530. සංකිච්චජාතකං (2)

69. ‘‘දිස්වා නිසින්නං රාජානං, බ්‍රහ්මදත්තං රථෙසභං;

අථස්ස පටිවෙදෙසි, යස්සාසි අනුකම්පකො.

70. ‘‘සංකිච්චායං අනුප්පත්තො, ඉසීනං සාධුසම්මතො;

තරමානරූපො නිය්‍යාහි, ඛිප්පං පස්ස මහෙසිනං.

71. ‘‘තතො ච රාජා තරමානො, යුත්තමාරුය්හ සන්දනං;

මිත්තාමච්චපරිබ්‍යූළ්හො [පරිබ්බූළ්හො (සී. පී.)], අගමාසි රථෙසභො.

72. ‘‘නික්ඛිප්ප පඤ්ච කකුධානි, කාසීනං රට්ඨවඩ්ඪනො;

වාළබීජනි [වා ළවීජනී (සී. පී.)] මුණ්හීසං, ඛග්ගං ඡත්තඤ්චුපාහනං;

73. ‘‘ඔරුය්හ රාජා යානම්හා, ඨපයිත්වා පටිච්ඡදං;

ආසීනං දායපස්සස්මිං, සංකිච්චමුපසඞ්කමි.

74. ‘‘උපසඞ්කමිත්වා සො රාජා, සම්මොදි ඉසිනා සහ;

තං කථං වීතිසාරෙත්වා, එකමන්තං උපාවිසි.

75. ‘‘එකමන්තං නිසින්නොව, අථ කාලං අමඤ්ඤථ;

තතො පාපානි කම්මානි, පුච්ඡිතුං පටිපජ්ජථ.

76. ‘‘ඉසිං පුච්ඡාම [පුච්ඡාමි (සී. පී.)] සංකිච්චං, ඉසීනං සාධුසම්මතං;

ආසීනං දායපස්සස්මිං, ඉසිසඞ්ඝපුරක්ඛතං [පුරක්ඛිතං (ක.)].

77. ‘‘කං ගතිං පෙච්ච ගච්ඡන්ති, නරා ධම්මාතිචාරිනො;

අතිචිණ්ණො මයා ධම්මො, තං මෙ අක්ඛාහි පුච්ඡිතො.

78. ‘‘ඉසී අවච සංකිච්චො, කාසීනං රට්ඨවඩ්ඪනං;

ආසීනං දායපස්සස්මිං, මහාරාජ සුණොහි මෙ.

79. ‘‘උප්පථෙන වජන්තස්ස, යො මග්ගමනුසාසති;

තස්ස චෙ වචනං කයිරා, නාස්ස මග්ගෙය්‍ය කණ්ටකො.

80. ‘‘අධම්මං පටිපන්නස්ස, යො ධම්මමනුසාසති;

තස්ස චෙ වචනං කයිරා, න සො ගච්ඡෙය්‍ය දුග්ගතිං.

81. ‘‘ධම්මො පථො මහාරාජ, අධම්මො පන උප්පථො;

අධම්මො නිරයං නෙති, ධම්මො පාපෙති සුග්ගතිං.

82. ‘‘අධම්මචාරිනො රාජ, නරා විසමජීවිනො;

යං ගතිං පෙච්ච ගච්ඡන්ති, නිරයෙ තෙ සුණොහි මෙ.

83. ‘‘සඤ්ජීවො කාළසුත්තො ච, සඞ්ඝාතො [සඞ්ඛාටො (ස්‍යා. ක.)] ද්වෙ ච රොරුවා;

අථාපරො මහාවීචි, තාපනො [තපනො (සී. පී.)] ච පතාපනො.

84. ‘‘ඉච්චෙතෙ අට්ඨ නිරයා, අක්ඛාතා දුරතික්කමා;

ආකිණ්ණා ලුද්දකම්මෙහි, පච්චෙකා සොළසුස්සදා.

85. ‘‘කදරියතාපනා [කදරියතපනා (සී. පී.)] ඝොරා, අච්චිමන්තො [අච්චිමන්තා (පී.)] මහබ්භයා;

ලොමහංසනරූපා ච, භෙස්මා පටිභයා දුඛා.

86. ‘‘චතුක්කණ්ණා චතුද්වාරා, විභත්තා භාගසො මිතා;

අයොපාකාරපරියන්තා, අයසා පටිකුජ්ජිතා.

87. ‘‘තෙසං අයොමයා භූමි, ජලිතා තෙජසා යුතා;

සමන්තා යොජනසතං, ඵුටා [ඵරිත්වා (අ. නි. 3.36; පෙ. ව. 71)] තිට්ඨන්ති සබ්බදා.

