440. කණ්හජාතකං (2)

11. කණ්හො වතායං පුරිසො, කණ්හං භුඤ්ජති භොජනං;

කණ්හෙ භූමිපදෙසස්මිං, න මය්හං මනසො පියො.

12. න කණ්හො තචසා හොති, අන්තොසාරො හි බ්‍රාහ්මණො;

යස්මිං පාපානි කම්මානි, ස වෙ කණ්හො සුජම්පති.

13. එතස්මිං තෙ සුලපිතෙ, පතිරූපෙ සුභාසිතෙ;

වරං බ්‍රාහ්මණ තෙ දම්මි, යං කිඤ්චි මනසිච්ඡසි.

14. වරඤ්චෙ මෙ අදො සක්ක, සබ්බභූතානමිස්සර;

සුනික්කොධං සුනිද්දොසං, නිල්ලොභං වුත්තිමත්තනො;

නිස්නෙහමභිකඞ්ඛාමි, එතෙ මෙ චතුරො වරෙ.

15. කිං නු කොධෙ වා [කොධෙව (සී. පී.)] දොසෙ වා, ලොභෙ ස්නෙහෙ ච බ්‍රාහ්මණ;

ආදීනවං ත්වං පස්සසි [සම්පස්සසි (සී. පී.)], තං මෙ අක්ඛාහි පුච්ඡිතො.

16. අප්පො හුත්වා බහු හොති, වඩ්ඪතෙ සො අඛන්තිජො;

ආසඞ්ගී බහුපායාසො, තස්මා කොධං න රොචයෙ.

17. දුට්ඨස්ස ඵරුසා [පඨමා (පී. සී. නිය්‍ය)] වාචා, පරාමාසො අනන්තරා;

තතො පාණි තතො දණ්ඩො, සත්ථස්ස පරමා ගති [පරාමසති (ක.)];

දොසො කොධසමුට්ඨානො, තස්මා දොසං න රොචයෙ.

18. ආලොපසාහසාකාරා [සහසාකාරා (සී. ස්‍යා. පී.)], නිකතී වඤ්චනානි ච;

දිස්සන්ති ලොභධම්මෙසු, තස්මා ලොභං න රොචයෙ.

19. ස්නෙහසඞ්ගථිතා [සඞ්ගධිතා (ක.), සඞ්ගන්තිතා (ස්‍යා.)] ගන්ථා, සෙන්ති මනොමයා පුථූ;

තෙ භුසං උපතාපෙන්ති, තස්මා ස්නෙහං න රොචයෙ.

20. එතස්මිං තෙ සුලපිතෙ, පතිරූපෙ සුභාසිතෙ;

වරං බ්‍රාහ්මණ තෙ දම්මි, යං කිඤ්චි මනසිච්ඡසි.

21. වරඤ්චෙ මෙ අදො සක්ක, සබ්බභූතානමිස්සර;

අරඤ්ඤෙ මෙ විහරතො, නිච්චං එකවිහාරිනො;

ආබාධා මා [න (ස්‍යා. පී.)] උප්පජ්ජෙය්‍යුං, අන්තරායකරා භුසා.

22. එතස්මිං තෙ සුලපිතෙ, පතිරූපෙ සුභාසිතෙ;

වරං බ්‍රාහ්මණ තෙ දම්මි, යං කිඤ්චි මනසිච්ඡසි.

23. වරඤ්චෙ මෙ අදො සක්ක, සබ්බභූතානමිස්සර;

න මනො වා සරීරං වා, මං-කතෙ සක්ක කස්සචි;

කදාචි උපහඤ්ඤෙථ, එතං සක්ක වරං වරෙති.

කණ්හජාතකං දුතියං.