459. පානීයජාතකං (5)

59. මිත්තො මිත්තස්ස පානීයං, අදින්නං පරිභුඤ්ජිසං;

තෙන පච්ඡා විජිගුච්ඡිං, තං පාපං පකතං මයා;

මා පුන අකරං පාපං, තස්මා පබ්බජිතො අහං.

60. පරදාරඤ්ච දිස්වාන, ඡන්දො මෙ උදපජ්ජථ [උපපජ්ජථ (ස්‍යා. ක.)];

තෙන පච්ඡා විජිගුච්ඡිං, තං පාපං පකතං මයා;

මා පුන අකරං පාපං, තස්මා පබ්බජිතො අහං.

61. පිතරං මෙ මහාරාජ, චොරා අගණ්හු [අගණ්හුං (සී. පී.), අගණ්හි (ක.)] කානනෙ;

තෙසාහං පුච්ඡිතො ජානං, අඤ්ඤථා නං වියාකරිං.

62. තෙන පච්ඡා විජිගුච්ඡිං, තං පාපං පකතං මයා;

මා පුන අකරං පාපං, තස්මා පබ්බජිතො අහං.

63. පාණාතිපාතමකරුං, සොමයාගෙ උපට්ඨිතෙ;

තෙසාහං සමනුඤ්ඤාසිං, තෙන පච්ඡා විජිගුච්ඡිං.

64. තං පාපං පකතං මයා, මා පුන අකරං පාපං;

තස්මා පබ්බජිතො අහං.

65. සුරාමෙරයමාධුකා [මධුකා (සී. ස්‍යා. පී.)], යෙ ජනා පඨමාසු නො;

බහූනං තෙ අනත්ථාය, මජ්ජපානමකප්පයුං.

66. තෙසාහං සමනුඤ්ඤාසිං, තෙන පච්ඡා විජිගුච්ඡිං;

තං පාපං පකතං මයා, මා පුන අකරං පාපං;

තස්මා පබ්බජිතො අහං.

67. ධිරත්ථු සුබහූ කාමෙ, දුග්ගන්ධෙ බහුකණ්ටකෙ;

යෙ අහං පටිසෙවන්තො, නාලභිං තාදිසං සුඛං.

68. මහස්සාදා සුඛා කාමා, නත්ථි කාමා පරං [කාමපරං (සී. පී.)] සුඛං;

යෙ කාමෙ පටිසෙවන්ති, සග්ගං තෙ උපපජ්ජරෙ.

69. අප්පස්සාදා දුඛා කාමා, නත්ථි කාමා පරං දුඛං;

යෙ කාමෙ පටිසෙවන්ති, නිරයං තෙ උපපජ්ජරෙ.

70. අසී යථා සුනිසිතො, නෙත්තිංසොව සුපායිකො [සුපාසිතො (ක. සී. නිය්‍ය), සුපායිතො (ක. අට්ඨ.)];

සත්තීව උරසි ඛිත්තා, කාමා දුක්ඛතරා තතො.

71. අඞ්ගාරානංව ජලිතං, කාසුං සාධිකපොරිසං;

ඵාලංව දිවසංතත්තං, කාමා දුක්ඛතරා තතො.

72. විසං යථා හලාහලං, තෙලං පක්කුථිතං [උක්කට්ඨිතං (සී. පී.), පක්කුට්ඨිතං (ස්‍යා.)] යථා;

තම්බලොහ [තම්පලොහං (ස්‍යා.)] විලීනංව, කාමා දුක්ඛතරා තතොති.

පානීයජාතකං පඤ්චමං.