88. ‘‘එතෙ පතන්ති නිරයෙ, උද්ධංපාදා අවංසිරා;

ඉසීනං අතිවත්තාරො, සඤ්ඤතානං තපස්සිනං.

89. ‘‘තෙ භූනහුනො පච්චන්ති, මච්ඡා බිලකතා යථා;

සංවච්ඡරෙ අසඞ්ඛෙය්‍යෙ, නරා කිබ්බිසකාරිනො.

90. ‘‘ඩය්හමානෙන ගත්තෙන, නිච්චං සන්තරබාහිරං;

නිරයා නාධිගච්ඡන්ති, ද්වාරං නික්ඛමනෙසිනො.

91. ‘‘පුරත්ථිමෙන ධාවන්ති, තතො ධාවන්ති පච්ඡතො;

උත්තරෙනපි ධාවන්ති, තතො ධාවන්ති දක්ඛිණං;

යං යඤ්හි ද්වාරං ගච්ඡන්ති, තං තදෙව පිධීයරෙ [පිථිය්‍යති (සී.), පිථිය්‍යරෙ (ස්‍යා.), පිථීයරෙ (පී.)].

92. ‘‘බහූනි වස්සසහස්සානි, ජනා නිරයගාමිනො;

බාහා පග්ගය්හ කන්දන්ති, පත්වා දුක්ඛං අනප්පකං.

93. ‘‘ආසීවිසංව කුපිතං, තෙජස්සිං දුරතික්කමං;

න සාධුරූපෙ ආසීදෙ, සඤ්ඤතානං තපස්සිනං.

94. ‘‘අතිකායො මහිස්සාසො, අජ්ජුනො කෙකකාධිපො;

සහස්සබාහු උච්ඡින්නො, ඉසිමාසජ්ජ ගොතමං.

95. ‘‘අරජං රජසා වච්ඡං, කිසං අවකිරිය දණ්ඩකී;

තාලොව මූලතො [සමූලො (ක.)] ඡින්නො, ස රාජා විභවඞ්ගතො.

96. ‘‘උපහච්ච මනං මජ්ඣො [මෙජ්ඣො (ක.)], මාතඞ්ගස්මිං යසස්සිනෙ;

සපාරිසජ්ජො උච්ඡින්නො, මජ්ඣාරඤ්ඤං තදා අහු.

97. ‘‘කණ්හදීපායනාසජ්ජ, ඉසිං අන්ධකවෙණ්ඩයො [වෙණ්හුයො (සී. පී.), පිණ්හයො (?)];

අඤ්ඤොඤ්ඤං [අඤ්ඤමඤ්ඤං (සී. පී.)] මුසලා [මුසලෙ (සී. ස්‍යා. පී.)] හන්ත්වා, සම්පත්තා යමසාධනං [යමසාදනං (පී.)].

98. ‘‘අථායං ඉසිනා සත්තො, අන්තලික්ඛචරො පුරෙ;

පාවෙක්ඛි පථවිං [පඨවිං (සී. ස්‍යා. පී.)] චෙච්චො, හීනත්තො පත්තපරියායං.

99. ‘‘තස්මා හි ඡන්දාගමනං, නප්පසංසන්ති පණ්ඩිතා;

අදුට්ඨචිත්තො භාසෙය්‍ය, ගිරං සච්චූපසංහිතං.

100. ‘‘මනසා චෙ පදුට්ඨෙන, යො නරො පෙක්ඛතෙ මුනිං;

විජ්ජාචරණසම්පන්නං, ගන්තා සො නිරයං අධො.

101. ‘‘යෙ වුඩ්ඪෙ [වද්ධෙ (ක.)] පරිභාසන්ති, ඵරුසූපක්කමා ජනා;

අනපච්චා අදායාදා, තාලවත්ථු [තාලවත්ථූ (ස්‍යා.), තාලාවත්ථු (පී.)] භවන්ති තෙ.

102. ‘‘යො ච පබ්බජිතං හන්ති, කතකිච්චං මහෙසිනං;

ස කාළසුත්තෙ නිරයෙ, චිරරත්තාය පච්චති.

103. ‘‘යො ච රාජා අධම්මට්ඨො, රට්ඨවිද්ධංසනො මගො [චුතො (සී.)];

තාපයිත්වා ජනපදං, තාපනෙ පෙච්ච පච්චති.

104. ‘‘සො ච වස්සසහස්සානි [වස්සසහස්සානං (සී. ස්‍යා.)], සතං දිබ්බානි පච්චති;

අච්චිසඞ්ඝපරෙතො සො, දුක්ඛං වෙදෙති වෙදනං.

