456. ජුණ්හජාතකං (2)
13. සුණොහි මය්හං වචනං ජනින්ද, අත්ථෙන ජුණ්හම්හි ඉධානුපත්තො;
න බ්‍රාහ්මණෙ අද්ධිකෙ තිට්ඨමානෙ, ගන්තබ්බ [ගන්තබ්‍ය (ක.)] මාහු ද්විපදින්ද [දිපදාන (සී. පී.), ද්විපදාන (ස්‍යා.)] සෙට්ඨ.
14. සුණොමි තිට්ඨාමි වදෙහි බ්‍රහ්මෙ, යෙනාසි [යෙනාපි (ස්‍යා. ක.)] අත්ථෙන ඉධානුපත්තො;
කං වා ත්වමත්ථං මයි පත්ථයානො, ඉධාගමා බ්‍රහ්මෙ තදිඞ්ඝ බ්‍රූහි.
15. දදාහි මෙ ගාමවරානි පඤ්ච, දාසීසතං සත්ත ගවංසතානි;
පරොසහස්සඤ්ච සුවණ්ණනික්ඛෙ, භරියා ච මෙ සාදිසී ද්වෙ දදාහි.
16. තපො නු තෙ බ්‍රාහ්මණ භිංසරූපො, මන්තා නු තෙ බ්‍රාහ්මණ චිත්තරූපා;
යක්ඛා නු [යක්ඛා ව (සී. පී.)] තෙ අස්සවා සන්ති කෙචි, අත්ථං වා මෙ අභිජානාසි කත්තං.
17. න මෙ තපො අත්ථි න චාපි මන්තා, යක්ඛාපි මෙ අස්සවා නත්ථි කෙචි;
අත්ථම්පි තෙ නාභිජානාමි කත්තං, පුබ්බෙ ච ඛො [පුබ්බෙව ඛො (ස්‍යා. ක.)] සඞ්ගතිමත්තමාසි.
18. පඨමං ඉදං දස්සනං ජානතො මෙ, න තාභිජානාමි ඉතො පුරත්ථා;
අක්ඛාහි මෙ පුච්ඡිතො එතමත්ථං, කදා කුහිං වා අහු සඞ්ගමො නො.
19. ගන්ධාරරාජස්ස පුරම්හි රම්මෙ, අවසිම්හසෙ තක්කසීලායං දෙව;
තත්ථන්ධකාරම්හි තිමීසිකායං [තිමිස්සිකායං (සී. අට්ඨ.), තිමිස්සකායං (ස්‍යා.)], අංසෙන අංසං සමඝට්ටයිම්හ.
20. තෙ තත්ථ ඨත්වාන උභො ජනින්ද, සාරාණියං [සාරණීයං (ක.)] වීතිසාරයිම්හ [වීතිසාරිම්හ (සී. ස්‍යා. පී.)] තත්ථ;
සායෙව නො සඞ්ගතිමත්තමාසි, තතො න පච්ඡා න පුරෙ අහොසි.
21. යදා කදාචි මනුජෙසු බ්‍රහ්මෙ, සමාගමො සප්පුරිසෙන හොති;
න පණ්ඩිතා සඞ්ගතිසන්ථවානි, පුබ්බෙ කතං වාපි විනාසයන්ති.
22. බාලාව [බාලා ච (සී. ස්‍යා. පී.)] ඛො සඞ්ගතිසන්ථවානි, පුබ්බෙ කතං වාපි විනාසයන්ති;
බහුම්පි බාලෙසු කතං විනස්සති, තථා හි බාලා අකතඤ්ඤුරූපා.
23. ධීරා ච ඛො සඞ්ගතිසන්ථවානි, පුබ්බෙ කතං වාපි න නාසයන්ති;
අප්පම්පි ධීරෙසු කතං න නස්සති, තථා හි ධීරා සුකතඤ්ඤුරූපා.
24. දදාමි තෙ ගාමවරානි පඤ්ච, දාසීසතං සත්ත ගවංසතානි;
පරොසහස්සඤ්ච සුවණ්ණනික්ඛෙ, භරියා ච තෙ සාදිසී ද්වෙ දදාමි.
25. එවං සතං හොති සමෙච්ච රාජ, නක්ඛත්තරාජාරිව තාරකානං;
ආපූරතී කාසිපතී තථාහං, තයාපි මෙ සඞ්ගමො අජ්ජ ලද්ධොති.
ජුණ්හජාතකං දුතියං.