455. මාතුපොසකජාතකං (1)

1. තස්ස නාගස්ස විප්පවාසෙන, විරූළ්හා සල්ලකී ච කුටජා ච;

කුරුවින්දකරවීරා [කරවරා (සී. ස්‍යා.)] තිසසාමා ච, නිවාතෙ පුප්ඵිතා ච කණිකාරා.

2. කොචිදෙව සුවණ්ණකායුරා, නාගරාජං භරන්ති පිණ්ඩෙන;

යත්ථ රාජා රාජකුමාරො වා, කවචමභිහෙස්සති අඡම්භිතො [අසම්භීතො (සී. ස්‍යා. පී.)].

3. ගණ්හාහි නාග කබළං, මා නාග කිසකො භව;

බහූනි රාජකිච්චානි, තානි [යානි (සී. පී.)] නාග කරිස්සසි.

4. සා නූනසා කපණිකා, අන්ධා අපරිණායිකා;

ඛාණුං පාදෙන ඝට්ටෙති, ගිරිං චණ්ඩොරණං පති.

5. කා නු තෙ සා මහානාග, අන්ධා අපරිණායිකා;

ඛාණුං පාදෙන ඝට්ටෙති, ගිරිං චණ්ඩොරණං පති.

6. මාතා මෙ සා මහාරාජ, අන්ධා අපරිණායිකා;

ඛාණුං පාදෙන ඝට්ටෙති, ගිරිං චණ්ඩොරණං පති.

7. මුඤ්චථෙතං මහානාගං, යොයං භරති මාතරං;

සමෙතු මාතරා නාගො, සහ සබ්බෙහි ඤාතිභි.

8. මුත්තො ච බන්ධනා නාගො, මුත්තමාදාය කුඤ්ජරො [කාසිරාජෙන පෙසිතො (සී. ස්‍යා.), මුත්තො දාමාතො කුඤ්ජරො (පී. සී. නිය්‍ය)];

මුහුත්තං අස්සාසයිත්වා [විස්සමිත්වාන (සී.)], අගමා යෙන පබ්බතො.

9. තතො සො නළිනිං [නිලිනං (ස්‍යා.)] ගන්ත්වා, සීතං කුඤ්ජරසෙවිතං;

සොණ්ඩායූදකමාහත්වා [මාහිත්වා (ස්‍යා. ක.)], මාතරං අභිසිඤ්චථ.

10. කොය අනරියො දෙවො, අකාලෙනපි වස්සති [අකාලෙන පවස්සති (සී. ස්‍යා.), අකාලෙන’තිවස්සති (පී.)];

ගතො මෙ අත්‍රජො පුත්තො, යො මය්හං පරිචාරකො.

11. උට්ඨෙහි අම්ම කිං සෙසි, ආගතො ත්‍යාහමත්‍රජො;

මුත්තොම්හි කාසිරාජෙන, වෙදෙහෙන යසස්සිනා.

12. චිරං ජීවතු සො රාජා, කාසීනං රට්ඨවඩ්ඪනො;

යො මෙ පුත්තං පමොචෙසි, සදා වුද්ධාපචායිකන්ති.

මාතුපොසකජාතකං පඨමං.