314. ලොහකුම්භිජාතකං (4-2-4)

53. දුජ්ජීවිතමජීවිම්හ, යෙ සන්තෙ [යෙසං නො (ස්‍යා. ක.)] න දදම්හසෙ;

විජ්ජමානෙසු භොගෙසු, දීපං නාකම්හ අත්තනො.

54. සට්ඨි [සට්ඨිං (ස්‍යා.)] වස්සසහස්සානි, පරිපුණ්ණානි සබ්බසො;

නිරයෙ පච්චමානානං, කදා අන්තො භවිස්සති.

55. නත්ථි අන්තො කුතො අන්තො, න අන්තො පටිදිස්සති;

තදා හි පකතං පාපං, මම තුය්හඤ්ච මාරිසා [මාරිස (සී. ස්‍යා. පී.)].

56. සොහං නූන ඉතො ගන්ත්වා, යොනිං ලද්ධාන මානුසිං;

වදඤ්ඤූ සීලසම්පන්නො, කාහාමි කුසලං බහුන්ති.

ලොහකුම්භිජාතකං චතුත්ථං.