462. සංවරජාතකං (8)

97. ජානන්තො නො මහාරාජ, තව සීලං ජනාධිපො;

ඉමෙ කුමාරෙ පූජෙන්තො, න තං කෙනචි මඤ්ඤථ.

98. තිට්ඨන්තෙ නො මහාරාජෙ, අදු [ආදු (සී. පී.), ආදූ (ස්‍යා.)] දෙවෙ දිවඞ්ගතෙ;

ඤාතී තං සමනුඤ්ඤිංසු, සම්පස්සං අත්ථමත්තනො.

99. කෙන සංවරවත්තෙන, සඤ්ජාතෙ අභිතිට්ඨසි;

කෙන තං නාතිවත්තන්ති, ඤාතිසඞ්ඝා සමාගතා.

100. න රාජපුත්ත උසූයාමි [රාජපුත්ත නුස්සුය්‍යාමි (ක.)], සමණානං මහෙසිනං;

සක්කච්චං තෙ නමස්සාමි, පාදෙ වන්දාමි තාදිනං.

101. තෙ මං ධම්මගුණෙ යුත්තං, සුස්සූසමනුසූයකං;

සමණා මනුසාසන්ති [සමනුසාසන්ති (සී. ස්‍යා. පී.)], ඉසී ධම්මගුණෙ රතා.

102. තෙසාහං වචනං සුත්වා, සමණානං මහෙසිනං;

න කිඤ්චි අතිමඤ්ඤාමි, ධම්මෙ මෙ නිරතො මනො.

103. හත්ථාරොහා අනීකට්ඨා, රථිකා පත්තිකාරකා;

තෙසං [තෙසු (පී.)] නප්පටිබන්ධාමි, නිවිට්ඨං [නිබද්ධං (සී. පී.)] භත්තවෙතනං.

104. මහාමත්තා ච මෙ අත්ථි, මන්තිනො පරිචාරකා;

බාරාණසිං වොහරන්ති, බහුමංසසුරොදකං.

105. අථොපි වාණිජා ඵීතා, නානාරට්ඨෙහි ආගතා;

තෙසු මෙ විහිතා රක්ඛා, එවං ජානාහුපොසථ.

106. ධම්මෙන කිර ඤාතීනං, රජ්ජං කාරෙහි සංවර;

මෙධාවී පණ්ඩිතො චාසි [චාපි (සී. පී.)], අථොපි ඤාතිනං හිතො.

107. තං තං ඤාතිපරිබ්‍යූළ්හං, නානාරතනමොචිතං;

අමිත්තා නප්පසහන්ති, ඉන්දංව අසුරාධිපොති.

සංවරජාතකං අට්ඨමං.