463. සුප්පාරකජාතකං (9)

108. උම්මුජ්ජන්ති නිමුජ්ජන්ති, මනුස්සා ඛුරනාසිකා;

සුප්පාරකං තං පුච්ඡාම, සමුද්දො කතමො අයං.

109. කුරුකච්ඡා [භරුකච්ඡා (සී. ස්‍යා. පී. අට්ඨ.)] පයාතානං, වාණිජානං ධනෙසිනං;

නාවාය විප්පනට්ඨාය, ඛුරමාලීති වුච්චති.

110. යථා අග්ගීව සුරියොව [අග්ගි සුරියො ච (ස්‍යා.), අග්ගීව සූරියො (ක.)], සමුද්දො පටිදිස්සති;

සුප්පාරකං තං පුච්ඡාම, සමුද්දො කතමො අයං.

111. කුරුකච්ඡා පයාතානං, වාණිජානං ධනෙසිනං;

නාවාය විප්පනට්ඨාය, අග්ගිමාලීති වුච්චති.

112. යථා දධීව ඛීරංව [දධි ච ඛීරං ච (ස්‍යා.), එවමුපරිපි], සමුද්දො පටිදිස්සති;

සුප්පාරකං තං පුච්ඡාම, සමුද්දො කතමො අයං.

113. කුරුකච්ඡා පයාතානං, වාණිජානං ධනෙසිනං;

නාවාය විප්පනට්ඨාය, දධිමාලීති [ඛීරමාලීති (ක.)] වුච්චති.

114. යථා කුසොව සස්සොව, සමුද්දො පටිදිස්සති;

සුප්පාරකං තං පුච්ඡාම, සමුද්දො කතමො අයං.

115. කුරුකච්ඡා පයාතානං, වාණිජානං ධනෙසිනං;

නාවාය විප්පනට්ඨාය, කුසමාලීති වුච්චති.

116. යථා නළොව වෙළූව, සමුද්දො පටිදිස්සති;

සුප්පාරකං තං පුච්ඡාම, සමුද්දො කතමො අයං.

117. කුරුකච්ඡා පයාතානං, වාණිජානං ධනෙසිනං;

නාවාය විප්පනට්ඨාය, නළමාලීති වුච්චති.

118. මහබ්භයො භිංසනකො, සද්දො සුය්‍යතිමානුසො [සමුද්දො සුය්‍යත’මානුසො (සී. පී. අට්ඨ.)];

යථා සොබ්භො පපාතොව, සමුද්දො පටිදිස්සති;

සුප්පාරකං තං පුච්ඡාම, සමුද්දො කතමො අයං.

119. කුරුකච්ඡා පයාතානං, වාණිජානං ධනෙසිනං;

නාවාය විප්පනට්ඨාය, බළවාමුඛීති [වළභාමුඛීති (සී. ස්‍යා.), බලවාමුඛීති (ස්‍යා. ක.)] වුච්චති.

120. යතො සරාමි අත්තානං, යතො පත්තොස්මි විඤ්ඤුතං;

නාභිජානාමි සඤ්චිච්ච, එකපාණම්පි හිංසිතං;

එතෙන සච්චවජ්ජෙන, සොත්ථිං නාවා නිවත්තතූති.

සුප්පාරකජාතකං නවමං.

එකාදසකනිපාතං නිට්ඨිතං.