105. ‘‘තස්ස අග්ගිසිඛා කායා, නිච්ඡරන්ති පභස්සරා;

තෙජොභක්ඛස්ස ගත්තානි, ලොමෙහි ච [ලොමග්ගෙහි ච (සී. ස්‍යා. පී.)] නඛෙහි ච.

106. ‘‘ඩය්හමානෙන ගත්තෙන, නිච්චං සන්තරබාහිරං;

දුක්ඛාභිතුන්නො නදති, නාගො තුත්තට්ටිතො [තුත්තද්දිතො (සී.)] යථා.

107. ‘‘යො ලොභා පිතරං හන්ති, දොසා වා පුරිසාධමො;

ස කාළසුත්තෙ නිරයෙ, චිරරත්තාය පච්චති.

108. ‘‘ස තාදිසො පච්චති ලොහකුම්භියං, පක්කඤ්ච සත්තීහි හනන්ති නිත්තචං;

අන්ධං කරිත්වා මුත්තකරීසභක්ඛං, ඛාරෙ නිමුජ්ජන්ති තථාවිධං නරං.

109. ‘‘තත්තං පක්කුථිතමයොගුළඤ්ච [පක්කුධිතමයොගුළඤ්ච (ක.)], දීඝෙ ච ඵාලෙ චිරරත්තතාපිතෙ;

වික්ඛම්භමාදාය විබන්ධ [විබද්ධ (සී.), විභජ්ජ (ස්‍යා. පී.)] රජ්ජුභි, විවටෙ මුඛෙ සම්පවිසන්ති [සංචවන්ති (සී. ස්‍යා. පී.)] රක්ඛසා.

110. ‘‘සාමා ච සොණා සබලා ච ගිජ්ඣා, කාකොළසඞ්ඝා ච දිජා අයොමුඛා;

සඞ්ගම්ම ඛාදන්ති විප්ඵන්දමානං, ජිව්හං විභජ්ජ විඝාසං සලොහිතං.

111. ‘‘තං දඩ්ඪතාලං පරිභින්නගත්තං, නිප්පොථයන්තා අනුවිචරන්ති රක්ඛසා;

රතී හි නෙසං දුඛිනො පනීතරෙ, එතාදිසස්මිං නිරයෙ වසන්ති;

යෙ කෙචි ලොකෙ ඉධ පෙත්තිඝාතිනො.

112. ‘‘පුත්තො ච මාතරං හන්ත්වා, ඉතො ගන්ත්වා යමක්ඛයං;

භුසමාපජ්ජතෙ දුක්ඛං, අත්තකම්මඵලූපගො.

113. ‘‘අමනුස්සා අතිබලා, හන්තාරං ජනයන්තියා;

අයොමයෙහි වාළෙහි [ඵාලෙහි (පී.)], පීළයන්ති පුනප්පුනං.

114. ‘‘තමස්සවං [තං පස්සවං (සී. ස්‍යා.), තං පස්සුතං (පී.)] සකා ගත්තා, රුහිරං [රුධිරං (සී. ස්‍යා.)] අත්තසම්භවං;

තම්බලොහවිලීනංව, තත්තං පායෙන්ති මත්තිඝං [මත්තියං (සී.)].

115. ‘‘ජිගුච්ඡං කුණපං පූතිං, දුග්ගන්ධං ගූථකද්දමං;

පුබ්බලොහිතසඞ්කාසං, රහදමොගය්හ [රහදොග්ගය්හ (ක.)] තිට්ඨති.

116. ‘‘තමෙනං කිමයො තත්ථ, අතිකායා අයොමුඛා;

ඡවිං භෙත්වාන [ඡෙත්වාන (සී. පී.)] ඛාදන්ති, සංගිද්ධා [පගිද්ධා (සී. ස්‍යා. පී.)] මංසලොහිතෙ.

117. ‘‘සො ච තං නිරයං පත්තො, නිමුග්ගො සතපොරිසං;

පූතිකං කුණපං වාති, සමන්තා සතයොජනං.

118. ‘‘චක්ඛුමාපි හි චක්ඛූහි, තෙන ගන්ධෙන ජීයති;

එතාදිසං බ්‍රහ්මදත්ත, මාතුඝො ලභතෙ දුඛං.

119. ‘‘ඛුරධාරමනුක්කම්ම, තික්ඛං දුරභිසම්භවං;

පතන්ති ගබ්භපාතියො [ගබ්භපාතිනියො (සී. ස්‍යා. පී.)], දුග්ගං වෙතරණිං [වෙත්තරණිං (ස්‍යා. ක.)] නදිං.

