7. බීරණථම්භවග්ගො

211. සොමදත්තජාතකං (2-7-1)

121. අකාසි යොග්ගං ධුවමප්පමත්තො, සංවච්ඡරං බීරණථම්භකස්මිං;

බ්‍යාකාසි සඤ්ඤං පරිසං විගය්හ, න නිය්‍යමො තායති අප්පපඤ්ඤං.

122. ද්වයං යාචනකො තාත, සොමදත්ත නිගච්ඡති;

අලාභං ධනලාභං වා, එවං ධම්මා හි යාචනාති.

සොමදත්තජාතකං පඨමං.

212. උච්ඡිට්ඨභත්තජාතකං (2-7-2)

123. අඤ්ඤො උපරිමො වණ්ණො, අඤ්ඤො වණ්ණො ච හෙට්ඨිමො;

බ්‍රාහ්මණී ත්වෙව පුච්ඡාමි, කිං හෙට්ඨා කිඤ්ච උප්පරි.

124. අහං නටොස්මි භද්දන්තෙ, භික්ඛකොස්මි ඉධාගතො;

අයඤ්හි කොට්ඨමොතිණ්ණො, අයං සො යං [ත්වං (ක.)] ගවෙසසීති.

උච්ඡිට්ඨභත්තජාතකං දුතියං.

213. භරුජාතකං (2-7-3)

125. ඉසීනමන්තරං කත්වා, භරුරාජාති [කුරුරාජාති (ක.)] මෙ සුතං;

උච්ඡින්නො සහ රට්ඨෙහි [රට්ඨෙන (සී. පී.)], සරාජා විභවඞ්ගතො.

126. තස්මා හි ඡන්දාගමනං, නප්පසංසන්ති පණ්ඩිතා;

අදුට්ඨචිත්තො භාසෙය්‍ය, ගිරං සච්චුපසංහිතන්ති.

භරුජාතකං [කුරුරාතකං (ක.)] තතියං.

214. පුණ්ණනදීජාතකං (2-7-4)

127. පුණ්ණං නදිං යෙන ච පෙය්‍යමාහු, ජාතං යවං යෙන ච ගුය්හමාහු;

දූරං ගතං යෙන ච අව්හයන්ති, සො ත්‍යාගතො [ත්‍යාභතො (ස්‍යා. ක.) පහෙළිගාථාභාවො මනසි කාතබ්බො] හන්ද ච භුඤ්ජ බ්‍රාහ්මණ.

128. යතො මං සරතී රාජා, වායසම්පි පහෙතවෙ;

හංසා කොඤ්චා මයූරා ච [හංසකොඤ්චමයූරානං (ක. අට්ඨ. පාඨන්තරං)], අසතීයෙව පාපියාති.

පුණ්ණනදීජාතකං චතුත්ථං.

215. කච්ඡපජාතකං (2-7-5)

129. අවධී වත අත්තානං, කච්ඡපො බ්‍යාහරං ගිරං [කච්ඡපොව පබ්‍යාහරං (ස්‍යා.), කච්ඡපො සො පබ්‍යාහරං (ක.)];

සුග්ගහීතස්මිං කට්ඨස්මිං, වාචාය සකියාවධි.

130. එතම්පි දිස්වා නරවීරියසෙට්ඨ, වාචං පමුඤ්චෙ කුසලං නාතිවෙලං;

පස්සසි බහුභාණෙන, කච්ඡපං බ්‍යසනං ගතන්ති.

කච්ඡපජාතකං පඤ්චමං.

216. මච්ඡජාතකං (2-7-6)

131. න මායමග්ගි තපති, න සූලො සාධුතච්ඡිතො;

යඤ්ච මං මඤ්ඤතෙ මච්ඡී, අඤ්ඤං සො රතියා ගතො.

132. සො මං දහති රාගග්ගි, චිත්තං චූපතපෙති මං;

ජාලිනො මුඤ්චථායිරා මං, න කාමෙ හඤ්ඤතෙ ක්වචීති.

මච්ඡජාතකං ඡට්ඨං.

217. සෙග්ගුජාතකං (2-7-7)

133. සබ්බො ලොකො අත්තමනො අහොසි, අකොවිදා ගාමධම්මස්ස සෙග්ගු;

කොමාරි කො නාම [කොමාරිකා නාම (ක.), කොමාරිකො නාම (ස්‍යා. පී.)] තවජ්ජ ධම්මො, යං ත්වං ගහිතා පවනෙ පරොදසි.

134. යො දුක්ඛඵුට්ඨාය භවෙය්‍ය තාණං, සො මෙ පිතා දුබ්භි වනෙ කරොති;

සා කස්ස කන්දාමි වනස්ස මජ්ඣෙ, යො තායිතා සො සහසං කරොතීති.

සෙග්ගුජාතකං සත්තමං.

218. කූටවාණිජජාතකං (2-7-8)

135. සඨස්ස සාඨෙය්‍යමිදං සුචින්තිතං, පච්චොඩ්ඩිතං පටිකූටස්ස කූටං;

ඵාලඤ්චෙ ඛාදෙය්‍යුං [අදෙය්‍යුං (සී. පී.)] මූසිකා, කස්මා කුමාරං කුලලා න [නො (සී. ස්‍යා. පී.)] හරෙය්‍යුං.

136. කූටස්ස හි සන්ති [සන්තීධ (ක.)] කූටකූටා, භවති [භවන්ති (ක.)] චාපි නිකතිනො නිකත්‍යා;

දෙහි පුත්තනට්ඨ ඵාලනට්ඨස්ස ඵාලං, මා තෙ පුත්තමහාසි ඵාලනට්ඨොති.

කූටවාණිජජාතකං අට්ඨමං.

219. ගරහිතජාතකං (2-7-9)

137. හිරඤ්ඤං මෙ සුවණ්ණං මෙ, එසා රත්තිං දිවා කථා;

දුම්මෙධානං මනුස්සානං, අරියධම්මං අපස්සතං.

138. ද්වෙ ද්වෙ ගහපතයො ගෙහෙ, එකො තත්ථ අමස්සුකො;

ලම්බත්ථනො වෙණිකතො, අථො අඞ්කිතකණ්ණකො;

කීතො ධනෙන බහුනා, සො තං විතුදතෙ ජනන්ති.

ගරහිතජාතකං නවමං.

220. ධම්මධජජාතකං (2-7-10)

139. සුඛං ජීවිතරූපොසි, රට්ඨා විවනමාගතො;

සො එකකො රුක්ඛමූලෙ [අරඤ්ඤස්මිං (සී. ස්‍යා. පී.)], කපණො විය ඣායසි.

140. සුඛං ජීවිතරූපොස්මි, රට්ඨා විවනමාගතො;

සො එකකො රුක්ඛමූලෙ, කපණො විය ඣායාමි;

සතං ධම්මං අනුස්සරංති.

ධම්මධජජාතකං දසමං.

බීරණථම්භවග්ගො සත්තමො.

තස්සුද්දානං –

අථ බීරණථම්භවරො ච නටො, භරුරාජවරුත්තමපුණ්ණනදී;

බහුභාණි අග්ගිපවනෙ මූසිකා, සහලම්බත්ථනො කපණෙන දසාති.