483. සරභමිගජාතකං (10)

134. ආසීසෙථෙව [ආසිංසෙථෙව (සී. ස්‍යා. පී.)] පුරිසො, න නිබ්බින්දෙය්‍ය පණ්ඩිතො;

පස්සාමි වොහං අත්තානං, යථා ඉච්ඡිං තථා අහු.

135. ආසීසෙථෙව පුරිසො, න නිබ්බින්දෙය්‍ය පණ්ඩිතො;

පස්සාමි වොහං අත්තානං, උදකා ථලමුබ්භතං.

136. වායමෙථෙව පුරිසො, න නිබ්බින්දෙය්‍ය පණ්ඩිතො;

පස්සාමි වොහං අත්තානං, යථා ඉච්ඡිං තථා අහු.

137. වායමෙථෙව පුරිසො, න නිබ්බින්දෙය්‍ය පණ්ඩිතො;

පස්සාමි වොහං අත්තානං, උදකා ථලමුබ්භතං.

138. දුක්ඛූපනීතොපි නරො සපඤ්ඤො, ආසං න ඡින්දෙය්‍ය සුඛාගමාය;

බහූ හි ඵස්සා අහිතා හිතා ච, අවිතක්කිතා මච්චමුපබ්බජන්ති [මච්චුමුපබ්බජන්ති (ක. සී. පී.), මච්චුමුපපජ්ජන්ති (ස්‍යා. ක.) එත්ථ ‘‘අවිතක්කිතාපි ඵස්සො මච්චං ජනං උපගච්ඡන්තී’’ති අත්ථො].

139. අචින්තිතම්පි භවති, චින්තිතම්පි විනස්සති;

න හි චින්තාමයා භොගා, ඉත්ථියා පුරිසස්ස වා.

140. සරභං ගිරිදුග්ගස්මිං, යං ත්වං අනුසරී පුරෙ;

අලීනචිත්තස්ස තුවං, වික්කන්තමනුජීවසි [තව, වික්කන්තං ජීවිතං ලභි (ක.)].

141. යො තං විදුග්ගා නරකා සමුද්ධරි, සිලාය යොග්ගං සරභො කරිත්වා;

දුක්ඛූපනීතං මච්චුමුඛා පමොචයි, අලීනචිත්තං තං මිගං [තමෙව (ස්‍යා. ක.)] වදෙසි.

142. කිං ත්වං නු [තුවන්නු (සී. පී.)] තත්ථෙව තදා අහොසි, උදාහු තෙ කොචි නං [තං (ක.)] එතදක්ඛා;

විවට්ටච්ඡද්දො නුසි සබ්බදස්සී, ඤාණං නු තෙ බ්‍රාහ්මණ භිංසරූපං.

143. න චෙවහං තත්ථ තදා අහොසිං, න චාපි මෙ කොචි නං [තං (ක.)] එතදක්ඛා;

ගාථාපදානඤ්ච සුභාසිතානං, අත්ථං තදානෙන්ති ජනින්ද ධීරා.

144. ආදාය පත්තිං [පත්තං (ස්‍යා.), පට්ටිං (ක.)] පරවිරියඝාතිං, චාපෙ සරං කිං විචිකිච්ඡසෙ තුවං;

නුන්නො [නුණ්ණො (ක. සී. ස්‍යා.), තුණ්ණො (ක.)] සරො සරභං හන්තු ඛිප්පං, අන්නඤ්හි එතං වරපඤ්ඤ රඤ්ඤො.

145. අද්ධා පජානාමි අහම්පි එතං, අන්නං මිගො බ්‍රාහ්මණ ඛත්තියස්ස;

පුබ්බෙ කතඤ්ච [පුබ්බෙ ච කතං (ක.)] අපචායමානො, තස්මා මිගං සරභං නො හනාමි.

146. නෙසො මිගො මහාරාජ, අසුරෙසො දිසම්පති;

එතං හන්ත්වා මනුස්සින්ද, භවස්සු අමරාධිපො.

147. සචෙ ච රාජා [රාජ (සී. ස්‍යා. පී.)] විචිකිච්ඡසෙ තුවං, හන්තුං මිගං සරභං සහායකං [සහායකං මෙ (සී. පී.)];

සපුත්තදාරො නරවීරසෙට්ඨ [නරවිරියසෙට්ඨ (සී. පී.)], ගන්ත්වා [ගන්තා (සී. පී. අට්ඨ.)] තුවං වෙතරණිං යමස්ස.

148. කාමං අහං ජානපදා ච සබ්බෙ, පුත්තා ච දාරා ච සහායසඞ්ඝා;

ගච්ඡෙමු තං වෙතරණිං යමස්ස, න ත්වෙව හඤ්ඤො මම පාණදො යො [පාණද’ස්ස (සී. ස්‍යා. පී.)].

149. අයං මිගො කිච්ඡගතස්ස මය්හං, එකස්ස කත්තා විවනස්මි ඝොරෙ;

තං තාදිසං පුබ්බකිච්චං සරන්තො, ජානං මහාබ්‍රහ්මෙ කථං හනෙය්‍යං.

150. මිත්තාභිරාධී චිරමෙව ජීව, රජ්ජං ඉමං ධම්මගුණෙ [රජ්ජම්පිමං චස්ස ගණෙ (ක.)] පසාස;

නාරීගණෙහි පරිචාරියන්තො, මොදස්සු රට්ඨෙ තිදිවෙව වාසවො.

151. අක්කොධනො නිච්චපසන්නචිත්තො, සබ්බාතිථී යාචයොගො භවිත්වා [පාහුනකෙ කරිත්වා (ස්‍යා.), යාචයොගො විදිත්වා (ක.)];

දත්වා ච භුත්වා ච යථානුභාවං, අනින්දිතො සග්ගමුපෙහි ඨානන්ති.

සරභමිගජාතකං දසමං.

තෙරසකනිපාතං නිට්ඨිතං.