457. ධම්මදෙවපුත්තජාතකං (3)

26. යසොකරො පුඤ්ඤකරොහමස්මි, සදාත්ථුතො සමණබ්‍රාහ්මණානං;

මග්ගාරහො දෙවමනුස්සපූජිතො, ධම්මො අහං දෙහි අධම්ම මග්ගං.

27. අධම්මයානං දළ්හමාරුහිත්වා, අසන්තසන්තො බලවාහමස්මි;

ස කිස්ස හෙතුම්හි තවජ්ජ දජ්ජං, මග්ගං අහං ධම්ම අදින්නපුබ්බං.

28. ධම්මො හවෙ පාතුරහොසි පුබ්බෙ, පච්ඡා අධම්මො උදපාදි ලොකෙ;

ජෙට්ඨො ච සෙට්ඨො ච සනන්තනො ච, උය්‍යාහි ජෙට්ඨස්ස කනිට්ඨ මග්ගා.

29. න යාචනාය නපි පාතිරූපා, න අරහතා [න අරහති (සී. පී.), අරහති (ක.)] තෙහං දදෙය්‍යං මග්ගං;

යුද්ධඤ්ච නො හොතු උභින්නමජ්ජ, යුද්ධම්හි යො ජෙස්සති තස්ස මග්ගො.

30. සබ්බා දිසා අනුවිසටොහමස්මි, මහබ්බලො අමිතයසො අතුල්‍යො;

ගුණෙහි සබ්බෙහි උපෙතරූපො, ධම්මො අධම්ම ත්වං කථං විජෙස්සසි.

31. ලොහෙන වෙ හඤ්ඤති ජාතරූපං, න ජාතරූපෙන හනන්ති ලොහං;

සචෙ අධම්මො හඤ්ඡති [හඤ්ඤති (සී. ස්‍යා.), හඤ්ඤිති (කත්ථචි)] ධම්මමජ්ජ, අයො සුවණ්ණං විය දස්සනෙය්‍යං.

32. සචෙ තුවං යුද්ධබලො අධම්ම [යුද්ධබලො’සි’ධම්ම (ක. සී.), යුද්ධබලො’ස’ධම්ම (පී.)], න තුය්හ වුඩ්ඪා [වද්ධා (සී. පී.)] ච ගරූ ච අත්ථි;

මග්ගඤ්ච තෙ දම්මි පියාප්පියෙන, වාචාදුරුත්තානිපි තෙ ඛමාමි.

33. ඉදඤ්ච සුත්වා වචනං අධම්මො, අවංසිරො පතිතො උද්ධපාදො;

‘‘යුද්ධත්ථිකො චෙ න ලභාමි යුද්ධං’’, එත්තාවතා හොති හතො අධම්මො.

34. ඛන්තීබලො යුද්ධබලං විජෙත්වා, හන්ත්වා අධම්මං නිහනිත්ව [විහනිත්වා (ක.)] භූම්‍යා;

පායාසි විත්තො [චිත්තො (ස්‍යා.)] අභිරුය්හ සන්දනං, මග්ගෙනෙව අතිබලො සච්චනික්කමො.

35. මාතා පිතා සමණබ්‍රාහ්මණා ච, අසම්මානිතා යස්ස සකෙ අගාරෙ;

ඉධෙව නික්ඛිප්ප සරීරදෙහං, කායස්ස භෙදා නිරයං වජන්ති තෙ [වජන්ති (සී. පී.)];

යථා අධම්මො පතිතො අවංසිරො.

36. මාතා පිතා සමණබ්‍රාහ්මණා ච, සුසම්මානිතා යස්ස සකෙ අගාරෙ;

ඉධෙව නික්ඛිප්ප සරීරදෙහං, කායස්ස භෙදා සුගතිං වජන්ති තෙ;

යථාපි ධම්මො අභිරුය්හ සන්දනන්ති.

ධම්මදෙවපුත්තජාතකං [ධම්මජාතකං (සී. පී.)] තතියං.