3. කල්‍යාණවග්ගො

171. කල්‍යාණධම්මජාතකං (2-3-1)

41. කල්‍යාණධම්මොති යදා ජනින්ද, ලොකෙ සමඤ්ඤං අනුපාපුණාති;

තස්මා න හිය්‍යෙථ [හීයෙථ (සී.)] නරො සපඤ්ඤො, හිරියාපි සන්තො ධුරමාදියන්ති.

42. සායං සමඤ්ඤා ඉධ මජ්ජ පත්තා, කල්‍යාණධම්මොති ජනින්ද ලොකෙ;

තාහං සමෙක්ඛං ඉධ පබ්බජිස්සං, න හි මත්ථි ඡන්දො ඉධ කාමභොගෙති.

කල්‍යාණධම්මජාතකං පඨමං.

172. දද්දරජාතකං (2-3-2)

43. කො නු සද්දෙන මහතා, අභිනාදෙති දද්දරං;

තං සීහා නප්පටිනදන්ති [කිං සීහා නප්පටිනදන්ති (සී. පී.), න සීහා පටිනදන්ති (ක.)], කො නාමෙසො මිගාධිභූ.

44. අධමො මිගජාතානං, සිඞ්ගාලො තාත වස්සති;

ජාතිමස්ස ජිගුච්ඡන්තා, තුණ්හී සීහා සමච්ඡරෙති.

දද්දරජාතකං දුතියං.

173. මක්කටජාතකං (2-3-3)

45. තාත මාණවකො එසො, තාලමූලං අපස්සිතො;

අගාරකඤ්චිදං අත්ථි, හන්ද දෙමස්සගාරකං.

46. මා ඛො ත්වං තාත පක්කොසි, දූසෙය්‍ය නො අගාරකං;

නෙතාදිසං මුඛං හොති, බ්‍රාහ්මණස්ස සුසීලිනොති.

මක්කටජාතකං තතියං.

174. දුබ්භියමක්කටජාතකං (2-3-4)

47. අදම්හ තෙ වාරි පහූතරූපං, ඝම්මාභිතත්තස්ස පිපාසිතස්ස;

සො දානි පිත්වාන [පීත්වාන (සී. පී.)] කිරිඞ්කරොසි [කිකිංකරොසි (සී. ස්‍යා. පී.)], අසඞ්ගමො පාපජනෙන සෙය්‍යො.

48. කො තෙ සුතො වා දිට්ඨො වා, සීලවා නාම මක්කටො;

ඉදානි ඛො තං ඔහච්ඡං [ඌහච්ච (සී. පී.), ඔහච්චං (ස්‍යා.), උහජ්ජං (ක.)], එසා අස්මාක ධම්මතාති.

දුබ්භියමක්කටජාතකං චතුත්ථං.

175. ආදිච්චුපට්ඨානජාතකං (2-3-5)

49. සබ්බෙසු කිර භූතෙසු, සන්ති සීලසමාහිතා;

පස්ස සාඛාමිගං ජම්මං, ආදිච්චමුපතිට්ඨති.

50. නාස්ස සීලං විජානාථ, අනඤ්ඤාය පසංසථ;

අග්ගිහුත්තඤ්ච උහන්නං [ඌහන්තං (සී.), ඌහනං (ස්‍යා.), ඌහන්ති (පී.), උහදං (ක.)], ද්වෙ ච භින්නා කමණ්ඩලූති.

ආදිච්චුපට්ඨානජාතකං පඤ්චමං.

176. කළායමුට්ඨිජාතකං (2-3-6)

51. බාලො වතායං දුමසාඛගොචරො, පඤ්ඤා ජනින්ද නයිමස්ස විජ්ජති;

කළායමුට්ඨිං [කලායමුට්ඨිං (සී. පී.)] අවකිරිය කෙවලං, එකං කළායං පතිතං ගවෙසති.

52. එවමෙව මයං රාජ, යෙ චඤ්ඤෙ අතිලොභිනො;

අප්පෙන බහුං ජිය්‍යාම, කළායෙනෙව වානරොති.

කළායමුට්ඨිජාතකං ඡට්ඨං.

177. තින්දුකජාතකං (2-3-7)

53. ධනුහත්ථකලාපෙහි, නෙත්තිං සවරධාරිභි;

සමන්තා පරිකිණ්ණම්හ, කථං මොක්ඛො භවිස්සති.

54. අප්පෙව බහුකිච්චානං, අත්ථො ජායෙථ කොචි නං;

අත්ථි රුක්ඛස්ස අච්ඡින්නං, ඛජ්ජථඤ්ඤෙව තින්දුකන්ති.

තින්දුකජාතකං සත්තමං.

178. කච්ඡපජාතකං (2-3-8)

55. ජනිත්තං මෙ භවිත්තං මෙ, ඉති පඞ්කෙ අවස්සයිං;

තං මං පඞ්කො අජ්ඣභවි, යථා දුබ්බලකං තථා;

තං තං වදාමි භග්ගව, සුණොහි වචනං මම.

56. ගාමෙ වා යදි වා රඤ්ඤෙ, සුඛං යත්‍රාධිගච්ඡති;

තං ජනිත්තං භවිත්තඤ්ච, පුරිසස්ස පජානතො;

යම්හි ජීවෙ තම්හි ගච්ඡෙ, න නිකෙතහතො සියාති.

කච්ඡපජාතකං අට්ඨමං.

179. සතධම්මජාතකං (2-3-9)

57. තඤ්ච අප්පඤ්ච උච්ඡිට්ඨං, තඤ්ච කිච්ඡෙන නො අදා;

සොහං බ්‍රාහ්මණජාතිකො, යං භුත්තං තම්පි උග්ගතං.

58. එවං ධම්මං නිරංකත්වා [නිරාකත්වා (?) නි + ආ + කර + ත්වා], යො අධම්මෙන ජීවති;

සතධම්මොව ලාභෙන, ලද්ධෙනපි න නන්දතීති.

සතධම්මජාතකං නවමං.

180. දුද්දදජාතකං (2-3-10)

59. දුද්දදං දදමානානං, දුක්කරං කම්ම කුබ්බතං;

අසන්තො නානුකුබ්බන්ති, සතං ධම්මො දුරන්නයො.

60. තස්මා සතඤ්ච අසතං, නානා හොති ඉතො ගති;

අසන්තො නිරයං යන්ති, සන්තො සග්ගපරායණාති [පරායනා (ස්‍යා. ක.)].

දුද්දදජාතකං දසමං.

කල්‍යාණවග්ගො තතියො.

තස්සුද්දානං –

සුසමඤ්ඤමිගාධිභූ මාණවකො, වාරිපහූතරූපාදිච්චුපට්ඨානා;

සකළායසතින්දුකපඞ්ක පුන, සතධම්ම සුදුද්දදකෙන දසාති.