10. ලිත්තවග්ගො
91. ලිත්තජාතකං
91. ලිත්තං පරමෙන තෙජසා, ගිලමක්ඛං පුරිසො න බුජ්ඣති;
ගිල රෙ ගිල පාපධුත්තක, පච්ඡා තෙ කටුකං භවිස්සතීති.
ලිත්තජාතකං පඨමං.
92. මහාසාරජාතකං
92. උක්කට්ඨෙ සූරමිච්ඡන්ති, මන්තීසු අකුතූහලං;
පියඤ්ච අන්නපානම්හි, අත්ථෙ ජාතෙ ච පණ්ඩිතන්ති.
මහාසාරජාතකං දුතියං.
93. විසාසභොජනජාතකං
93. න විස්සසෙ අවිස්සත්ථෙ, විස්සත්ථෙපි න විස්සසෙ;
විස්සාසා භයමන්වෙති, සීහංව මිගමාතුකාති [මිගමාතුයා (ක.)].
විසාසභොජනජාතකං තතියං.
94. ලොමහංසජාතකං
94. සොතත්තො සොසින්දො [සොසීතො (සී. ස්‍යා. පී.), සොසිනො (ක.)] චෙව, එකො භිංසනකෙ වනෙ;
නග්ගො න චග්ගිමාසීනො, එසනාපසුතො මුනීති.
ලොමහංසජාතකං චතුත්ථං.
95. මහාසුදස්සනජාතකං
95. අනිච්චා වත සඞ්ඛාරා, උප්පාදවයධම්මිනො;
උප්පජ්ජිත්වා නිරුජ්ඣන්ති, තෙසං වූපසමො සුඛොති.
මහාසුදස්සනජාතකං පඤ්චමං.
96. තෙලපත්තජාතකං
96. සමතිත්තිකං අනවසෙකං, තෙලපත්තං යථා පරිහරෙය්‍ය;
එවං සචිත්තමනුරක්ඛෙ, පත්ථයානො දිසං අගතපුබ්බන්ති.
තෙලපත්තජාතකං ඡට්ඨං.
97. නාමසිද්ධිජාතකං
97. ජීවකඤ්ච මතං දිස්වා, ධනපාලිඤ්ච දුග්ගතං;
පන්ථකඤ්ච වනෙ මූළ්හං, පාපකො පුනරාගතොති.
නාමසිද්ධිජාතකං සත්තමං.
98. කූටවාණිජජාතකං
98. සාධු ඛො පණ්ඩිතො නාම, න ත්වෙව අතිපණ්ඩිතො;
අතිපණ්ඩිතෙන පුත්තෙන, මනම්හි උපකූළිතොති [උපකූලිතොති (සී.), උපකුට්ඨිතොති (ස්‍යා.), උපකුටිතො (ක.)].
කූටවාණිජජාතකං අට්ඨමං.
99. පරොසහස්සජාතකං
99. පරොසහස්සම්පි සමාගතානං, කන්දෙය්‍යුං තෙ වස්සසතං අපඤ්ඤා;
එකොව සෙය්‍යො පුරිසො සපඤ්ඤො, යො භාසිතස්ස විජානාති අත්ථන්ති.
පරොසහස්සජාතකං නවමං.
100. අසාතරූපජාතකං
100. අසාතං සාතරූපෙන, පියරූපෙන අප්පියං;
දුක්ඛං සුඛස්ස රූපෙන, පමත්තමතිවත්තතීති.
අසාතරූපජාතකං දසමං.
ලිත්තවග්ගො දසමො.
තස්සුද්දානං –
ගිලමක්ඛකුතූහල මාතුකස්සා, මුනිනා ච අනිච්චත පත්තවරං;
ධනපාලිවරො අතිපණ්ඩිතකො, සපරොසහස්සඅසාතදසාති.
මජ්ඣිමො පණ්ණාසකො.