302. මහාඅස්සාරොහජාතකං (4-1-2)
5. අදෙය්යෙසු දදං දානං, දෙය්යෙසු නප්පවෙච්ඡති;
ආපාසු බ්යසනං පත්තො, සහායං නාධිගච්ඡති.
6. නාදෙය්යෙසු දදං දානං, දෙය්යෙසු යො පවෙච්ඡති;
ආපාසු බ්යසනං පත්තො, සහායමධිගච්ඡති.
7. සඤ්ඤොගසම්භොගවිසෙසදස්සනං, අනරියධම්මෙසු සඨෙසු නස්සති;
කතඤ්ච අරියෙසු ච අජ්ජවෙසු, මහප්ඵලං හොති අණුම්පි තාදිසු.
8. යො පුබ්බෙ කතකල්යාණො, අකා ලොකෙ සුදුක්කරං;
පච්ඡා කයිරා න වා කයිරා, අච්චන්තං පූජනාරහොති.
මහාඅස්සාරොහජාතකං දුතියං.