491. මහාමොරජාතකං (8)
143. සචෙ හි ත්‍යාහං ධනහෙතු ගාහිතො, මා මං වධී ජීවගාහං ගහෙත්වා;
රඤ්ඤො ච [රඤ්ඤොව (සී. පී.)] මං සම්ම උපන්තිකං [උපන්ති (සී. ස්‍යා. පී.)] නෙහි, මඤ්ඤෙ ධනං ලච්ඡසිනප්පරූපං.
144. න මෙ අයං තුය්හ වධාය අජ්ජ, සමාහිතො චාපධුරෙ [චාපවරෙ (සී. පී.), චාපවරො (ස්‍යා.)] ඛුරප්පො;
පාසඤ්ච ත්‍යාහං අධිපාතයිස්සං, යථාසුඛං ගච්ඡතු මොරරාජා.
145. යං සත්ත වස්සානි මමානුබන්ධි, රත්තින්දිවං ඛුප්පිපාසං සහන්තො;
අථ කිස්ස මං පාසවසූපනීතං, පමුත්තවෙ ඉච්ඡසි බන්ධනස්මා.
146. පාණාතිපාතා විරතො නුසජ්ජ, අභයං නු තෙ සබ්බභූතෙසු දින්නං;
යං මං තුවං පාසවසූපනීතං, පමුත්තවෙ ඉච්ඡසි බන්ධනස්මා.
147. පාණාතිපාතා විරතස්ස බ්‍රූහි, අභයඤ්ච යො සබ්බභූතෙසු දෙති;
පුච්ඡාමි තං මොරරාජෙතමත්ථං, ඉතො චුතො කිං ලභතෙ සුඛං සො.
148. පාණාතිපාතා විරතස්ස බ්‍රූමි, අභයඤ්ච යො සබ්බභූතෙසු දෙති;
දිට්ඨෙව ධම්මෙ ලභතෙ පසංසං, සග්ගඤ්ච සො යාති සරීරභෙදා.
149. න සන්ති දෙවා ඉති ආහු [ඉච්චාහු (සී. පී.)] එකෙ, ඉධෙව ජීවො විභවං උපෙති;
තථා ඵලං සුකතදුක්කටානං, දත්තුපඤ්ඤත්තඤ්ච වදන්ති දානං;
තෙසං වචො අරහතං සද්දහානො, තස්මා අහං සකුණෙ බාධයාමි.
150. චන්දො ච සුරියො ච උභො සුදස්සනා, ගච්ඡන්ති ඔභාසයමන්තලික්ඛෙ;
ඉමස්ස ලොකස්ස පරස්ස වා තෙ, කථං නු තෙ ආහු මනුස්සලොකෙ.
151. චන්දො ච සුරියො ච උභො සුදස්සනා, ගච්ඡන්ති ඔභාසයමන්තලික්ඛෙ;
පරස්ස ලොකස්ස න තෙ ඉමස්ස, දෙවාති තෙ ආහු මනුස්සලොකෙ.
152. එත්ථෙව තෙ නීහතා හීනවාදා, අහෙතුකා යෙ න වදන්ති කම්මං;
තථා ඵලං සුකතදුක්කටානං, දත්තුපඤ්ඤත්තං යෙ ච වදන්ති දානං.
153. අද්ධා හි සච්චං වචනං තවෙදං [තවෙතං (සී. ස්‍යා. පී.)], කථඤ්හි දානං අඵලං භවෙය්‍ය [වදෙය්‍ය (සී. පී.)];
තථා ඵලං සුකතදුක්කටානං, දත්තුපඤ්ඤත්තඤ්ච කථං භවෙය්‍ය.
154. කථංකරො කින්තිකරො කිමාචරං, කිං සෙවමානො කෙන තපොගුණෙන;
අක්ඛාහි [අක්ඛාහි තං දානි (ක.)] මෙ මොරරාජෙතමත්ථං, යථා අහං නො නිරයං පතෙය්‍යං.
155. යෙ කෙචි අත්ථි සමණා පථබ්‍යා, කාසායවත්ථා අනගාරියා තෙ;
පාතොව පිණ්ඩාය චරන්ති කාලෙ, විකාලචරියා විරතා හි සන්තො.
156. තෙ තත්ථ කාලෙනුපසඞ්කමිත්වා, පුච්ඡාහි යං තෙ මනසො පියං සියා;
තෙ තෙ පවක්ඛන්ති යථාපජානං, ඉමස්ස ලොකස්ස පරස්ස චත්ථං.
157. තචංව ජිණ්ණං උරගො පුරාණං, පණ්ඩූපලාසං හරිතො දුමොව;
එසප්පහීනො මම ලුද්දභාවො, ජහාමහං ලුද්දකභාවමජ්ජ.
158. යෙ චාපි මෙ සකුණා අත්ථි බද්ධා, සතානිනෙකානි නිවෙසනස්මිං;
තෙසම්පහං [තෙසං අහං (ස්‍යා. ක.)] ජීවිතමජ්ජ දම්මි, මොක්ඛඤ්ච තෙ පත්තා [පත්තො (සී.), අච්ඡ (ස්‍යා.)] සකං නිකෙතං.
159. ලුද්දො චරී පාසහත්ථො අරඤ්ඤෙ, බාධෙතු මොරාධිපතිං යසස්සිං;
බන්ධිත්වා [බන්ධිත්ව (සී. පී.)] මොරාධිපතිං යසස්සිං, දුක්ඛා ස පමුච්චි [දුක්ඛා පමුච්චි (සී.), දුක්ඛා පමුඤ්චි (ස්‍යා. පී.)] යථාහං පමුත්තොති.
මහාමොරජාතකං අට්ඨමං.