5. රුහකවග්ගො

191. රුහකජාතකං (2-5-1)

81. අපි [අම්භො (ස්‍යා. ක. සී.)] රුහක ඡින්නාපි, ජියා සන්ධීයතෙ පුන;

සන්ධීයස්සු පුරාණියා, මා කොධස්ස වසං ගමි.

82. විජ්ජමානෙසු වාකෙසු [විජ්ජමානාසු මරුවාසු (සී.), විජ්ජමානාසු මරූද්වාසු (පී.)], විජ්ජමානෙසු කාරිසු;

අඤ්ඤං ජියං කරිස්සාමි, අලඤ්ඤෙව පුරාණියාති.

රුහකජාතකං පඨමං.

192. සිරිකාළකණ්ණිජාතකං (2-5-2)

83. ඉත්ථී සියා රූපවතී, සා ච සීලවතී සියා;

පුරිසො තං න ඉච්ඡෙය්‍ය, සද්දහාසි මහොසධ.

84. සද්දහාමි මහාරාජ, පුරිසො දුබ්භගො සියා;

සිරී ච කාළකණ්ණී ච, න සමෙන්ති කුදාචනන්ති.

සිරිකාළකණ්ණිජාතකං දුතියං.

193. චූළපදුමජාතකං (2-5-3)

85. අයමෙව සා අහමපි [අහම්පි (සී. ස්‍යා. පී.), අහස්මි (ක.)] සො අනඤ්ඤො, අයමෙව සො හත්ථච්ඡින්නො අනඤ්ඤො;

යමාහ ‘‘කොමාරපතී මම’’න්ති, වජ්ඣිත්ථියො නත්ථි ඉත්ථීසු සච්චං.

86. ඉමඤ්ච ජම්මං මුසලෙන හන්ත්වා, ලුද්දං ඡවං පරදාරූපසෙවිං;

ඉමිස්සා ච නං පාපපතිබ්බතාය, ජීවන්තියා ඡින්දථ කණ්ණනාසන්ති.

චූළපදුමජාතකං තතියං.

194. මණිචොරජාතකං (2-5-4)

87. න සන්ති දෙවා පවසන්ති නූන, න හි නූන සන්ති ඉධ ලොකපාලා;

සහසා කරොන්තානමසඤ්ඤතානං, න හි නූන සන්තී පටිසෙධිතාරො.

88. අකාලෙ වස්සතී තස්ස, කාලෙ තස්ස න වස්සති;

සග්ගා ච චවති ඨානා, නනු සො තාවතා හතොති.

මණිචොරජාතකං චතුත්ථං.

195. පබ්බතූපත්ථරජාතකං (2-5-5)

89. පබ්බතූපත්ථරෙ [පබ්බතපත්ථරෙ (සී. ස්‍යා. පී.)] රම්මෙ, ජාතා පොක්ඛරණී සිවා;

තං සිඞ්ගාලො අපාපායි [අපාපාසි (සී. ස්‍යා. පී.)], ජානං සීහෙන රක්ඛිතං.

90. පිවන්ති චෙ [පිවන්ති වෙ (සී.), පිවන්තිව (පී.), පිවන්තෙව (?)] මහාරාජ, සාපදානි මහානදිං;

න තෙන අනදී හොති, ඛමස්සු යදි තෙ පියාති.

පබ්බතූපත්ථර [පබ්බතපත්ථර (සී. ස්‍යා. පී.)] ජාතකං පඤ්චමං.

196. වලාහකස්සජාතකං (2-5-6)

91. යෙ න කාහන්ති ඔවාදං, නරා බුද්ධෙන දෙසිතං;

බ්‍යසනං තෙ ගමිස්සන්ති, රක්ඛසීහිව වාණිජා.

92. යෙ ච කාහන්ති ඔවාදං, නරා බුද්ධෙන දෙසිතං;

සොත්ථිං පාරං ගමිස්සන්ති, වලාහෙනෙව [වාලාහෙනෙව (සී. පී.)] වාණිජාති.

වලාහකස්ස [වාලාහස්ස (සී. පී.)] ජාතකං ඡට්ඨං.

197. මිත්තාමිත්තජාතකං (2-5-7)

93. න නං උම්හයතෙ දිස්වා, න ච නං පටිනන්දති;

චක්ඛූනි චස්ස න දදාති, පටිලොමඤ්ච වත්තති.

94. එතෙ භවන්ති ආකාරා, අමිත්තස්මිං පතිට්ඨිතා;

යෙහි අමිත්තං ජානෙය්‍ය, දිස්වා සුත්වා ච පණ්ඩිතොති.

මිත්තාමිත්තජාතකං සත්තමං.

198. රාධජාතකං (2-5-8)

95. පවාසා ආගතො තාත, ඉදානි නචිරාගතො;

කච්චින්නු තාත තෙ මාතා, න අඤ්ඤමුපසෙවති.

96. න ඛො පනෙතං සුභණං, ගිරං සච්චුපසංහිතං;

සයෙථ පොට්ඨපාදොව, මුම්මුරෙ [මුම්මුරෙ (ස්‍යා.), මං පුරෙ (ක.) මුම්මුරසද්දො ථුසග්ගිම්හි කුක්කුළෙ ච වත්තතීති සක්කතාභිධානෙසු] උපකූථිතොති [උපකූසිතොති (සී. ස්‍යා. පී.), උපකූලිතො (ක.)].

රාධජාතකං අට්ඨමං.

199. ගහපතිජාතකං (2-5-9)

97. උභයං මෙ න ඛමති, උභයං මෙ න රුච්චති;

යාචායං කොට්ඨමොතිණ්ණා, නාද්දසං ඉති භාසති.

98. තං තං ගාමපති බ්‍රූමි, කදරෙ අප්පස්මි ජීවිතෙ;

ද්වෙ මාසෙ සඞ්ගරං කත්වා [කාරං කත්වාන (සී. පී.), සංකරං කත්වා (ක.)], මංසං ජරග්ගවං කිසං;

අප්පත්තකාලෙ චොදෙසි, තම්පි මය්හං න රුච්චතීති.

ගහපතිජාතකං නවමං.

200. සාධුසීලජාතකං (2-5-10)

99. සරීරදබ්‍යං වුඩ්ඪබ්‍යං [වද්ධබ්‍යං (සී. පී.)], සොජච්චං සාධුසීලියං;

බ්‍රාහ්මණං තෙව පුච්ඡාම, කන්නු තෙසං වනිම්හසෙ [වණිම්හසෙ (සී. පී.)].

100. අත්ථො අත්ථි සරීරස්මිං, වුඩ්ඪබ්‍යස්ස නමො කරෙ;

අත්ථො අත්ථි සුජාතස්මිං, සීලං අස්මාක රුච්චතීති.

සාධුසීලජාතකං දසමං.

රුහකවග්ගො පඤ්චමො.

තස්සුද්දානං –

අපිරුහක රූපවතී මුසලො, පවසන්ති සපඤ්චමපොක්ඛරණී;

අථ මුත්තිමවාණිජ උම්හයතෙ, චිරආගත කොට්ඨ සරීර දසාති.