494. සාධිනජාතකං (11)

202. අබ්භුතො වත ලොකස්මිං, උප්පජ්ජි ලොමහංසනො;

දිබ්බො රථො පාතුරහු, වෙදෙහස්ස යසස්සිනො.

203. දෙවපුත්තො මහිද්ධිකො, මාතලි [මාතලී (සී.)] දෙවසාරථි;

නිමන්තයිත්ථ රාජානං, වෙදෙහං මිථිලග්ගහං.

204. එහිමං රථමාරුය්හ, රාජසෙට්ඨ දිසම්පති;

දෙවා දස්සනකාමා තෙ, තාවතිංසා සඉන්දකා;

සරමානා හි තෙ දෙවා, සුධම්මායං සමච්ඡරෙ.

205. තතො ච රාජා සාධිනො [සාධීනො (සී. පී.)], වෙදෙහො මිථිලග්ගහො [පමුඛො රථමාරුහි (සී. පී.)];

සහස්සයුත්තමාරුය්හ [යුත්තං අභිරුය්හ (සී.)], අගා දෙවාන සන්තිකෙ;

තං දෙවා පටිනන්දිංසු, දිස්වා රාජානමාගතං.

206. ස්වාගතං තෙ මහාරාජ, අථො තෙ අදුරාගතං;

නිසීද දානි රාජීසි [රාජිසි (සී. ස්‍යා. පී.)], දෙවරාජස්ස සන්තිකෙ.

207. සක්කොපි පටිනන්දිත්ථ, වෙදෙහං මිථිලග්ගහං;

නිමන්තයිත්ථ [නිමන්තයී ච (සී. පී.)] කාමෙහි, ආසනෙන ච වාසවො.

208. සාධු ඛොසි අනුප්පත්තො, ආවාසං වසවත්තිනං;

වස දෙවෙසු රාජීසි, සබ්බකාමසමිද්ධිසු;

තාවතිංසෙසු දෙවෙසු, භුඤ්ජ කාමෙ අමානුසෙ.

209. අහං පුරෙ සග්ගගතො රමාමි, නච්චෙහි ගීතෙහි ච වාදිතෙහි;

සො දානි අජ්ජ න රමාමි සග්ගෙ, ආයුං නු ඛීණො [ඛීණං (ස්‍යා.)] මරණං නු සන්තිකෙ;

උදාහු මූළ්හොස්මි ජනින්දසෙට්ඨ.

210. න තායු [න චායු (සී. පී. ක.)] ඛීණං මරණඤ්ච [මරණං තෙ (සී. පී.)] දූරෙ, න චාපි මූළ්හො නරවීරසෙට්ඨ;

තුය්හඤ්ච [තවඤ්ච (සී. පී.), තව ච (ක.)] පුඤ්ඤානි පරිත්තකානි, යෙසං විපාකං ඉධ වෙදයිත්ථො [වෙදයතො (පී. ක.)].

211. වස දෙවානුභාවෙන, රාජසෙට්ඨ දිසම්පති;

තාවතිංසෙසු දෙවෙසු, භුඤ්ජ කාමෙ අමානුසෙ.

212. යථා යාචිතකං යානං, යථා යාචිතකං ධනං;

එවං සම්පදමෙවෙතං, යං පරතො දානපච්චයා.

213. න චාහමෙතමිච්ඡාමි, යං පරතො දානපච්චයා;

සයංකතානි පුඤ්ඤානි, තං මෙ ආවෙණිකං [ආවෙණියං (සී. ස්‍යා. පී.), ආවෙනිකං (ක.)] ධනං.

214. සොහං ගන්ත්වා මනුස්සෙසු, කාහාමි කුසලං බහුං;

දානෙන සමචරියාය, සංයමෙන දමෙන ච;

යං කත්වා සුඛිතො හොති, න ච පච්ඡානුතප්පති.

215. ඉමානි තානි ඛෙත්තානි, ඉමං නික්ඛං සුකුණ්ඩලං;

ඉමා තා හරිතානූපා, ඉමා නජ්ජො සවන්තියො.

216. ඉමා තා පොක්ඛරණී රම්මා, චක්කවාකපකූජිතා [චක්කවාකූපකූජිතා (සී. පී.)];

මන්දාලකෙහි සඤ්ඡන්නා, පදුමුප්පලකෙහි ච;

යස්සිමානි මමායිංසු, කිං නු තෙ දිසතං ගතා.

217. තානීධ ඛෙත්තානි සො භූමිභාගො, තෙයෙව ආරාමවනුපචාරා [තෙ ආරාමා තෙ වන’මෙ පචාරා (සී. පී.), තෙ යෙව ආරාමවනානි සඤ්චරා (ක.)];

තමෙව මය්හං ජනතං අපස්සතො, සුඤ්ඤංව මෙ නාරද ඛායතෙ දිසා.

218. දිට්ඨා මයා විමානානි, ඔභාසෙන්තා චතුද්දිසා;

සම්මුඛා දෙවරාජස්ස, තිදසානඤ්ච සම්මුඛා.

219. වුත්ථං මෙ භවනං දිබ්‍යං [දිබ්බං (සී. පී.)], භුත්තා කාමා අමානුසා;

තාවතිංසෙසු දෙවෙසු, සබ්බකාමසමිද්ධිසු.

220. සොහං එතාදිසං හිත්වා, පුඤ්ඤායම්හි ඉධාගතො;

ධම්මමෙව චරිස්සාමි, නාහං රජ්ජෙන අත්ථිකො.

221. අදණ්ඩාවචරං මග්ගං, සම්මාසම්බුද්ධදෙසිතං;

තං මග්ගං පටිපජ්ජිස්සං, යෙන ගච්ඡන්ති සුබ්බතාති.

සාධිනජාතකං [සාධිනරාජජාතකං (ස්‍යා.)] එකාදසමං.