401. පණ්ණකජාතකං (7-1-6)
39. පණ්ණකං [දසණ්ණකං (සී. ස්‍යා. පී.)] තිඛිණධාරං, අසිං සම්පන්නපායිනං;
පරිසායං පුරිසො ගිලති, කිං දුක්කරතරං තතො;
යදඤ්ඤං දුක්කරං ඨානං, තං මෙ අක්ඛාහි පුච්ඡිතො.
40. ගිලෙය්‍ය පුරිසො ලොභා, අසිං සම්පන්නපායිනං;
යො ච වජ්ජා දදාමීති, තං දුක්කරතරං තතො;
සබ්බඤ්ඤං සුකරං ඨානං, එවං ජානාහි මද්දව [මාගධ (සී. ස්‍යා. පී.)].
41. බ්‍යාකාසි ආයුරො පඤ්හං, අත්ථං [අත්ථ (පී. සී. නිය්‍ය)] ධම්මස්ස කොවිදො;
පුක්කුසං දානි පුච්ඡාමි, කිං දුක්කරතරං තතො;
යදඤ්ඤං දුක්කරං ඨානං, තං මෙ අක්ඛාහි පුච්ඡිතො.
42. න වාචමුපජීවන්ති, අඵලං ගිරමුදීරිතං;
යො ච දත්වා අවාකයිරා, තං දුක්කරතරං තතො;
සබ්බඤ්ඤං සුකරං ඨානං, එවං ජානාහි මද්දව.
43. බ්‍යාකාසි පුක්කුසො පඤ්හං, අත්ථං ධම්මස්ස කොවිදො;
සෙනකං දානි පුච්ඡාමි, කිං දුක්කරතරං තතො;
යදඤ්ඤං දුක්කරං ඨානං, තං මෙ අක්ඛාහි පුච්ඡිතො.
44. දදෙය්‍ය පුරිසො දානං, අප්පං වා යදි වා බහුං;
යො ච දත්වා නානුතප්පෙ [තපෙ (සී. පී.)], තං දුක්කරතරං තතො;
සබ්බඤ්ඤං සුකරං ඨානං, එවං ජානාහි මද්දව.
45. බ්‍යාකාසි ආයුරො පඤ්හං, අථො පුක්කුසපොරිසො;
සබ්බෙ පඤ්හෙ අතිභොති, යථා භාසති සෙනකොති.
පණ්ණක [දසණ්ණක (සී. ස්‍යා. පී.)] ජාතකං ඡට්ඨං.