310. සෙය්‍යජාතකං (4-1-10)
37. සසමුද්දපරියායං, මහිං සාගරකුණ්ඩලං;
න ඉච්ඡෙ සහ නින්දාය, එවං සෙය්‍ය [සය්හ (සී. ස්‍යා. පී.)] විජානහි.
38. ධිරත්ථු තං යසලාභං, ධනලාභඤ්ච බ්‍රාහ්මණ;
යා වුත්ති විනිපාතෙන, අධම්මචරණෙන වා.
39. අපි චෙ පත්තමාදාය, අනගාරො පරිබ්බජෙ;
සායෙව ජීවිකා සෙය්‍යො, යා චාධම්මෙන එසනා.
40. අපි චෙ පත්තමාදාය, අනගාරො පරිබ්බජෙ;
අඤ්ඤං අහිංසයං ලොකෙ, අපි රජ්ජෙන තං වරන්ති.
සෙය්‍යජාතකං [සය්හජාතකං (සී. ස්‍යා. පී.)] දසමං.
කාලිඞ්ගවග්ගො [විවරවග්ගො (සී. පී.)] පඨමො.
තස්සුද්දානං –
විවරඤ්ච අදෙය්‍ය සමිද්ධවරං, අථ දද්දර පාපමහාතිරහො;
අථ කොලි පලාසවරඤ්ච කර, චරිමං සසමුද්දවරෙන දසාති.