9. උපාහනවග්ගො

231. උපාහනජාතකං (2-9-1)

161. යථාපි කීතා පුරිසස්සුපාහනා, සුඛස්ස අත්ථාය දුඛං උදබ්බහෙ;

ඝම්මාභිතත්තා ථලසා පපීළිතා, තස්සෙව පාදෙ පුරිසස්ස ඛාදරෙ.

162. එවමෙව යො දුක්කුලීනො අනරියො, තම්මාක [තම්හාක (සී.), තුම්හාක (ස්‍යා. පී.)] විජ්ජඤ්ච සුතඤ්ච ආදිය;

තමෙව සො තත්ථ සුතෙන ඛාදති, අනරියො වුච්චති දුපාහනූපමොති [පානදූපමොති (සී. පී.)].

උපාහනජාතකං පඨමං.

232. වීණාගුණජාතකං (2-9-2)

163. එකචින්තිතො යමත්ථො, බාලො අපරිණායකො;

න හි ඛුජ්ජෙන වාමෙන, භොති සඞ්ගන්තුමරහසි.

164. පුරිසූසභං මඤ්ඤමානා, අහං ඛුජ්ජමකාමයිං;

සොයං සංකුටිතො සෙති, ඡින්නතන්ති යථා විණාති [ථුණාති (සී.)].

වීණාගුණජාතකං දුතියං.

233. විකණ්ණජාතකං (2-9-3)

165. කාමං යහිං ඉච්ඡසි තෙන ගච්ඡ, විද්ධොසි මම්මම්හි [මමස්මි (ක.)] විකණ්ණකෙන;

හතොසි භත්තෙන සුවාදිතෙන [සවාදිතෙන (සී. ස්‍යා. පී.)], ලොලො ච මච්ඡෙ අනුබන්ධමානො.

166. එවම්පි ලොකාමිසං ඔපතන්තො, විහඤ්ඤතී චිත්තවසානුවත්තී;

සො හඤ්ඤති ඤාතිසඛාන මජ්ඣෙ, මච්ඡානුගො සොරිව සුංසුමාරොති [සුසුමාරො (ක.)].

විකණ්ණජාතකං තතියං.

234. අසිතාභූජාතකං (2-9-4)

167. ත්වමෙව දානිමකර [මකරි (ස්‍යා.), මකරා (ක. සී.)], යං කාමො බ්‍යගමා තයි;

සොයං අප්පටිසන්ධිකො, ඛරඡින්නංව රෙනුකං [රෙරුකං (සී. පී.)].

168. අත්‍රිච්ඡං [අත්‍රිච්ඡා (සී. ස්‍යා. පී.)] අතිලොභෙන, අතිලොභමදෙන ච;

එවං හායති අත්ථම්හා, අහංව අසිතාභුයාති.

අසිතාභූජාතකං චතුත්ථං.

235. වච්ඡනඛජාතකං (2-9-5)

169. සුඛා ඝරා වච්ඡනඛ, සහිරඤ්ඤා සභොජනා;

යත්ථ භුත්වා පිවිත්වා ච, සයෙය්‍යාථ අනුස්සුකො.

170. ඝරා නානීහමානස්ස, ඝරා නාභණතො මුසා;

ඝරා නාදින්නදණ්ඩස්ස, පරෙසං අනිකුබ්බතො [අනික්‍රුබ්බතො (ක.)];

එවං ඡිද්දං දුරභිසම්භවං [දුරභිභවං (සී. පී.)], කො ඝරං පටිපජ්ජතීති.

වච්ඡනඛජාතකං පඤ්චමං.

236. බකජාතකං (2-9-6)

171. භද්දකො වතයං පක්ඛී, දිජො කුමුදසන්නිභො;

වූපසන්තෙහි පක්ඛෙහි, මන්දමන්දොව ඣායති.

172. නාස්ස සීලං විජානාථ, අනඤ්ඤාය පසංසථ;

අම්හෙ දිජො න පාලෙති, තෙන පක්ඛී න ඵන්දතීති.

බකජාතකං ඡට්ඨං.

237. සාකෙතජාතකං (2-9-7)

173. කො නු ඛො භගවා හෙතු, එකච්චෙ ඉධ පුග්ගලෙ;

අතීව හදයං නිබ්බාති, චිත්තඤ්චාපි පසීදති.

174. පුබ්බෙව සන්නිවාසෙන, පච්චුප්පන්නහිතෙන වා;

එවං තං ජායතෙ පෙමං, උප්පලංව යථොදකෙති.

සාකෙතජාතකං සත්තමං.

238. එකපදජාතකං (2-9-8)

175. ඉඞ්ඝ එකපදං තාත, අනෙකත්ථපදස්සිතං [පදනිස්සිතං (සී. පී.)];

කිඤ්චි සඞ්ගාහිකං බ්‍රූසි, යෙනත්ථෙ සාධයෙමසෙ.

176. දක්ඛෙය්‍යෙකපදං තාත, අනෙකත්ථපදස්සිතං;

තඤ්ච සීලෙන සඤ්ඤුත්තං, ඛන්තියා උපපාදිතං;

අලං මිත්තෙ සුඛාපෙතුං, අමිත්තානං දුඛාය චාති.

එකපදජාතකං අට්ඨමං.

239. හරිතමණ්ඩූකජාතකං (2-9-9)

177. ආසීවිසම්පි මං [ආසීවිසං මමං (සී. පී.)] සන්තං, පවිට්ඨං කුමිනාමුඛං;

රුච්චතෙ හරිතාමාතා, යං මං ඛාදන්ති මච්ඡකා.

178. විලුම්පතෙව පුරිසො, යාවස්ස උපකප්පති;

යදා චඤ්ඤෙ විලුම්පන්ති, සො විලුත්තො විලුම්පතීති [විලුප්පතීති (?)].

හරිතමණ්ඩූකජාතකං නවමං.

240. මහාපිඞ්ගලජාතකං (2-9-10)

179. සබ්බො ජනො හිංසිතො පිඞ්ගලෙන, තස්මිං මතෙ පච්චයා [පච්චයං (සී. ස්‍යා. පී.)] වෙදයන්ති;

පියො නු තෙ ආසි අකණ්හනෙත්තො, කස්මා නු ත්වං රොදසි ද්වාරපාල.

180. න මෙ පියො ආසි අකණ්හනෙත්තො, භායාමි පච්චාගමනාය තස්ස;

ඉතො ගතො හිංසෙය්‍ය මච්චුරාජං, සො හිංසිතො ආනෙය්‍ය පුන ඉධ.

181. දඩ්ඪො වාහසහස්සෙහි, සිත්තො ඝටසතෙහි සො;

පරික්ඛතා ච සා භූමි, මා භායි නාගමිස්සතීති.

මහාපිඞ්ගලජාතකං දසමං.

උපාහනවග්ගො නවමො.

තස්සුද්දානං –

වරුපාහන ඛුජ්ජ විකණ්ණකකො, අසිතාභුය පඤ්චමවච්ඡනඛො;

දිජ පෙමවරුත්තමඑකපදං, කුමිනාමුඛ පිඞ්ගලකෙන දසාති.