9. අපායිම්හවග්ගො
81. සුරාපානජාතකං
81. අපායිම්හ අනච්චිම්හ, අගායිම්හ රුදිම්හ ච;
විසඤ්ඤිකරණිං පිත්වා [පීත්වා (සී. ස්‍යා. පී.)], දිට්ඨා නාහුම්හ වානරාති.
සුරාපානජාතකං පඨමං.
82. මිත්තවින්දකජාතකං
82. අතික්කම්ම රමණකං, සදාමත්තඤ්ච දූභකං;
ස්වාසි පාසාණමාසීනො, යස්මා ජීවං න මොක්ඛසීති.
මිත්තවින්දකජාතකං දුතියං.
83. කාලකණ්ණිජාතකං
83. මිත්තො හවෙ සත්තපදෙන හොති, සහායො පන ද්වාදසකෙන හොති;
මාසඩ්ඪමාසෙන ච ඤාති හොති, තතුත්තරිං අත්තසමොපි හොති;
සොහං කථං අත්තසුඛස්ස හෙතු, චිරසන්ථුතං [චිරසන්ධවං (ක.), චිරසත්ථුනං (පී.)] කාළකණ්ණිං ජහෙය්‍යන්ති.
කාලකණ්ණිජාතකං තතියං.
84. අත්ථස්සද්වාරජාතකං
84. ආරොග්‍යමිච්ඡෙ පරමඤ්ච ලාභං, සීලඤ්ච වුද්ධානුමතං සුතඤ්ච;
ධම්මානුවත්තී ච අලීනතා ච, අත්ථස්ස ද්වාරා පමුඛා ඡළෙතෙති.
අත්ථස්සද්වාරජාතකං චතුත්ථං.
85. කිංපක්කජාතකං
85. ආයතිං දොසං නාඤ්ඤාය, යො කාමෙ පටිසෙවති;
විපාකන්තෙ හනන්ති නං, කිංපක්කමිව භක්ඛිතන්ති.
කිංපක්කජාතකං පඤ්චමං.
86. සීලවීමංසකජාතකං
86. සීලං කිරෙව කල්‍යාණං, සීලං ලොකෙ අනුත්තරං;
පස්ස ඝොරවිසො නාගො, සීලවාති න හඤ්ඤතීති.
සීලවීමංසකජාතකං ඡට්ඨං.
87. මඞ්ගලජාතකං
87. යස්ස මඞ්ගලා සමූහතාසෙ [සමූහතා (සී. ස්‍යා. පී. සු. නි. 362], උප්පාතා [උප්පාදා (පී.)] සුපිනා ච ලක්ඛණා ච;
සො [ස (සී. පී. ක.)] මඞ්ගලදොසවීතිවත්තො, යුගයොගාධිගතො න ජාතුමෙතීති.
මඞ්ගලජාතකං සත්තමං.
88. සාරම්භජාතකං
88. කල්‍යාණිමෙව මුඤ්චෙය්‍ය, න හි මුඤ්චෙය්‍ය පාපිකං;
මොක්ඛො කල්‍යාණියා සාධු, මුත්වා තප්පති පාපිකන්ති.
සාරම්භජාතකං අට්ඨමං.
89. කුහකජාතකං
89. වාචාව කිර තෙ ආසි, සණ්හා සඛිලභාණිනො;
තිණමත්තෙ අසජ්ජිත්ථො, නො ච නික්ඛසතං හරන්ති.
කුහකජාතකං නවමං.
90. අකතඤ්ඤුජාතකං
90. යො පුබ්බෙ කතකල්‍යාණො, කතත්ථො නාවබුජ්ඣති;
පච්ඡා කිච්චෙ සමුප්පන්නෙ, කත්තාරං නාධිගච්ඡතීති.
අකතඤ්ඤුජාතකං දසමං.
අපායිම්හවග්ගො නවමො.
තස්සුද්දානං –
අපායිම්හ ච දූභකං සත්තපදං, ඡළද්වර ච ආයතිනා ච පුන;
අහිසීලව මඞ්ගලි පාපිකස්සා, සතංනික්ඛ කතත්ථවරෙන දසාති.