311. පුචිමන්දජාතකං (4-2-1)
41. උට්ඨෙහි චොර කිං සෙසි, කො අත්ථො සුපනෙන [සුපිතෙන (සී.), සුපිනෙන (පී. ක.)] තෙ;
මා තං ගහෙසුං [ගණ්හෙය්‍යුං (ක.)] රාජානො, ගාමෙ කිබ්බිසකාරකං.
42. යං නු [නූන (ස්‍යා.)] චොරං ගහෙස්සන්ති, ගාමෙ කිබ්බිසකාරකං;
කිං තත්ථ පුචිමන්දස්ස, වනෙ ජාතස්ස තිට්ඨතො.
43. න ත්වං අස්සත්ථ ජානාසි, මම චොරස්ස චන්තරං;
චොරං ගහෙත්වා රාජානො, ගාමෙ කිබ්බිසකාරකං;
අප්පෙන්ති [අච්චෙන්ති (ස්‍යා.)] නිම්බසූලස්මිං, තස්මිං මෙ සඞ්කතෙ මනො.
44. සඞ්කෙය්‍ය සඞ්කිතබ්බානි, රක්ඛෙය්‍යානාගතං භයං;
අනාගතභයා ධීරො, උභො ලොකෙ අවෙක්ඛතීති.
පුචිමන්දජාතකං පඨමං.