460. යුධඤ්චයජාතකං (6)

73. මිත්තාමච්චපරිබ්‍යූළ්හං [පරිබ්බූළ්හං (සී. පී.)], අහං වන්දෙ රථෙසභං;

පබ්බජිස්සාමහං රාජ [පබ්බජිස්සං මහාරාජ (සී. පී.)], තං දෙවො අනුමඤ්ඤතු.

74. සචෙ තෙ ඌනං කාමෙහි, අහං පරිපූරයාමි [අහංව පූරයාමි (ක.)] තෙ;

යො තං හිංසති වාරෙමි, මා පබ්බජ [පබ්බජි (පී.)] යුධඤ්චය [යුධඤ්ජය (සී. ස්‍යා.), යුවඤ්ජය (පී.)].

75. න මත්ථි ඌනං කාමෙහි, හිංසිතා මෙ න විජ්ජති;

දීපඤ්ච කාතුමිච්ඡාමි, යං ජරා නාභිකීරති.

76. පුත්තො වා පිතරං යාචෙ, පිතා වා පුත්තමොරසං;

නෙගමො තං යාචෙ [නෙගමො යාචතෙ (සී. ස්‍යා. පී.)] තාත, මා පබ්බජ යුධඤ්චය.

77. මා මං දෙව නිවාරෙහි, පබ්බජන්තං රථෙසභ;

මාහං කාමෙහි සම්මත්තො, ජරාය වසමන්වගූ.

78. අහං තං තාත යාචාමි, අහං පුත්ත නිවාරයෙ;

චිරං තං දට්ඨුමිච්ඡාමි, මා පබ්බජ යුධඤ්චය.

79. උස්සාවොව තිණග්ගම්හි, සූරියුග්ගමනං පති;

එවමායු මනුස්සානං, මා මං අම්ම නිවාරය.

80. තරමානො ඉමං යානං, ආරොපෙතු [තරමානා ඉමං යානං, ආරොපෙන්තු (සී. පී.)] රථෙසභ;

මා මෙ මාතා තරන්තස්ස, අන්තරායකරා අහු.

81. අභිධාවථ භද්දන්තෙ, සුඤ්ඤං හෙස්සති රම්මකං;

යුධඤ්චයො අනුඤ්ඤාතො, සබ්බදත්තෙන රාජිනා.

82. යොහු සෙට්ඨො සහස්සස්ස [මනුස්සානං (ස්‍යා.), සහස්සානං (ක.)], යුවා කඤ්චනසන්නිභො;

සොයං කුමාරො පබ්බජිතො, කාසායවසනො බලී.

83. උභො කුමාරා පබ්බජිතා, යුධඤ්චයො යුධිට්ඨිලො;

පහාය මාතාපිතරො, සඞ්ගං ඡෙත්වාන මච්චුනොති.

යුධඤ්චයජාතකං ඡට්ඨං.