං;
තං තෙ පුරාණං වතසීලවත්තං, සුත්තප්පබුද්ධොව අනුස්සරාමි.
73. ගඞ්ගාය සොතස්මිං ගහීතනාවං, ලුද්දෙන නාගෙන මනුස්සකප්පා;
අමොචයි ත්වං බලසා පසය්හ, තං තෙ පුරාණං වතසීලවත්තං;
සුත්තප්පබුද්ධොව අනුස්සරාමි.
74. කප්පො ච තෙ බද්ධචරො [පත්ථචරො (ස්‍යා.), පට්ඨචරො (ක.)] අහොසි, සම්බුද්ධිමන්තං [සම්බුද්ධිවන්තං (ස්‍යා. පී.), සම්බුද්ධවන්තං (ක.)] වතිනං [වතිතං (ස්‍යා.), වතිදං (ක.)] අමඤ්ඤං;
තං තෙ පුරාණං වතසීලවත්තං, සුත්තප්පබුද්ධොව අනුස්සරාමි.
75. අද්ධා පජානාසි මමෙතමායුං, අඤ්ඤම්පි ජානාසි තථා හි බුද්ධො;
තථා හි තායං [ත්‍යායං (සං. නි. 1.175)] ජලිතානුභාවො, ඔභාසයං තිට්ඨති බ්‍රහ්මලොකන්ති.
බකජාතකං දසමං.
කුක්කුවග්ගො පඨමො.
තස්සුද්දානං –
වරකණ්ණික චාපවරො සුතනො, අථ ගිජ්ඣ සරොහිතමච්ඡවරො;
පුන පණ්ණක [දසණ්ණක (සී. ස්‍යා. පී.)] සෙනක යාචනකො, අථ වෙරි සබ්‍රහ්මබකෙන දසාති.