448. කුක්කුටජාතකං (10)

104. නාස්මසෙ කතපාපම්හි, නාස්මසෙ අලිකවාදිනෙ;

නාස්මසෙ අත්තත්ථපඤ්ඤම්හි, අතිසන්තෙපි නාස්මසෙ.

105. භවන්ති හෙකෙ පුරිසා, ගොපිපාසිකජාතිකා [ගොපිපාසකජාතිකා (සී. ස්‍යා. පී.)];

ඝසන්ති මඤ්ඤෙ මිත්තානි, වාචාය න ච කම්මුනා.

106. සුක්ඛඤ්ජලිපග්ගහිතා, වාචාය පලිගුණ්ඨිතා;

මනුස්සඵෙග්ගූ නාසීදෙ, යස්මිං නත්ථි කතඤ්ඤුතා.

107. න හි අඤ්ඤඤ්ඤචිත්තානං, ඉත්ථීනං පුරිසාන වා;

නානාවිකත්වා [නානාව කත්වා (සී. පී.)] සංසග්ගං, තාදිසම්පි ච නාස්මසෙ [තාදිසම්පි න විස්සසෙ (ස්‍යා.)].

108. අනරියකම්මමොක්කන්තං, අථෙතං [අත්ථෙතං (සී. ස්‍යා. පී.)] සබ්බඝාතිනං;

නිසිතංව පටිච්ඡන්නං, තාදිසම්පි ච නාස්මසෙ.

109. මිත්තරූපෙනිධෙකච්චෙ, සාඛල්‍යෙන අචෙතසා;

විවිධෙහි උපායන්ති, තාදිසම්පි ච නාස්මසෙ.

110. ආමිසං වා ධනං වාපි, යත්ථ පස්සති තාදිසො;

දුබ්භිං කරොති දුම්මෙධො, තඤ්ච හන්ත්වාන [ඣාත්වාන (සී. පී.), හිත්වාන (ස්‍යා.)] ගච්ඡති.

111. මිත්තරූපෙන බහවො, ඡන්නා සෙවන්ති සත්තවො;

ජහෙ කාපුරිසෙ හෙතෙ, කුක්කුටො විය සෙනකං.

112. යො ච [යොධ (ජා. 1.8.25 සුලසාජාතකෙ)] උප්පතිතං අත්ථං, න ඛිප්පමනුබුජ්ඣති;

අමිත්තවසමන්වෙති, පච්ඡා ච අනුතප්පති.

113. යො ච උප්පතිතං අත්ථං, ඛිප්පමෙව නිබොධති;

මුච්චතෙ සත්තුසම්බාධා, කුක්කුටො විය සෙනකා;

114. තං තාදිසං කූටමිවොඩ්ඩිතං වනෙ, අධම්මිකං නිච්චවිධංසකාරිනං;

ආරා විවජ්ජෙය්‍ය නරො විචක්ඛණො, සෙනං යථා කුක්කුටො වංසකානනෙති.

කුක්කුටජාතකං දසමං.