10. සිඞ්ගාලවග්ගො

241. සබ්බදාඨිජාතකං (2-10-1)

182. සිඞ්ගාලො මානථද්ධො ච, පරිවාරෙන අත්ථිකො;

පාපුණි මහතිං භූමිං, රාජාසි සබ්බදාඨිනං.

183. එවමෙව මනුස්සෙසු, යො හොති පරිවාරවා;

සො හි තත්ථ මහා හොති, සිඞ්ගාලො විය දාඨිනන්ති.

සබ්බදාඨිජාතකං පඨමං.

242. සුනඛජාතකං (2-10-2)

184. බාලො වතායං සුනඛො, යො වරත්තං [යො ච යොත්තං (ක.)] න ඛාදති;

බන්ධනා ච පමුඤ්චෙය්‍ය, අසිතො ච ඝරං වජෙ.

185. අට්ඨිතං මෙ මනස්මිං මෙ, අථො මෙ හදයෙ කතං;

කාලඤ්ච පටිකඞ්ඛාමි, යාව පස්සුපතූ ජනො [පසුපතුජ්ජනො (ස්‍යා. ක.)].

සුනඛජාතකං දුතියං.

243. ගුත්තිලජාතකං (2-10-3)

186. සත්තතන්තිං සුමධුරං, රාමණෙය්‍යං අවාචයිං;

සො මං රඞ්ගම්හි අව්හෙති, සරණං මෙ හොහි කොසිය.

187. අහං තං සරණං සම්ම [අහං තෙ සරණං හොමි (වි. ව. 328)], අහමාචරියපූජකො;

න තං ජයිස්සති සිස්සො, සිස්සමාචරිය ජෙස්සසීති.

ගුත්තිලජාතකං තතියං.

244. විගතිච්ඡජාතකං (2-10-4)

188. යං පස්සති න තං ඉච්ඡති, යඤ්ච න පස්සති තං කිරිච්ඡති;

මඤ්ඤාමි චිරං චරිස්සති, න හි තං ලච්ඡති යං ස ඉච්ඡති.

189. යං ලභති න තෙන තුස්සති, යඤ්ච පත්ථෙති ලද්ධං හීළෙති;

ඉච්ඡා හි අනන්තගොචරා, විගතිච්ඡාන [වීතිච්ඡානං (සී. පී.)] නමො කරොමසෙති.

විගතිච්ඡ [වීතිච්ඡ (සී. පී.)] ජාතකං චතුත්ථං.

245. මූලපරියායජාතකං (2-10-5)

190. කාලො ඝසති භූතානි, සබ්බානෙව සහත්තනා;

යො ච කාලඝසො භූතො, ස භූතපචනිං පචි.

191. බහූනි නරසීසානි, ලොමසානි බ්‍රහානි ච;

ගීවාසු පටිමුක්කානි, කොචිදෙවෙත්ථ කණ්ණවාති.

මූලපරියායජාතකං පඤ්චමං.

246. බාලොවාදජාතකං (2-10-6)

192. හන්ත්වා ඡෙත්වා [ඣත්වා (සී. පී.), ඝත්වා (ස්‍යා.)] වධිත්වා ච, දෙති දානං අසඤ්ඤතො;

එදිසං භත්තං භුඤ්ජමානො, ස පාපමුපලිම්පති [ස පාපෙන උපලිප්පති (සී. පී.)].

193. පුත්තදාරම්පි චෙ හන්ත්වා, දෙති දානං අසඤ්ඤතො;

භුඤ්ජමානොපි සප්පඤ්ඤො, න පාපමුපලිම්පතීති.

බාලොවාදජාතකං ඡට්ඨං.

247. පාදඤ්ජලීජාතකං (2-10-7)

194. අද්ධා පාදඤ්ජලී සබ්බෙ, පඤ්ඤාය අතිරොචති;

තථා හි ඔට්ඨං භඤ්ජති, උත්තරිං නූන පස්සති.

195. නායං ධම්මං අධම්මං වා, අත්ථානත්ථඤ්ච බුජ්ඣති;

අඤ්ඤත්‍ර ඔට්ඨනිබ්භොගා, නායං ජානාති කිඤ්චනන්ති.

පාදඤ්ජලීජාතකං සත්තමං.

248. කිංසුකොපමජාතකං (2-10-8)

196. සබ්බෙහි කිංසුකො දිට්ඨො, කිංන්වෙත්ථ විචිකිච්ඡථ;

න හි සබ්බෙසු ඨානෙසු, සාරථී පරිපුච්ඡිතො.

197. එවං සබ්බෙහි ඤාණෙහි, යෙසං ධම්මා අජානිතා;

තෙ වෙ ධම්මෙසු කඞ්ඛන්ති, කිංසුකස්මිංව භාතරොති.

කිංසුකොපමජාතකං අට්ඨමං.

249. සාලකජාතකං (2-10-9)

198. එකපුත්තකො භවිස්සසි, ත්වඤ්ච නො හෙස්සසි ඉස්සරො කුලෙ;

ඔරොහ දුමස්මා සාලක, එහි දානි ඝරකං වජෙමසෙ.

199. නනු මං සුහදයොති [නනු මං හදයෙති (සී. පී.)] මඤ්ඤසි, යඤ්ච මං හනසි වෙළුයට්ඨියා;

පක්කම්බවනෙ රමාමසෙ, ගච්ඡ ත්වං ඝරකං යථාසුඛන්ති.

සාලකජාතකං නවමං.

250. කපිජාතකං (2-10-10)

200. අයං ඉසී උපසමසංයමෙ රතො, ස තිට්ඨති [සන්තිට්ඨති (සී. පී.)] සිසිරභයෙන අට්ටිතො;

හන්ද අයං පවිසතුමං අගාරකං, විනෙතු සීතං දරථඤ්ච කෙවලං.

201. නායං ඉසී උපසමසංයමෙ රතො, කපී අයං දුමවරසාඛගොචරො;

සො දූසකො රොසකො චාපි ජම්මො, සචෙවජෙමම්පි [සචෙ + ආවජෙ + ඉමම්පි] දූසෙය්‍යගාරන්ති [දූසයෙ ඝරන්ති (සී. ස්‍යා. පී.)].

කපිජාතකං දසමං.

සිඞ්ගාලවග්ගො දසමො.

තස්සුද්දානං –

අථ රාජා සිඞ්ගාලවරො සුනඛො, තථා කොසිය ඉච්ඡති කාලඝසො;

අථ දානවරොට්ඨපි සාරථිනා, පුනම්බවනඤ්ච සිසිරකපි දසාති.

අථ වග්ගුද්දානං –

දළ්හඤ්ච වග්ගං අපරෙන සන්ථවං, කල්‍යාණවග්ගාසදිසො ච රූහකං;

නතංදළ්හ බීරණථම්භකං පුන, කාසාවුපාහන සිඞ්ගාලකෙන දසාති.

දුකනිපාතං නිට්ඨිතං.