458. උදයජාතකං (4)

37. එකා නිසින්නා සුචි සඤ්ඤතූරූ, පාසාදමාරුය්හ අනින්දිතඞ්ගී;

යාචාමි තං කින්නරනෙත්තචක්ඛු, ඉමෙකරත්තිං උභයො වසෙම.

38. ඔකිණ්ණන්තරපරිඛං, දළ්හමට්ටාලකොට්ඨකං;

රක්ඛිතං ඛග්ගහත්ථෙහි, දුප්පවෙසමිදං පුරං.

39. දහරස්ස යුවිනො චාපි, ආගමො ච න විජ්ජති;

අථ කෙන නු වණ්ණෙන, සඞ්ගමං ඉච්ඡසෙ මයා.

40. යක්ඛොහමස්මි කල්‍යාණි, ආගතොස්මි තවන්තිකෙ [තවන්තිකං (සී. පී.)];

ත්වං මං නන්දය [නන්දස්සු (ස්‍යා. ක.)] භද්දන්තෙ, පුණ්ණකංසං දදාමි තෙ.

41. දෙවං ව යක්ඛං අථ වා මනුස්සං, න පත්ථයෙ උදයමතිච්ච අඤ්ඤං;

ගච්ඡෙව ත්වං යක්ඛ මහානුභාව, මා චස්සු ගන්ත්වා පුනරාවජිත්ථ.

42. යා සා රති උත්තමා කාමභොගිනං, යං හෙතු සත්තා විසමං චරන්ති;

මා තං රතිං ජීයි තුවං සුචිම්හි තෙ, දදාමි තෙ රූපියං කංසපූරං.

43. නාරිං නරො නිජ්ඣපයං ධනෙන, උක්කංසතී යත්ථ කරොති ඡන්දං;

විපච්චනීකො තව දෙවධම්මො, පච්චක්ඛතො ථොකතරෙන එසි.

44. ආයු ච වණ්ණො ච [ආයුං ච වණ්ණං ච (ක. සී. පී.)] මනුස්සලොකෙ, නිහීයති මනුජානං සුග්ගත්තෙ;

තෙනෙව වණ්ණෙන ධනම්පි තුය්හං, නිහීයති ජිණ්ණතරාසි අජ්ජ.

45. එවං මෙ පෙක්ඛමානස්ස, රාජපුත්ති යසස්සිනි;

හායතෙව තව [හායතෙ වත තෙ (සී. ස්‍යා. ක.), හායතෙව තතො (පී.)] වණ්ණො, අහොරත්තානමච්චයෙ.

46. ඉමිනාව ත්වං වයසා, රාජපුත්ති සුමෙධසෙ;

බ්‍රහ්මචරියං චරෙය්‍යාසි, භිය්‍යො වණ්ණවතී සියා.

47. දෙවා න ජීරන්ති යථා මනුස්සා, ගත්තෙසු තෙසං වලියො න හොන්ති;

පුච්ඡාමි තං යක්ඛ මහානුභාව, කථං නු දෙවාන [කථං න දෙවානං (පී.)] සරීරදෙහො.

48. දෙවා න ජීරන්ති යථා මනුස්සා, ගත්තෙසු තෙසං වලියො න හොන්ති;

සුවෙ සුවෙ භිය්‍යතරොව [භිය්‍යතරො ච (ක.)] තෙසං, දිබ්බො ච වණ්ණො විපුලා ච භොගා.

49. කිංසූධ භීතා ජනතා අනෙකා, මග්ගො ච නෙකායතනං පවුත්තො;

පුච්ඡාමි තං යක්ඛ මහානුභාව, කත්ථට්ඨිතො පරලොකං න භායෙ.

50. වාචං මනඤ්ච පණිධාය සම්මා, කායෙන පාපානි අකුබ්බමානො;

බහුන්නපානං ඝරමාවසන්තො, සද්ධො මුදූ සංවිභාගී වදඤ්ඤූ;

සඞ්ගාහකො සඛිලො සණ්හවාචො, එත්ථට්ඨිතො පරලොකං න භායෙ.

51. අනුසාසසි මං යක්ඛ, යථා මාතා යථා පිතා;

උළාරවණ්ණං පුච්ඡාමි, කො නු ත්වමසි සුබ්‍රහා.

52. උදයොහමස්මි කල්‍යාණි, සඞ්කරත්තා ඉධාගතො [සඞ්ගරත්ථා ඉධාගතො (සී. පී.), සඞ්ගරත්ථායිධාගතො (ස්‍යා.)];

ආමන්ත ඛො තං ගච්ඡාමි, මුත්තොස්මි තව සඞ්කරා [සඞ්ගරා (සී. ස්‍යා. පී.)].

53. සචෙ ඛො ත්වං උදයොසි, සඞ්කරත්තා ඉධාගතො;

අනුසාස මං රාජපුත්ත, යථාස්ස පුන සඞ්ගමො.

54. අතිපතති [අධිපතතී (සී. පී.)] වයො ඛණො තථෙව, ඨානං නත්ථි ධුවං චවන්ති සත්තා;

පරිජිය්‍යති අද්ධුවං සරීරං, උදයෙ මා පමාද [මා පමාදං (සී.)] චරස්සු ධම්මං.

55. කසිණා පථවී ධනස්ස පූරා, එකස්සෙව සියා අනඤ්ඤධෙය්‍යා;

තඤ්චාපි ජහති [ජහාති (සී. ස්‍යා. පී.), ජහාතී (?)] අවීතරාගො, උදයෙ මා පමාද චරස්සු ධම්මං.

56. මාතා ච පිතා ච භාතරො ච, භරියා යාපි ධනෙන හොති කීතා [භරියාපි ධනෙන හොන්ති අතිත්තා (ක.)];

තෙ චාපි ජහන්ති අඤ්ඤමඤ්ඤං, උදයෙ මා පමාද චරස්සු ධම්මං.

57. කායො පරභොජනන්ති ඤත්වා [කායො ච පරභොජනං විදිත්වා (ක.)], සංසාරෙ සුගතිඤ්ච දුග්ගතිඤ්ච [සුගතී ච දුග්ගතී ච (සී. ස්‍යා. පී.), සුග්ගතිං දුග්ගතිඤ්ච (ක.)];

ඉත්තරවාසොති ජානියාන, උදයෙ මා පමාද චරස්සු ධම්මං.

58. සාධු භාසතියං [භාසතයං (සී. පී.)] යක්ඛො, අප්පං මච්චාන ජීවිතං;

කසිරඤ්ච පරිත්තඤ්ච, තඤ්ච දුක්ඛෙන සංයුතං;

සාහං එකා පබ්බජිස්සාමි, හිත්වා කාසිං සුරුන්ධනන්ති.

උදයජාතකං චතුත්ථං.