493. මහාවාණිජජාතකං (10)

180. වාණිජා සමිතිං කත්වා, නානාරට්ඨතො ආගතා;

ධනාහරා පක්කමිංසු, එකං කත්වාන ගාමණිං.

181. තෙ තං කන්තාරමාගම්ම, අප්පභක්ඛං අනොදකං;

මහානිග්‍රොධමද්දක්ඛුං, සීතච්ඡායං මනොරමං.

182. තෙ ච තත්ථ නිසීදිත්වා, තස්ස රුක්ඛස්ස ඡායයා [ඡාදියා (සී. ස්‍යා. පී.)];

වාණිජා සමචින්තෙසුං, බාලා මොහෙන පාරුතා.

183. අල්ලායතෙ [අද්දායතෙ (සී. පී.)] අයං රුක්ඛො, අපි වාරීව [වාරි ච (සී. පී.)] සන්දති;

ඉඞ්ඝස්ස පුරිමං සාඛං, මයං ඡින්දාම වාණිජා.

184. සා ච ඡින්නාව පග්ඝරි, අච්ඡං වාරිං අනාවිලං;

තෙ තත්ථ න්හත්වා පිවිත්වා, යාවතිච්ඡිංසු වාණිජා.

185. දුතියං සමචින්තෙසුං, බාලා මොහෙන පාරුතා;

ඉඞ්ඝස්ස දක්ඛිණං සාඛං, මයං ඡින්දාම වාණිජා.

186. සා ච ඡින්නාව පග්ඝරි, සාලිමංසොදනං බහුං;

අප්පොදවණ්ණෙ කුම්මාසෙ, සිඞ්ගිං විදලසූපියො [සිඞ්ගිං බිදලසූපියො (සී. පී.), සිඞ්ගීවෙරං ලසූපියො (ක.) සිඞ්ගීන්ති සිඞ්ගීවෙරාදිකං උත්තරිභඞ්ගං; විදලසූපියොති මුග්ගසූපාදයො (අට්ඨ.) විදලං කලායාදිම්හි වත්තතීති සක්කතාභිධානෙ].

187. තෙ තත්ථ භුත්වා ඛාදිත්වා [භුත්වා ච පිවිත්වා ච (පී.)], යාවතිච්ඡිංසු වාණිජා;

තතියං සමචින්තෙසුං, බාලා මොහෙන පාරුතා;

ඉඞ්ඝස්ස පච්ඡිමං සාඛං, මයං ඡින්දාම වාණිජා.

188. සා ච ඡින්නාව පග්ඝරි, නාරියො සමලඞ්කතා;

විචිත්‍රවත්ථාභරණා, ආමුත්තමණිකුණ්ඩලා.

189. අපි සු වාණිජා එකා, නාරියො පණ්ණවීසති;

සමන්තා පරිවාරිංසු [පරිකරිංසු (සී. ස්‍යා. පී.)], තස්ස රුක්ඛස්ස ඡායයා [ඡාදියා (සී. ස්‍යා. පී.)].

190. තෙ තාහි පරිචාරෙත්වා [පරිවාරෙත්වා (සී. ස්‍යා. පී.)], යාවතිච්ඡිංසු වාණිජා;

චතුත්ථං සමචින්තෙසුං, බාලා මොහෙන පාරුතා;

ඉඞ්ඝස්ස උත්තරං සාඛං, මයං ඡින්දාම වාණිජා.

191. සා ච ඡින්නාව පග්ඝරි, මුත්තා වෙළුරියා බහූ;

රජතං ජාතරූපඤ්ච, කුත්තියො පටියානි ච.

192. කාසිකානි ච වත්ථානි, උද්දියානි ච කම්බලා [උද්දියානෙ ච කම්බලෙ (සී. පී.)];

තෙ තත්ථ භාරෙ බන්ධිත්වා, යාවතිච්ඡිංසු වාණිජා.

193. පඤ්චමං සමචින්තෙසුං, බාලා මොහෙන පාරුතා;

ඉඞ්ඝස්ස මූලෙ [මූලං (සී. පී. ක.)] ඡින්දාම, අපි භිය්‍යො ලභාමසෙ.

194. අථුට්ඨහි සත්ථවාහො, යාචමානො කතඤ්ජලී;

නිග්‍රොධො කිං පරජ්ඣති [අපරජ්ඣථ (සී.), අපරජ්ඣති (ස්‍යා. පී.)], වාණිජා භද්දමත්ථු තෙ.

195. වාරිදා පුරිමා සාඛා, අන්නපානඤ්ච දක්ඛිණා;

නාරිදා පච්ඡිමා සාඛා, සබ්බකාමෙ ච උත්තරා;

නිග්‍රොධො කිං පරජ්ඣති, වාණිජා භද්දමත්ථු තෙ.

196. යස්ස රුක්ඛස්ස ඡායාය, නිසීදෙය්‍ය සයෙය්‍ය වා;

න තස්ස සාඛං භඤ්ජෙය්‍ය, මිත්තදුබ්භො හි පාපකො.

197. තෙ ච තස්සානාදියිත්වා [තස්ස අනාදිත්වා (සී. ස්‍යා.)], එකස්ස වචනං බහූ;

නිසිතාහි කුඨාරීහි [කුධාරීහි (ක.)], මූලතො නං උපක්කමුං.

198. තතො නාගා නික්ඛමිංසු, සන්නද්ධා පණ්ණවීසති;

ධනුග්ගහානං තිසතා, ඡසහස්සා ච වම්මිනො.

199. එතෙ හනථ බන්ධථ, මා වො මුඤ්චිත්ථ [මුච්චිත්ථ (පී.)] ජීවිතං;

ඨපෙත්වා සත්ථවාහංව, සබ්බෙ භස්මං [භස්මී (සී.)] කරොථ නෙ.

200. තස්මා හි පණ්ඩිතො පොසො, සම්පස්සං අත්ථමත්තනො;

ලොභස්ස න වසං ගච්ඡෙ, හනෙය්‍යාරිසකං [හනෙය්‍ය දිසතං (සී.), හනෙය්‍ය දිසකං (ස්‍යා.)] මනං.

201. එව [එත (සී. පී.)] මාදීනවං ඤත්වා, තණ්හා දුක්ඛස්ස සම්භවං;

වීතතණ්හො අනාදානො, සතො භික්ඛු පරිබ්බජෙති.

මහාවාණිජජාතකං දසමං.