2. සන්ථවවග්ගො

161. ඉන්දසමානගොත්තජාතකං (2-2-1)

21. න සන්ථවං [සන්ධවං (ක.)] කාපුරිසෙන කයිරා, අරියො අනරියෙන පජානමත්ථං;

චිරානුවුත්ථොපි කරොති පාපං, ගජො යථා ඉන්දසමානගොත්තං.

22. යං ත්වෙව ජඤ්ඤා සදිසො මමන්ති, සීලෙන පඤ්ඤාය සුතෙන චාපි;

තෙනෙව මෙත්තිං කයිරාථ සද්ධිං, සුඛො හවෙ සප්පුරිසෙන සඞ්ගමොති.

ඉන්දසමානගොත්තජාතකං පඨමං.

162. සන්ථවජාතකං (2-2-2)

23. න සන්ථවස්මා පරමත්ථි පාපියො, යො සන්ථවො [සන්ධවො (ක.)] කාපුරිසෙන හොති;

සන්තප්පිතො සප්පිනා පායසෙන [පායාසෙන (ක.)], කිච්ඡාකතං පණ්ණකුටිං අදය්හි [අදඩ්ඪහි (සී. ස්‍යා.), අදට්ඨහි (පී.), අදද්දහි (?)].

24. න සන්ථවස්මා පරමත්ථි සෙය්‍යො, යො සන්ථවො සප්පුරිසෙන හොති;

සීහස්ස බ්‍යග්ඝස්ස ච දීපිනො ච, සාමා මුඛං ලෙහති සන්ථවෙනාති.

සන්ථවජාතකං දුතියං.

163. සුසීමජාතකං (2-2-3)

25. කාළා මිගා සෙතදන්තා තවීමෙ [තව ඉමෙ (සී. ස්‍යා. පී.)], පරොසතං හෙමජාලාභිඡන්නා [හෙමජාලාභිසඤ්ඡන්නා (සී.)];

තෙ තෙ දදාමීති සුසීම බ්‍රූසි, අනුස්සරං පෙත්තිපිතාමහානං.

26. කාළා මිගා සෙතදන්තා මමීමෙ [මම ඉමෙ (සී. පී.)], පරොසතං හෙමජාලාභිච්ඡන්නා;

තෙ තෙ දදාමීති වදාමි මාණව, අනුස්සරං පෙත්තිපිතාමහානන්ති.

සුසීමජාතකං තතියං.

164. ගිජ්ඣජාතකං (2-2-4)

27. යං නු ගිජ්ඣො යොජනසතං, කුණපානි අවෙක්ඛති;

කස්මා ජාලඤ්ච පාසඤ්ච, ආසජ්ජාපි න බුජ්ඣසි.

28. යදා පරාභවො හොති, පොසො ජීවිතසඞ්ඛයෙ;

අථ ජාලඤ්ච පාසඤ්ච, ආසජ්ජාපි න බුජ්ඣතීති.

ගිජ්ඣජාතකං චතුත්ථං.

165. නකුලජාතකං (2-2-5)

29. සන්ධිං කත්වා අමිත්තෙන, අණ්ඩජෙන ජලාබුජ;

විවරිය දාඨං සෙසි [සයසි (සී. ස්‍යා. පී.)], කුතො තෙ භයමාගතං.

30. සඞ්කෙථෙව [සඞ්කතෙව (ක.)] අමිත්තස්මිං, මිත්තස්මිම්පි න විස්සසෙ;

අභයා භයමුප්පන්නං, අපි මූලානි කන්තතීති [මූලං නිකන්තතීති (සී.)].

නකුලජාතකං පඤ්චමං.

166. උපසාළකජාතකං (2-2-6)

31. උපසාළකනාමානි [උපසාළ්හකනාමානං (සී. ස්‍යා. පී.)], සහස්සානි චතුද්දස;

අස්මිං පදෙසෙ දඩ්ඪානි, නත්ථි ලොකෙ අනාමතං.

32. යම්හි සච්චඤ්ච ධම්මො ච, අහිංසා සංයමො දමො;

එතං අරියා සෙවන්ති, එතං ලොකෙ අනාමතන්ති.

උපසාළකජාතකං ඡට්ඨං.

167. සමිද්ධිජාතකං (2-2-7)

33. අභුත්වා භික්ඛසි භික්ඛු, න හි භුත්වාන භික්ඛසි;

භුත්වාන භික්ඛු භික්ඛස්සු, මා තං කාලො උපච්චගා.

34. කාලං වොහං න ජානාමි, ඡන්නො කාලො න දිස්සති;

තස්මා අභුත්වා භික්ඛාමි, මා මං කාලො උපච්චගාති.

සමිද්ධිජාතකං සත්තමං.

168. සකුණග්ඝිජාතකං (2-2-8)

35. සෙනො බලසා පතමානො, ලාපං ගොචරඨායිනං;

සහසා අජ්ඣප්පත්තොව, මරණං තෙනුපාගමි.

36. සොහං නයෙන සම්පන්නො, පෙත්තිකෙ ගොචරෙ රතො;

අපෙතසත්තු මොදාමි, සම්පස්සං අත්ථමත්තනොති.

සකුණග්ඝිජාතකං අට්ඨමං.

169. අරකජාතකං (2-2-9)

37. යො වෙ මෙත්තෙන චිත්තෙන, සබ්බලොකානුකම්පති;

උද්ධං අධො ච තිරියං, අප්පමාණෙන සබ්බසො.

38. අප්පමාණං හිතං චිත්තං, පරිපුණ්ණං සුභාවිතං;

යං පමාණකතං කම්මං, න තං තත්‍රාවසිස්සතීති.

අරකජාතකං නවමං.

170. කකණ්ටකජාතකං (2-2-10)

39. නායං පුරෙ උණ්ණමති [උන්නමති (ස්‍යා.)], තොරණග්ගෙ කකණ්ටකො;

මහොසධ විජානාහි, කෙන ථද්ධො කකණ්ටකො.

40. අලද්ධපුබ්බං ලද්ධාන, අඩ්ඪමාසං කකණ්ටකො;

අතිමඤ්ඤති රාජානං, වෙදෙහං මිථිලග්ගහන්ති.

කකණ්ටකජාතකං දසමං.

සන්ථවවග්ගො දුතියො.

තස්සුද්දානං –

අථ ඉන්දසමාන සපණ්ණකුටි, සුසිමුත්තම ගිජ්ඣ ජලාබුජකො;

උපසාළක භික්ඛු සලාපවරො, අථ මෙත්තවරො දසපුණ්ණමතීති.