495. දසබ්‍රාහ්මණජාතකං (12)

222. රාජා අවොච විධුරං, ධම්මකාමො යුධිට්ඨිලො;

බ්‍රාහ්මණෙ විධුර පරියෙස, සීලවන්තෙ බහුස්සුතෙ.

223. විරතෙ මෙථුනා ධම්මා, යෙ මෙ භුඤ්ජෙය්‍යු [භුඤ්ජෙය්‍යුං (සී.)] භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

224. දුල්ලභා බ්‍රාහ්මණා දෙව, සීලවන්තො බහුස්සුතා;

විරතා මෙථුනා ධම්මා, යෙ තෙ භුඤ්ජෙය්‍යු භොජනං.

225. දස ඛලු මහාරාජ, යා තා බ්‍රාහ්මණජාතියො;

තෙසං විභඞ්ගං විචයං [විචිය (ක.)], විත්ථාරෙන සුණොහි මෙ.

226. පසිබ්බකෙ ගහෙත්වාන, පුණ්ණෙ මූලස්ස සංවුතෙ;

ඔසධිකායො [ඔසධිකායෙ (ස්‍යා. ක.)] ගන්ථෙන්ති, න්හාපයන්ති [නහායන්ති (සී. පී.)] ජපන්ති ච.

227. තිකිච්ඡකසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

228. අපෙතා තෙ ච [තෙ (සී. පී.)] බ්‍රහ්මඤ්ඤා,

(ඉති රාජා [රාජා ච (ස්‍යා. ක.)] කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

229. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

230. කිඞ්කිණිකායො [කිඞ්කණිකායො (ක.), කිඞ්කිණියො (ස්‍යා.)] ගහෙත්වා [ගහෙත්වාන (සී. ස්‍යා. පී.)], ඝොසෙන්ති පුරතොපි තෙ;

පෙසනානිපි ගච්ඡන්ති, රථචරියාසු සික්ඛරෙ.

231. පරිචාරකසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

232. අපෙතා තෙ ච බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

233. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

234. කමණ්ඩලුං ගහෙත්වාන, වඞ්කදණ්ඩඤ්ච බ්‍රාහ්මණා;

පච්චුපෙස්සන්ති රාජානො, ගාමෙසු නිගමෙසු ච;

නාදින්නෙ වුට්ඨහිස්සාම, ගාමම්හි වා වනම්හි වා [වාමම්හි ච වනම්හි ච (සී. පී.), ගාමම්හි නිගමම්හි වා (ස්‍යා.)].

235. නිග්ගාහකසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

236. අපෙතා තෙ ච බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

237. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

238. පරූළ්හකච්ඡනඛලොමා, පඞ්කදන්තා රජස්සිරා;

ඔකිණ්ණා රජරෙණූහි, යාචකා විචරන්ති තෙ.

239. ඛාණුඝාතසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

240. අපෙතා තෙ ච බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

241. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

242. හරීතකං [හරීටකං (බහූසු)] ආමලකං, අම්බං ජම්බුං විභීතකං [අම්බජම්බුවිභීටකං (සී. පී.)];

ලබුජං දන්තපොණානි, බෙලුවා බදරානි ච.

243. රාජායතනං උච්ඡු-පුටං, ධූමනෙත්තං මධු-අඤ්ජනං;

උච්චාවචානි පණියානි, විපණෙන්ති ජනාධිප.

244. වාණිජකසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

245. අපෙතා තෙ ච බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

246. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

247. කසි-වාණිජ්ජං [කසිං වණිජ්ජං (සී. පී.)] කාරෙන්ති, පොසයන්ති අජෙළකෙ;

කුමාරියො පවෙච්ඡන්ති, විවාහන්තාවහන්ති ච.

248. සමා අම්බට්ඨවෙස්සෙහි, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

249. අපෙතා තෙ ච බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

250. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

251. නික්ඛිත්තභික්ඛං භුඤ්ජන්ති, ගාමෙස්වෙකෙ පුරොහිතා;

බහූ තෙ [නෙ (ස්‍යා. ක.)] පරිපුච්ඡන්ති, අණ්ඩච්ඡෙදා නිලඤ්ඡකා [තිලඤ්ඡකා (පී.)].

252. පසූපි තත්ථ හඤ්ඤන්ති, මහිංසා සූකරා අජා;

ගොඝාතකසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

253. අපෙතා තෙ බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

254. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

255. අසිචම්මං ගහෙත්වාන, ඛග්ගං පග්ගය්හ බ්‍රාහ්මණා;

වෙස්සපථෙසු තිට්ඨන්ති, සත්ථං අබ්බාහයන්තිපි.

256. සමා ගොපනිසාදෙහි, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

257. අපෙතා තෙ බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

258. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

259. අරඤ්ඤෙ කුටිකං කත්වා, කූටානි කාරයන්ති තෙ;

සසබිළාරෙ බාධෙන්ති, ආගොධා මච්ඡකච්ඡපං.

260. තෙ ලුද්දකසමා රාජ [ලුද්දකා තෙ මහාරාජ (සී. පී.)], තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

261. අපෙතා තෙ බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

262. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

263. අඤ්ඤෙ ධනස්ස කාමා හි, හෙට්ඨාමඤ්චෙ පසක්කිතා [පසක්ඛිතා (සී. ස්‍යා. පී.)];

රාජානො උපරි න්හායන්ති, සොමයාගෙ උපට්ඨිතෙ.

264. මලමජ්ජකසමා රාජ, තෙපි වුච්චන්ති බ්‍රාහ්මණා;

අක්ඛාතා තෙ මහාරාජ, තාදිසෙ නිපතාමසෙ.

265. අපෙතා තෙ බ්‍රහ්මඤ්ඤා,

(ඉති රාජා කොරබ්‍යො)

න තෙ වුච්චන්ති බ්‍රාහ්මණා;

අඤ්ඤෙ විධුර පරියෙස, සීලවන්තෙ බහුස්සුතෙ.

266. විරතෙ මෙථුනා ධම්මා, යෙ මෙ භුඤ්ජෙය්‍යු භොජනං;

දක්ඛිණං සම්ම දස්සාම, යත්ථ දින්නං මහප්ඵලං.

267. අත්ථි ඛො බ්‍රාහ්මණා දෙව, සීලවන්තො බහුස්සුතා;

විරතා මෙථුනා ධම්මා, යෙ තෙ භුඤ්ජෙය්‍යු භොජනං.

268. එකඤ්ච භත්තං භුඤ්ජන්ති, න ච මජ්ජං පිවන්ති තෙ;

අක්ඛාතා තෙ මහාරාජ, තාදිසෙ නිපතාමසෙ.

269. එතෙ ඛො බ්‍රාහ්මණා විධුර, සීලවන්තො බහුස්සුතා;

එතෙ විධුර පරියෙස, ඛිප්පඤ්ච නෙ [ඛිප්පංව නෙ (ක.)] නිමන්තයාති.

දසබ්‍රාහ්මණජාතකං ද්වාදසමං.