4. අසදිසවග්ගො

181. අසදිසජාතකං (2-4-1)

61. ධනුග්ගහො අසදිසො, රාජපුත්තො මහබ්බලො;

දූරෙපාතී අක්ඛණවෙධී, මහාකායප්පදාලනො.

62. සබ්බාමිත්තෙ රණං කත්වා, න ච කඤ්චි විහෙඨයි;

භාතරං සොත්ථිං කත්වාන, සංයමං අජ්ඣුපාගමීති.

අසදිසජාතකං පඨමං.

182. සඞ්ගාමාවචරජාතකං (2-4-2)

63. සඞ්ගාමාවචරො සූරො, බලවා ඉති විස්සුතො;

කිං නු තොරණමාසජ්ජ, පටික්කමසි කුඤ්ජර.

64. ඔමද්ද ඛිප්පං පලිඝං, එසිකානි ච අබ්බහ [උබ්බහ (ස්‍යා.), අබ්භුහ (ක.)];

තොරණානි ච මද්දිත්වා, ඛිප්පං පවිස කුඤ්ජරාති.

සඞ්ගාමාවචරජාතකං දුතියං.

183. වාලොදකජාතකං (2-4-3)

65. වාලොදකං අප්පරසං නිහීනං, පිත්වා [පීත්වා (සී. පී.)] මදො ජායති ගද්‍රභානං;

ඉමඤ්ච පිත්වාන රසං පණීතං, මදො න සඤ්ජායති සින්ධවානං.

66. අප්පං පිවිත්වාන නිහීනජච්චො, සො මජ්ජතී තෙන ජනින්ද පුට්ඨො [ඵුට්ඨො (සී. ස්‍යා.), මුට්ඨො (ක.)];

ධොරය්හසීලී ච කුලම්හි ජාතො, න මජ්ජතී අග්ගරසං පිවිත්වාති.

වාලොදකජාතකං තතියං.

184. ගිරිදත්තජාතකං (2-4-4)

67. දූසිතො ගිරිදත්තෙන [ගිරිදන්තෙන (පී.)], හයො සාමස්ස පණ්ඩවො;

පොරාණං පකතිං හිත්වා, තස්සෙවානුවිධිය්‍යති [නුවිධීයති (සී. පී.)].

68. සචෙ ච තනුජො පොසො, සිඛරාකාර [සිඞ්ගාරාකාර (ස්‍යා.)] කප්පිතො;

ආනනෙ නං [තං (සී. ස්‍යා. පී.)] ගහෙත්වාන, මණ්ඩලෙ පරිවත්තයෙ;

ඛිප්පමෙව පහන්ත්වාන, තස්සෙවානුවිධිය්‍යතීති.

ගිරිදත්තජාතකං චතුත්ථං.

185. අනභිරතිජාතකං (2-4-5)

69. යථොදකෙ ආවිලෙ අප්පසන්නෙ, න පස්සති සිප්පිකසම්බුකඤ්ච;

සක්ඛරං වාලුකං මච්ඡගුම්බං, එවං ආවිලම්හි [ආවිලෙ හි (සී.)] චිත්තෙ;

න පස්සති අත්තදත්ථං පරත්ථං.

70. යථොදකෙ අච්ඡෙ විප්පසන්නෙ, සො පස්සති සිප්පිකසම්බුකඤ්ච;

සක්ඛරං වාලුකං මච්ඡගුම්බං, එවං අනාවිලම්හි චිත්තෙ;

සො පස්සති අත්තදත්ථං පරත්ථන්ති.

අනභිරතිජාතකං පඤ්චමං.

186. දධිවාහනජාතකං (2-4-6)

71. වණ්ණගන්ධරසූපෙතො, අම්බොයං අහුවා පුරෙ;

තමෙව පූජං ලභමානො, කෙනම්බො කටුකප්ඵලො.

72. පුචිමන්දපරිවාරො, අම්බො තෙ දධිවාහන;

මූලං මූලෙන සංසට්ඨං, සාඛා සාඛා [සාඛං (ස්‍යා. ක.)] නිසෙවරෙ [නිවීසරෙ (ක.)];

අසාතසන්නිවාසෙන, තෙනම්බො කටුකප්ඵලොති.

දධිවාහනජාතකං ඡට්ඨං.

187. චතුමට්ඨජාතකං (2-4-7)

73. උච්චෙ විටභිමාරුය්හ, මන්තයව්හො රහොගතා;

නීචෙ ඔරුය්හ මන්තව්හො, මිගරාජාපි සොස්සති.

74. යං සුවණ්ණො සුවණ්ණෙන [යං සුපණ්ණො සුපණ්ණෙන (සී. ස්‍යා. පී.)], දෙවො දෙවෙන මන්තයෙ;

කිං තෙත්ථ චතුමට්ඨස්ස, බිලං පවිස ජම්බුකාති.

චතුමට්ඨජාතකං සත්තමං.

188. සීහකොත්ථුජාතකං (2-4-8)

75. සීහඞ්ගුලී සීහනඛො, සීහපාදපතිට්ඨිතො;

සො සීහො සීහසඞ්ඝම්හි, එකො නදති අඤ්ඤථා.

76. මා ත්වං නදි රාජපුත්ත, අප්පසද්දො වනෙ වස;

සරෙන ඛො [මා (ක.)] තං ජානෙය්‍යුං, න හි තෙ පෙත්තිකො සරොති.

සීහකොත්ථුජාතකං අට්ඨමං.

189. සීහචම්මජාතකං (2-4-9)

77. නෙතං සීහස්ස නදිතං, න බ්‍යග්ඝස්ස න [බ්‍යග්ඝස්ස න ච (ක.)] දීපිනො;

පාරුතො සීහචම්මෙන, ජම්මො නදති ගද්‍රභො.

78. චිරම්පි ඛො තං ඛාදෙය්‍ය, ගද්‍රභො හරිතං යවං;

පාරුතො සීහචම්මෙන, රවමානොව දූසයීති.

සීහචම්මජාතකං නවමං.

190. සීලානිසංසජාතකං (2-4-10)

79. පස්ස සද්ධාය සීලස්ස, චාගස්ස ච අයං ඵලං;

නාගො නාවාය වණ්ණෙන, සද්ධං වහතුපාසකං.

80. සබ්භිරෙව සමාසෙථ, සබ්භි කුබ්බෙථ සන්ථවං;

සතඤ්හි සන්නිවාසෙන, සොත්ථිං ගච්ඡති න්හාපිතොති.

සීලානිසංසජාතකං දසමං.

අසදිසවග්ගො චතුත්ථො.

තස්සුද්දානං –

ධනුග්ගහ කුඤ්ජර අප්පරසො, ගිරිදත්තමනාවිලචිත්තවරං;

දධිවාහන ජම්බූක සීහනඛො, හරිතයව නාගවරෙන දසාති.