496. භික්ඛාපරම්පරජාතකං (13)

270. සුඛුමාලරූපං දිස්වා [දිස්වාන (ක. සී. අට්ඨ.)], රට්ඨා විවනමාගතං;

කූටාගාරවරූපෙතං, මහාසයනමුපාසිතං [මුපොචිතං (බහූසු)].

271. තස්ස තෙ පෙමකෙනාහං, අදාසිං වඩ්ඪමොදනං [බද්ධමොදනං (සී. පී.)];

සාලීනං විචිතං භත්තං, සුචිං මංසූපසෙචනං.

272. තං ත්වං භත්තං පටිග්ගය්හ, බ්‍රාහ්මණස්ස අදාසයි [අදාපයි (සී. ස්‍යා. පී.)];

අත්තානං [අත්තනා (පී. අට්ඨ. පාඨන්තරං)] අනසිත්වාන, කොයං ධම්මො නමත්ථු තෙ.

273. ආචරියො බ්‍රාහ්මණො මය්හං, කිච්චාකිච්චෙසු බ්‍යාවටො [වාවටො (ක.)];

ගරු ච ආමන්තනීයො [ආමන්තණීයො (සී. පී.)] ච, දාතුමරහාමි භොජනං.

274. බ්‍රාහ්මණං දානි පුච්ඡාමි, ගොතමං රාජපූජිතං;

රාජා තෙ භත්තං පාදාසි, සුචිං මංසූපසෙචනං.

275. තං ත්වං භත්තං පටිග්ගය්හ, ඉසිස්ස භොජනං අදා;

අඛෙත්තඤ්ඤූසි දානස්ස, කොයං ධම්මො නමත්ථු තෙ.

276. භරාමි පුත්ත [පුත්තෙ (සී. පී.)] දාරෙ ච, ඝරෙසු ගධිතො [ගථිතො (සී. පී.)] අහං;

භුඤ්ජෙ මානුසකෙ කාමෙ, අනුසාසාමි රාජිනො.

277. ආරඤ්ඤිකස්ස [ආරඤ්ඤකස්ස (සී. පී.)] ඉසිනො, චිරරත්තං තපස්සිනො;

වුඩ්ඪස්ස භාවිතත්තස්ස, දාතුමරහාමි භොජනං.

278. ඉසිඤ්ච දානි පුච්ඡාමි, කිසං ධමනිසන්ථතං;

පරූළ්හකච්ඡනඛලොමං, පඞ්කදන්තං රජස්සිරං.

279. එකො අරඤ්ඤෙ විහරසි [විහාසි (ක.)], නාවකඞ්ඛසි ජීවිතං;

භික්ඛු කෙන තයා සෙය්‍යො, යස්ස ත්වං භොජනං අදා.

280. ඛණන්තාලුකලම්බානි [ඛණමාලුකලම්බානි (ස්‍යා. ක.)], බිලාලිතක්කලානි ච [බිළාලිතක්කළානි ච (සී. පී.)];

ධුනං සාමාකනීවාරං, සඞ්ඝාරියං පසාරියං [සංහාරියං පහාරියං (ස්‍යා.), සංසාරියං පසාරියං (ක.)].

281. සාකං භිසං මධුං මංසං, බදරාමලකානි ච;

තානි ආහරිත්වා [ආහත්ව (සී. ස්‍යා.)] භුඤ්ජාමි, අත්ථි මෙ සො පරිග්ගහො.

282. පචන්තො අපචන්තස්ස, අමමස්ස සකිඤ්චනො [අකිඤ්චනො (ක.)];

අනාදානස්ස සාදානො, දාතුමරහාමි භොජනං.

283. භික්ඛුඤ්ච දානි පුච්ඡාමි, තුණ්හීමාසීන සුබ්බතං;

ඉසි තෙ භත්තං පාදාසි, සුචිං මංසූපසෙචනං.

284. තං ත්වං භත්තං පටිග්ගය්හ, තුණ්හී භුඤ්ජසි එකකො;

නාඤ්ඤං කඤ්චි [කිඤ්චි (ක.)] නිමන්තෙසි, කොයං ධම්මො නමත්ථු තෙ.

285. න පචාමි න පාචෙමි, න ඡින්දාමි න ඡෙදයෙ;

තං මං අකිඤ්චනං ඤත්වා, සබ්බපාපෙහි ආරතං.

286. වාමෙන භික්ඛමාදාය, දක්ඛිණෙන කමණ්ඩලුං;

ඉසි මෙ භත්තං පාදාසි, සුචිං මංසූපසෙචනං.

287. එතෙ හි දාතුමරහන්ති, සමමා සපරිග්ගහා;

පච්චනීකමහං මඤ්ඤෙ, යො දාතාරං නිමන්තයෙ.

288. අත්ථාය වත මෙ අජ්ජ, ඉධාගච්ඡි රථෙසභො;

සොහං අජ්ජ පජානාමි [ඉතො පුබ්බෙ න ජානාමි (සී. පී.)], යත්ථ දින්නං මහප්ඵලං.

289. රට්ඨෙසු ගිද්ධා රාජානො, කිච්චාකිච්චෙසු බ්‍රාහ්මණා;

ඉසී මූලඵලෙ ගිද්ධා, විප්පමුත්තා ච භික්ඛවොති.

භික්ඛාපරම්පරජාතකං තෙරසමං.

තස්සුද්දානං –

සුව කින්නර මුක්ක ඛරාජිනසො, භිසජාත මහෙසි කපොතවරො;

අථ මොර සතච්ඡක වාණිජකො, අථ රාජ සබ්‍රාහ්මණ භික්ඛපරන්ති.

පකිණ්ණකනිපාතං නිට්ඨිතං.