480. අකිත්තිජාතකං (7)

83. අකිත්තිං [අකත්තිං (ක.)] දිස්වා සම්මන්තං, සක්කො භූතපතී බ්‍රවි;

කිං පත්ථයං මහාබ්‍රහ්මෙ, එකො සම්මසි ඝම්මනි.

84. දුක්ඛො පුනබ්භවො සක්ක, සරීරස්ස ච භෙදනං;

සම්මොහමරණං දුක්ඛං, තස්මා සම්මාමි වාසව.

85. එතස්මිං තෙ සුලපිතෙ, පතිරූපෙ සුභාසිතෙ;

වරං කස්සප තෙ දම්මි, යං කිඤ්චි මනසිච්ඡසි.

86. වරං චෙ මෙ අදො සක්ක, සබ්බභූතානමිස්සර;

යෙන පුත්තෙ ච දාරෙ ච, ධනධඤ්ඤං පියානි ච;

ලද්ධා නරා න [ලද්ධා නඤ්ඤානි (ක.)] තප්පන්ති, සො ලොභො න මයී වසෙ.

87. එතස්මිං තෙ සුලපිතෙ, පතිරූපෙ සුභාසිතෙ;

වරං කස්සප තෙ දම්මි, යං කිඤ්චි මනසිච්ඡසි.

88. වරං චෙ මෙ අදො සක්ක, සබ්බභූතානමිස්සර;

ඛෙත්තං වත්ථුං හිරඤ්ඤඤ්ච, ගවස්සං දාසපොරිසං;

යෙන ජාතෙන ජීයන්ති, සො දොසො න මයී වසෙ.

89. එතස්මිං තෙ සුලපිතෙ, පතිරූපෙ සුභාසිතෙ;

වරං කස්සප තෙ දම්මි, යං කිඤ්චි මනසිච්ඡසි.

90. වරං චෙ මෙ අදො සක්ක, සබ්බභූතානමිස්සර;

බාලං න පස්සෙ න සුණෙ, න ච බාලෙන සංවසෙ;

බාලෙනල්ලාප [බාලෙනා’ලාප (?)] සල්ලාපං, න කරෙ න ච රොචයෙ.

91. කිං නු තෙ අකරං බාලො, වද කස්සප කාරණං;

කෙන කස්සප බාලස්ස, දස්සනං නාභිකඞ්ඛසි.

92. අනයං නයති දුම්මෙධො, අධුරායං නියුඤ්ජති;

දුන්නයො සෙය්‍යසො හොති, සම්මා වුත්තො පකුප්පති;

විනයං සො න ජානාති, සාධු තස්ස අදස්සනං.

93. එතස්මිං තෙ සුලපිතෙ, පතිරූපෙ සුභාසිතෙ;

වරං කස්සප තෙ දම්මි, යං කිඤ්චි මනසිච්ඡසි.

94. වරං චෙ මෙ අදො සක්ක, සබ්බභූතානමිස්සර;

ධීරං පස්සෙ සුණෙ ධීරං, ධීරෙන සහ සංවසෙ;

ධීරෙනල්ලාපසල්ලාපං, තං කරෙ තඤ්ච රොචයෙ.

95. කිං නු තෙ අකරං ධීරො, වද කස්සප කාරණං;

කෙන කස්සප ධීරස්ස, දස්සනං අභිකඞ්ඛසි.

96. නයං නයති මෙධාවී, අධුරායං න යුඤ්ජති;

සුනයො සෙය්‍යසො හොති, සම්මා වුත්තො න කුප්පති;

විනයං සො පජානාති, සාධු තෙන සමාගමො.

97. එතස්මිං තෙ සුලපිතෙ, පතිරූපෙ සුභාසිතෙ;

වරං කස්සප තෙ දම්මි, යං කිඤ්චි මනසිච්ඡසි.

98. වරං චෙ මෙ අදො සක්ක, සබ්බභූතානමිස්සර;

තතො රත්‍යා විවසානෙ [විවසනෙ (සී. ස්‍යා. පී.)], සූරියුග්ගමනං [සුරියස්සුග්ගමනං (සී. ස්‍යා. පී.)] පති;

දිබ්බා භක්ඛා පාතුභවෙය්‍යුං, සීලවන්තො ච යාචකා.

99. දදතො මෙ [දදතො ච මෙ (පී.)] න ඛීයෙථ, දත්වා නානුතපෙය්‍යහං;

දදං චිත්තං පසාදෙය්‍යං, එතං සක්ක වරං වරෙ.

100. එතස්මිං තෙ සුලපිතෙ, පතිරූපෙ සුභාසිතෙ;

වරං කස්සප තෙ දම්මි, යං කිඤ්චි මනසිච්ඡසි.

101. වරං චෙ මෙ අදො සක්ක, සබ්බභූතානමිස්සර;

න මං පුන උපෙය්‍යාසි, එතං සක්ක වරං වරෙ.

102. බහූහි වතචරියාහි [වත්තචරියාහි (සී. ස්‍යා. ක.)], නරා ච අථ නාරියො;

දස්සනං අභිකඞ්ඛන්ති, කිං නු මෙ දස්සනෙ භයං.

103. තං තාදිසං දෙවවණ්ණං [දෙවවණ්ණිං (පී.)], සබ්බකාමසමිද්ධිනං;

දිස්වා තපො පමජ්ජෙය්‍ය [දිස්වා තපො පමජ්ජෙය්‍යං (සී. ස්‍යා. පී.), දිස්වානහං පමජ්ජෙය්‍යං (චරියාපිටකට්ඨකථා)], එතං තෙ දස්සනෙ භයන්ති.

අකිත්තිජාතකං සත්තමං.