120. ‘‘අයොමයා සිම්බලියො, සොළසඞ්ගුලකණ්ටකා;

උභතො අභිලම්බන්ති, දුග්ගං වෙතරණිං [වෙත්තරණිං (ස්‍යා. ක.)] නදිං.

121. ‘‘තෙ අච්චිමන්තො තිට්ඨන්ති, අග්ගික්ඛන්ධාව ආරකා;

ආදිත්තා ජාතවෙදෙන, උද්ධං යොජනමුග්ගතා.

122. ‘‘එතෙ වජන්ති [සජන්ති (සී. පී.), පජ්ජන්ති (ස්‍යා.)] නිරයෙ, තත්තෙ තිඛිණකණ්ටකෙ;

නාරියො ච අතිචාරා [අතිචාරිනියො (සී. ස්‍යා. පී.)], නරා ච පරදාරගූ.

123. ‘‘තෙ පතන්ති අධොක්ඛන්ධා, විවත්තා විහතා පුථූ;

සයන්ති විනිවිද්ධඞ්ගා, දීඝං ජග්ගන්ති සබ්බදා [සංවරිං (සී. පී.)].

124. ‘‘තතො රත්‍යා විවසානෙ [විවසනෙ (සී. ස්‍යා. පී.)], මහතිං පබ්බතූපමං;

ලොහකුම්භිං පවජ්ජන්ති, තත්තං අග්ගිසමූදකං.

125. ‘‘එවං දිවා ච රත්තො ච, දුස්සීලා මොහපාරුතා;

අනුභොන්ති සකං කම්මං, පුබ්බෙ දුක්කටමත්තනො.

126. ‘‘යා ච භරියා ධනක්කීතා, සාමිකං අතිමඤ්ඤති;

සස්සුං වා සසුරං වාපි, ජෙට්ඨං වාපි නනන්දරං [නනන්දනං (ස්‍යා. ක.)].

127. ‘‘තස්සා වඞ්කෙන ජිව්හග්ගං, නිබ්බහන්ති සබන්ධනං;

ස බ්‍යාමමත්තං කිමිනං, ජිව්හං පස්සති අත්තනි [අත්තනො (සී. ස්‍යා.)];

විඤ්ඤාපෙතුං න සක්කොති, තාපනෙ පෙච්ච පච්චති.

128. ‘‘ඔරබ්භිකා සූකරිකා, මච්ඡිකා මිගබන්ධකා;

චොරා ගොඝාතකා ලුද්දා, අවණ්ණෙ වණ්ණකාරකා.

129. ‘‘සත්තීහි ලොහකූටෙහි, නෙත්තිංසෙහි උසූහි ච;

හඤ්ඤමානා ඛාරනදිං, පපතන්ති [සම්පතන්ති (ක.)] අවංසිරා.

130. ‘‘සායං පාතො කූටකාරී, අයොකූටෙහි හඤ්ඤති;

තතො වන්තං දුරත්තානං, පරෙසං භුඤ්ජරෙ [භුඤ්ජතෙ (සී. ස්‍යා. පී.)] සදා.

131. ‘‘ධඞ්කා භෙරණ්ඩකා [භෙදණ්ඩකා (ක.)] ගිජ්ඣා, කාකොළා ච අයොමුඛා;

විප්ඵන්දමානං ඛාදන්ති, නරං කිබ්බිසකාරකං [කිබ්බිසකාරිනං (පී.)].

132. ‘‘යෙ මිගෙන මිගං හන්ති, පක්ඛිං වා පන පක්ඛිනා;

අසන්තො රජසා ඡන්නා, ගන්තා [ගතා (ක.)] තෙ නිරයුස්සදං [නිරයං අධො (පී.)].

133. ‘‘සන්තො ච [සන්තොව (ස්‍යා.)] උද්ධං ගච්ඡන්ති, සුචිණ්ණෙනිධ කම්මුනා;

සුචිණ්ණස්ස ඵලං පස්ස, සඉන්දා [සහින්දා (සී.)] දෙවා සබ්‍රහ්මකා.

134. ‘‘තං තං බ්‍රූමි මහාරාජ, ධම්මං රට්ඨපතී චර;

තථා [තථා තථා (සී. ස්‍යා. පී.)] රාජ චරාහි ධම්මං, යථා තං සුචිණ්ණං නානුතප්පෙය්‍ය පච්ඡා’’ති.

සංකිච්චජාතකං දුතියං.

සට්ඨිනිපාතං නිට්ඨිතං.