8. කාසාවවග්ගො

221. කාසාවජාතකං (2-8-1)

141. අනික්කසාවො කාසාවං, යො වත්ථං පරිදහිස්සති [පරිදහෙස්සති (සී. පී.)];

අපෙතො දමසච්චෙන, න සො කාසාවමරහති.

142. යො ච වන්තකසාවස්ස, සීලෙසු සුසමාහිතො;

උපෙතො දමසච්චෙන, ස වෙ කාසාවමරහතීති.

කාසාවජාතකං පඨමං.

222. චූළනන්දියජාතකං (2-8-2)

143. ඉදං තදාචරියවචො, පාරාසරියො යදබ්‍රවි [පොරාණාචරියොබ්‍රවි (ක.)];

මාසු ත්වං අකරි [අකරා (සී. පී.)] පාපං, යං ත්වං පච්ඡා කතං තපෙ.

144. යානි කරොති පුරිසො, තානි අත්තනි පස්සති;

කල්‍යාණකාරී කල්‍යාණං, පාපකාරී ච පාපකං;

යාදිසං වපතෙ බීජං, තාදිසං හරතෙ ඵලන්ති.

චූළනන්දියජාතකං දුතියං.

223. පුටභත්තජාතකං (2-8-3)

145. නමෙ නමන්තස්ස භජෙ භජන්තං, කිච්චානුකුබ්බස්ස කරෙය්‍ය කිච්චං;

නානත්ථකාමස්ස කරෙය්‍ය අත්ථං, අසම්භජන්තම්පි න සම්භජෙය්‍ය.

146. චජෙ චජන්තං වනථං න කයිරා, අපෙතචිත්තෙන න සම්භජෙය්‍ය;

දිජො දුමං ඛීණඵලන්ති ඤත්වා, අඤ්ඤං සමෙක්ඛෙය්‍ය මහා හි ලොකොති.

පුටභත්තජාතකං තතියං.

224. කුම්භිලජාතකං (2-8-4)

147. යස්සෙතෙ චතුරො ධම්මා, වානරින්ද යථා තව;

සච්චං ධම්මො ධිති චාගො, දිට්ඨං සො අතිවත්තති.

148. යස්ස චෙතෙ න විජ්ජන්ති, ගුණා පරමභද්දකා;

සච්චං ධම්මො ධිති චාගො, දිට්ඨං සො නාතිවත්තතීති.

කුම්භිලජාතකං චතුත්ථං.

225. ඛන්තිවණ්ණජාතකං (2-8-5)

149. අත්ථි මෙ පුරිසො දෙව, සබ්බකිච්චෙසු බ්‍යාවටො [වාවටො (ක.)];

තස්ස චෙකොපරාධත්ථි, තත්ථ ත්වං කින්ති මඤ්ඤසි.

150. අම්හාකම්පත්ථි පුරිසො, එදිසො ඉධ විජ්ජති;

දුල්ලභො අඞ්ගසම්පන්නො, ඛන්තිරස්මාක රුච්චතීති.

ඛන්තිවණ්ණජාතකං පඤ්චමං.

226. කොසියජාතකං (2-8-6)

151. කාලෙ නික්ඛමනා සාධු, නාකාලෙ සාධු නික්ඛමො;

අකාලෙන හි නික්ඛම්ම, එකකම්පි බහුජ්ජනො;

න කිඤ්චි අත්ථං ජොතෙති, ධඞ්කසෙනාව කොසියං.

152. ධීරො ච විධිවිධානඤ්ඤූ, පරෙසං විවරානුගූ;

සබ්බාමිත්තෙ වසීකත්වා, කොසියොව සුඛී සියාති.

කොසියජාතකං ඡට්ඨං.

227. ගූථපාණජාතකං (2-8-7)

153. සූරො සූරෙන සඞ්ගම්ම, වික්කන්තෙන පහාරිනා;

එහි නාග නිවත්තස්සු, කිං නු භීතො පලායසි;

පස්සන්තු අඞ්ගමගධා, මම තුය්හඤ්ච වික්කමං.

