6. නතංදළ්හවග්ගො

201. බන්ධනාගාරජාතකං (2-6-1)

101. න තං දළ්හං බන්ධනමාහු ධීරා, යදායසං දාරුජපබ්බජඤ්ච [බබ්බජඤ්ච (සී.)];

සාරත්තරත්තා මණිකුණ්ඩලෙසු, පුත්තෙසු දාරෙසු ච යා අපෙක්ඛා.

102. එතං දළ්හං බන්ධනමාහු ධීරා, ඔහාරිනං සිථිලං දුප්පමුඤ්චං;

එතම්පි ඡෙත්වාන වජන්ති ධීරා, අනපෙක්ඛිනො කාමසුඛං පහායාති.

බන්ධනාගාරජාතකං පඨමං.

202. කෙළිසීලජාතකං (2-6-2)

103. හංසා කොඤ්චා මයූරා ච, හත්ථයො [හත්ථිනො (සී.), හත්ථියො (ස්‍යා. පී.)] පසදා මිගා;

සබ්බෙ සීහස්ස භායන්ති, නත්ථි කායස්මි තුල්‍යතා.

104. එවමෙව මනුස්සෙසු, දහරො චෙපි පඤ්ඤවා;

සො හි තත්ථ මහා හොති, නෙව බාලො සරීරවාති.

කෙළිසීලජාතකං දුතියං.

203. ඛණ්ඩජාතකං (2-6-3)

105. විරූපක්ඛෙහි මෙ මෙත්තං, මෙත්තං එරාපථෙහි මෙ;

ඡබ්‍යාපුත්තෙහි මෙ මෙත්තං, මෙත්තං කණ්හාගොතමකෙහි ච.

අපාදකෙහි මෙ මෙත්තං, මෙත්තං ද්විපාදකෙහි මෙ;

චතුප්පදෙහි මෙ මෙත්තං, මෙත්තං බහුප්පදෙහි මෙ.

මා මං අපාදකො හිංසි, මා මං හිංසි ද්විපාදකො;

මා මං චතුප්පදො හිංසි, මා මං හිංසි බහුප්පදො.

සබ්බෙ සත්තා සබ්බෙ පාණා, සබ්බෙ භූතා ච කෙවලා;

සබ්බෙ භද්‍රානි පස්සන්තු, මා කඤ්චි [කිඤ්චි (ස්‍යා. ක.)] පාපමාගමා.

106. අප්පමාණො බුද්ධො, අප්පමාණො ධම්මො;

අප්පමාණො සඞ්ඝො, පමාණවන්තානි සරීසපානි [සිරිසපානි (සී. ස්‍යා. පී.)];

අහිවිච්ඡිකසතපදී, උණ්ණනාභි [උණ්ණානාභි (සී. ස්‍යා. පී.)] සරබූමූසිකා.

කතා මෙ රක්ඛා කතා මෙ පරිත්තා, පටික්කමන්තු භූතානි;

සොහං නමො භගවතො, නමො සත්තන්නං සම්මාසම්බුද්ධානන්ති.

ඛණ්ඩජාතකං තතියං.

204. වීරකජාතකං (2-6-4)

107. අපි වීරක පස්සෙසි, සකුණං මඤ්ජුභාණකං;

මයූරගීවසඞ්කාසං, පතිං මය්හං සවිට්ඨකං.

108. උදකථලචරස්ස පක්ඛිනො, නිච්චං ආමකමච්ඡභොජිනො;

තස්සානුකරං සවිට්ඨකො, සෙවාලෙ පලිගුණ්ඨිතො මතොති.

වීරකජාතකං චතුත්ථං.

205. ගඞ්ගෙය්‍යජාතකං (2-6-5)

109. සොභති මච්ඡො ගඞ්ගෙය්‍යො, අථො සොභති යාමුනො [සොභන්ති මච්ඡා ගඞ්ගෙය්‍යා, අථො සොභන්ති යාමුනා (ස්‍යා. පී.)];

චතුප්පදොයං පුරිසො, නිග්‍රොධපරිමණ්ඩලො;

ඊසකායත [ඊසමායත (ක.)] ගීවො ච, සබ්බෙව අතිරොචති.

