267. කක්කටකජාතකං (3-2-7)
49. සිඞ්ගීමිගො ආයතචක්ඛුනෙත්තො, අට්ඨිත්තචො වාරිසයො අලොමො;
තෙනාභිභූතො කපණං රුදාමි, මා හෙව මං පාණසමං ජහෙය්ය [ජහෙය්යා (පී.) ජහා’ය්යෙ (?)].
50. අය්ය න තං ජහිස්සාමි, කුඤ්ජරං සට්ඨිහායනං [කුඤ්ජර සට්ඨිහායන (සී. පී.)];
පථබ්යා චාතුරන්තාය, සුප්පියො හොසි මෙ තුවං.
51. යෙ කුළීරා සමුද්දස්මිං, ගඞ්ගාය යමුනාය [නම්මදාය (සී. පී.)] ච;
තෙසං ත්වං වාරිජො සෙට්ඨො, මුඤ්ච රොදන්තියා පතින්ති.
කක්කටක [කුළීර (ක.)] ජාතකං සත්තමං.