11. පරොසතවග්ගො
101. පරොසතජාතකං
101. පරොසතං චෙපි සමාගතානං, ඣායෙය්‍යුං තෙ වස්සසතං අපඤ්ඤා;
එකොව සෙය්‍යො පුරිසො සපඤ්ඤො, යො භාසිතස්ස විජානාති අත්ථන්ති.
පරොසතජාතකං පඨමං.
102. පණ්ණිකජාතකං
102. යො දුක්ඛඵුට්ඨාය භවෙය්‍ය තාණං, සො මෙ පිතා දුබ්භි [දූභි (සී. පී.)] වනෙ කරොති;
සා කස්ස කන්දාමි වනස්ස මජ්ඣෙ, යො තායිතා සො සහසං [සහසා (සී. ස්‍යා. පී.)] කරොතීති.
පණ්ණිකජාතකං දුතියං.
103. වෙරිජාතකං
103. යත්ථ වෙරී නිවිසති [නිවසති (සී. ක.)], න වසෙ තත්ථ පණ්ඩිතො;
එකරත්තං දිරත්තං වා, දුක්ඛං වසති වෙරිසූති.
වෙරිජාතකං තතියං.
104. මිත්තවින්දකජාතකං
104. චතුබ්භි අට්ඨජ්ඣගමා, අට්ඨාහිපි ච සොළස;
සොළසාහි ච බාත්තිංස [බත්තිංස (සී. ස්‍යා. පී.)], අත්‍රිච්ඡං චක්කමාසදො;
ඉච්ඡාහතස්ස පොසස්ස, චක්කං භමති මත්ථකෙති.
මිත්තවින්දකජාතකං චතුත්ථං.
105. දුබ්බලකට්ඨජාතකං
105. බහුම්පෙතං වනෙ කට්ඨං, වාතො භඤ්ජති දුබ්බලං;
තස්ස චෙ භායසී නාග, කිසො නූන භවිස්සසීති.
දුබ්බලකට්ඨජාතකං පඤ්චමං.
106. උදඤ්චනීජාතකං
106. සුඛං වත මං ජීවන්තං [සුඛකං වත ජීවං (ක.)], පචමානා උදඤ්චනී;
චොරී ජායප්පවාදෙන, තෙලං ලොණඤ්ච යාචතීති.
උදඤ්චනීජාතකං ඡට්ඨං.
107. සාලිත්තකජාතකං
107. සාධු ඛො සිප්පකං නාම, අපි යාදිස කීදිසං;
පස්ස ඛඤ්ජප්පහාරෙන, ලද්ධා ගාමා චතුද්දිසාති.
සාලිත්තකජාතකං සත්තමං.
108. බාහියජාතකං
108. සික්ඛෙය්‍ය සික්ඛිතබ්බානි, සන්ති තච්ඡන්දිනො [සච්ඡන්දිනො (සී. පී.)] ජනා;
බාහියා හි [පි (සී. ස්‍යා. පී.)] සුහන්නෙන, රාජානමභිරාධයීති.
බාහියජාතකං අට්ඨමං.
109. කුණ්ඩපූවජාතකං
109. යථන්නො පුරිසො හොති, තථන්නා තස්ස දෙවතා;
ආහරෙතං කුණ්ඩපූවං [කණං පූවං (සී. පී.)], මා මෙ භාගං විනාසයාති.
කුණ්ඩපූවජාතකං නවමං.
110. සබ්බසංහාරකපඤ්හජාතකං
110. සබ්බසංහාරකො [සබ්බසාහාරකො (ක.)] නත්ථි, සුද්ධං කඞ්ගු පවායති;
අලිකං භායතියං ධුත්තී, සච්චමාහ මහල්ලිකාති.
සබ්බසංහාරකපඤ්හජාතකං දසමං.
පරොසතවග්ගො එකාදසමො.
තස්සුද්දානං –
සපරොසත තායිත වෙරී පුන, භමචක්කථ නාගසිරිව්හයනො;
සුඛකඤ්ච වත සිප්පක බාහියා, කුණ්ඩපූව මහල්ලිකකා ච දසාති.