110. යං පුච්ඡිතො න තං අක්ඛාසි [අක්ඛා (සී. ස්‍යා. පී.)], අඤ්ඤං අක්ඛාසි [අක්ඛාති (ස්‍යා. පී.)] පුච්ඡිතො;

අත්තප්පසංසකො පොසො, නායං අස්මාක රුච්චතීති.

ගඞ්ගෙය්‍යජාතකං පඤ්චමං.

206. කුරුඞ්ගමිගජාතකං (2-6-6)

111. ඉඞ්ඝ වද්ධමයං [වද්ධමයං (සී. ස්‍යා. පී.)] පාසං, ඡින්ද දන්තෙහි කච්ඡප;

අහං තථා කරිස්සාමි, යථා නෙහිති ලුද්දකො.

112. කච්ඡපො පාවිසී වාරිං, කුරුඞ්ගො පාවිසී වනං;

සතපත්තො දුමග්ගම්හා, දූරෙ පුත්තෙ අපානයීති.

කුරුඞ්ගමිගජාතකං ඡට්ඨං.

207. අස්සකජාතකං (2-6-7)

113. අයමස්සකරාජෙන, දෙසො විචරිතො මයා;

අනුකාමය කාමෙන [අනුකාමයවනුකාමෙන (සී. පී.)], පියෙන පතිනා සහ.

114. නවෙන සුඛදුක්ඛෙන, පොරාණං අපිධීයති [අපිථීයති (සී. පී.), අපිථිය්‍යති (ස්‍යා.)];

තස්මා අස්සකරඤ්ඤාව, කීටො පියතරො මමාති.

අස්සකජාතකං සත්තමං.

208. සුසුමාරජාතකං (2-6-8)

115. අලං මෙතෙහි අම්බෙහි, ජම්බූහි පනසෙහි ච;

යානි පාරං සමුද්දස්ස, වරං මය්හං උදුම්බරො.

116. මහතී වත තෙ බොන්දි, න ච පඤ්ඤා තදූපිකා;

සුසුමාර [සුංසුමාර (සී. ස්‍යා. පී.)] වඤ්චිතො මෙසි, ගච්ඡ දානි යථාසුඛන්ති.

සුසුමාරජාතකං අට්ඨමං.

209. කුක්කුටජාතකං (2-6-9)

117. දිට්ඨා මයා වනෙ රුක්ඛා, අස්සකණ්ණා විභීටකා [විභෙදකා (ස්‍යා. ක.)];

න තානි එවං සක්කන්ති, යථා ත්වං රුක්ඛ සක්කසි.

118. පුරාණකුක්කුටො [කක්කරො (සී. ස්‍යා. පී.)] අයං, භෙත්වා පඤ්ජරමාගතො;

කුසලො වාළපාසානං, අපක්කමති භාසතීති.

කුක්කුට [කක්කර (සී. ස්‍යා. පී.)] ජාතකං නවමං.

210. කන්දගලකජාතකං (2-6-10)

119. අම්භො කො නාම යං රුක්ඛො, සින්නපත්තො [සීනපත්තො (සී. පී.)] සකණ්ටකො;

යත්ථ එකප්පහාරෙන, උත්තමඞ්ගං විභිජ්ජිතං [විසාටිකං (සී. ස්‍යා. පී.), විඝාටිතං (සී. නිය්‍ය)].

120. අචාරි වතායං විතුදං වනානි, කට්ඨඞ්ගරුක්ඛෙසු අසාරකෙසු;

අථාසදා ඛදිරං ජාතසාරං [ජාතිසාරං (ක.)], යත්ථබ්භිදා ගරුළො උත්තමඞ්ගන්ති.

කන්දගලක [කන්දලක (ක.)] ජාතකං දසමං.

නතංදළ්හවග්ගො ඡට්ඨො.

තස්සුද්දානං –

දළ්හබන්ධන හංසවරො ච පුන, විරූපක්ඛ සවිට්ඨක මච්ඡවරො;

සකුරුඞ්ග සඅස්සක අම්බවරො, පුන කුක්කුටකො ගරුළෙන දසාති.