492. තච්ඡසූකරජාතකං (9)

160. යදෙසමානා විචරිම්හ, පබ්බතානි වනානි ච;

අන්වෙසං විචරිං [විපුලෙ (ස්‍යා. ක.)] ඤාතී, තෙමෙ අධිගතා මයා.

161. බහුඤ්චිදං මූලඵලං, භක්ඛො චායං අනප්පකො;

රම්මා චිමා ගිරීනජ්ජො [ගිරිනදියො (සී. පී.)], ඵාසුවාසො භවිස්සති.

162. ඉධෙවාහං වසිස්සාමි, සහ සබ්බෙහි ඤාතිභි;

අප්පොස්සුක්කො නිරාසඞ්කී, අසොකො අකුතොභයො.

163. අඤ්ඤම්පි [අඤ්ඤං හි (සී. පී.)] ලෙණං පරියෙස, සත්තු නො ඉධ විජ්ජති;

සො තච්ඡ සූකරෙ හන්ති, ඉධාගන්ත්වා වරං වරං.

164. කො නුම්හාකං [කො නම්හාකං (සී. පී.)] ඉධ සත්තු, කො ඤාතී සුසමාගතෙ;

දුප්පධංසෙ [අප්පධංසෙ (සී. පී.)] පධංසෙති, තං මෙ අක්ඛාථ පුච්ඡිතා.

165. උද්ධග්ගරාජී මිගරාජා, බලී දාඨාවුධො මිගො;

සො තච්ඡ සූකරෙ හන්ති, ඉධාගන්ත්වා වරං වරං.

166. න නො දාඨා න විජ්ජන්ති [නු විජ්ජන්ති (ක.)], බලං කායෙ සමොහිතං;

සබ්බෙ සමග්ගා හුත්වාන, වසං කාහාම එකකං.

167. හදයඞ්ගමං කණ්ණසුඛං, වාචං භාසසි තච්ඡක;

යොපි යුද්ධෙ පලායෙය්‍ය, තම්පි පච්ඡා හනාමසෙ.

168. පාණාතිපාතා විරතො නු අජ්ජ, අභයං නු තෙ සබ්බභූතෙසු දින්නං;

දාඨා නු තෙ මිගවධාය [මිග විරියං (සී. ස්‍යා. පී.)] න සන්ති, යො සඞ්ඝපත්තො කපණොව ඣායසි.

169. න මෙ දාඨා න විජ්ජන්ති, බලං කායෙ සමොහිතං;

ඤාතී ච දිස්වාන සාමග්ගී එකතො, තස්මා ච ඣායාමි වනම්හි එකකො.

170. ඉමස්සුදං යන්ති දිසොදිසං පුරෙ, භයට්ටිතා ලෙණගවෙසිනො පුථු;

තෙ දානි සඞ්ගම්ම වසන්ති එකතො, යත්ථට්ඨිතා දුප්පසහජ්ජ තෙ මයා.

171. පරිණායකසම්පන්නා, සහිතා එකවාදිනො;

තෙ මං සමග්ගා හිංසෙය්‍යුං, තස්මා නෙසං න පත්ථයෙ [අපත්ථවෙ (පී.)].

172. එකොව ඉන්දො අසුරෙ ජිනාති, එකොව සෙනො හන්ති දිජෙ පසය්හ;

එකොව බ්‍යග්ඝො මිගසඞ්ඝපත්තො, වරං වරං හන්ති බලඤ්හි තාදිසං.

173. න හෙව ඉන්දො න සෙනො, නපි බ්‍යග්ඝො මිගාධිපො;

සමග්ගෙ සහිතෙ ඤාතී, න බ්‍යග්ඝෙ [බ්‍යග්ඝෙ ච (සී. පී.), බ්‍යග්ඝො න (ස්‍යා.)] කුරුතෙ වසෙ.

174. කුම්භීලකා සකුණකා, සඞ්ඝිනො ගණචාරිනො;

සම්මොදමානා එකජ්ඣං, උප්පතන්ති ඩයන්ති ච.

175. තෙසඤ්ච ඩයමානානං, එකෙත්ථ අපසක්කති [අපවත්තති (සී. පී.)];

තඤ්ච සෙනො නිතාළෙති, වෙය්‍යග්ඝියෙව සා ගති.

176. උස්සාහිතො ජටිලෙන, ලුද්දෙනාමිසචක්ඛුනා;

දාඨී දාඨීසු පක්ඛන්දි, මඤ්ඤමානො යථා පුරෙ.

177. සාධු සම්බහුලා ඤාතී, අපි රුක්ඛා අරඤ්ඤජා;

සූකරෙහි සමග්ගෙහි, බ්‍යග්ඝො එකායනෙ හතො.

178. බ්‍රාහ්මණඤ්චෙව බ්‍යග්ඝඤ්ච, උභො හන්ත්වාන සූකරා.

ආනන්දිනො පමුදිතා, මහානාදං පනාදිසුං.

179. තෙ සු උදුම්බරමූලස්මිං, සූකරා සුසමාගතා;

තච්ඡකං අභිසිඤ්චිංසු, ‘‘ත්වං නො රාජාසි ඉස්සරො’’ති.

තච්ඡසූකරජාතකං නවමං.