154. න තං පාදා වධිස්සාමි, න දන්තෙහි න සොණ්ඩියා;

මීළ්හෙන තං වධිස්සාමි, පූති හඤ්ඤතු පූතිනාති.

ගූථපාණජාතකං සත්තමං.

228. කාමනීතජාතකං (2-8-8)

155. තයො ගිරිං අන්තරං කාමයාමි, පඤ්චාලා කුරුයො කෙකකෙ ච [කුරයො කෙකයෙ ච (සී.)];

තතුත්තරිං [තදුත්තරිං (ක.)] බ්‍රාහ්මණ කාමයාමි, තිකිච්ඡ මං බ්‍රාහ්මණ කාමනීතං.

156. කණ්හාහිදට්ඨස්ස කරොන්ති හෙකෙ, අමනුස්සපවිට්ඨස්ස [අමනුස්සවද්ධස්ස (සී. පී.), අමනුස්සවිට්ඨස්ස (ස්‍යා.)] කරොන්ති පණ්ඩිතා;

න කාමනීතස්ස කරොති කොචි, ඔක්කන්තසුක්කස්ස හි කා තිකිච්ඡාති.

කාමනීතජාතකං අට්ඨමං.

229. පලායිතජාතකං (2-8-9)

157. ගජග්ගමෙඝෙහි හයග්ගමාලිභි, රථූමිජාතෙහි සරාභිවස්සෙභි [සරාභිවස්සභි (ස්‍යා. සී. අට්ඨ.), සරාභිවස්සිභි (?)];

ථරුග්ගහාවට්ට [ධනුග්ගහාවට්ට (ක.)] දළ්හප්පහාරිභි, පරිවාරිතා තක්කසිලා සමන්තතො.

158. [අභිධාවථා ච පතථා ච, විවිධවිනදිතා ච දන්තිභි; වත්තතජ්ජ තුමුලො ඝොසො, යථා විජ්ජුතා ජලධරස්ස ගජ්ජතොති; (සී. පී. ක.)] අභිධාවථ චූපධාවථ ච [අභිධාවථා චුප්පතථා ච (ස්‍යා.)], විවිධා විනාදිතා [විනාදිතත්ථ (ක.)] වදන්තිභි;

වත්තතජ්ජ තුමුලො ඝොසො යථා, විජ්ජුලතා ජලධරස්ස ගජ්ජතොති [අභිධාවථා ච පතථා ච, විවිධවිනදිතා ච දන්තිභි; වත්තතජ්ජ තුමුලො ඝොසො, යථා විජ්ජුතා ජලධරස්ස ගජ්ජතොති; (සී. පී. ක.)].

පලායිතජාතකං නවමං.

230. දුතියපලායිතජාතකං (2-8-10)

159. ධජමපරිමිතං අනන්තපාරං, දුප්පසහංධඞ්කෙහි සාගරංව [සාගරමිව (සී. ස්‍යා. පී.)];

ගිරිමිවඅනිලෙන දුප්පසය්හො [දුප්පසහො (සී. පී. ක.)], දුප්පසහො අහමජ්ජතාදිසෙන.

160. මා බාලියං විලපි [විප්පලපි (බහූසු)] න හිස්ස තාදිසං, විඩය්හසෙ [විළය්හසෙ (සී. පී.)] න හි ලභසෙ නිසෙධකං;

ආසජ්ජසි ගජමිව එකචාරිනං, යො තං පදා නළමිව පොථයිස්සතීති.

දුතියපලායිතජාතකං දසමං.

කාසාවවග්ගො අට්ඨමො.

තස්සුද්දානං –

වරවත්ථවචො දුමඛීණඵලං, චතුරොධම්මවරං පුරිසුත්තම;

ධඞ්කමගධා ච තයොගිරිනාම, ගජග්ගවරො ධජවරෙන දසාති.