12. හංචිවග්ගො
111. ගද්‍රභපඤ්හජාතකං
111. හංචි [හංසි (සී. ස්‍යා.), හඤ්චි (?)] තුවං එවමඤ්ඤසි සෙය්‍යො, පුත්තෙන පිතාති රාජසෙට්ඨ;
හන්දස්සතරස්ස තෙ අයං, අස්සතරස්ස හි ගද්‍රභො පිතාති.
ගද්‍රභපඤ්හජාතකං පඨමං.
112. අමරාදෙවීපඤ්හජාතකං
112. යෙන සත්තුබිලඞ්ගා ච, දිගුණපලාසො ච පුප්ඵිතො;
යෙන දදාමි [යෙනා’දාමි (සී. ස්‍යා.)] තෙන වදාමි, යෙන න දදාමි [යෙන නා’දාමි (සී. ස්‍යා.)] න තෙන වදාමි;
එස මග්ගො යවමජ්ඣකස්ස, එතං ඡන්නපථං විජානාහීති.
අමරාදෙවීපඤ්හජාතකං දුතියං.
113. සිඞ්ගාලජාතකං
113. සද්දහාසි සිඞ්ගාලස්ස [සිගාලස්ස (සී. ස්‍යා. පී.)], සුරාපීතස්ස බ්‍රාහ්මණ;
සිප්පිකානං සතං නත්ථි, කුතො කංසසතා දුවෙති.
සිඞ්ගාලජාතකං තතියං.
114. මිතචින්තිජාතකං
114. බහුචින්තී අප්පචින්තී, උභො ජාලෙ අබජ්ඣරෙ;
මිතචින්තී පමොචෙසී, උභො තත්ථ සමාගතාති.
මිතචින්තිජාතකං චතුත්ථං.
115. අනුසාසිකජාතකං
115. යායඤ්ඤ [යායඤ්ඤෙ (ක.)] මනුසාසති, සයං ලොලුප්පචාරිනී;
සායං විපක්ඛිකා සෙති, හතා චක්කෙන සාසිකාති [සාලිකාති (සී. ස්‍යා. පී.)].
අනුසාසිකජාතකං පඤ්චමං.
116. දුබ්බචජාතකං
116. අතිකරමකරාචරිය, මය්හම්පෙතං න රුච්චති;
චතුත්ථෙ ලඞ්ඝයිත්වාන, පඤ්චමායසි ආවුතොති.
දුබ්බචජාතකං ඡට්ඨං.
117. තිත්තිරජාතකං
117. අච්චුග්ගතාතිලපතා [අතිබලතා (සී. ස්‍යා. පී.), අතිලපකා (කත්ථචි)], අතිවෙලං පභාසිතා;
වාචා හනති දුම්මෙධං, තිත්තිරංවාතිවස්සිතන්ති.
තිත්තිරජාතකං සත්තමං.
118. වට්ටකජාතකං
118. නාචින්තයන්තො පුරිසො, විසෙසමධිගච්ඡති;
චින්තිතස්ස ඵලං පස්ස, මුත්තොස්මි වධබන්ධනාති.
වට්ටකජාතකං අට්ඨමං.
119. අකාලරාවිජාතකං
119. අමාතාපිතරසංවද්ධො [පිතරි (සී. පී.), පිතු (ස්‍යා.)], අනාචෙරකුලෙ වසං;
නායං කාලං අකාලං වා, අභිජානාති කුක්කුටොති.
අකාලරාවිජාතකං නවමං.
120. බන්ධනමොක්ඛජාතකං
120. අබද්ධා තත්ථ බජ්ඣන්ති, යත්ථ බාලා පභාසරෙ;
බද්ධාපි තත්ථ මුච්චන්ති, යත්ථ ධීරා පභාසරෙති.
බන්ධනමොක්ඛජාතකං දසමං.
හංචිවග්ගො [හංසිවග්ගො (සී. ස්‍යා.)] ද්වාදසමො.
තස්සුද්දානං –
අථ ගද්‍රභ සත්තුව කංසසතං, බහුචින්ති සාසිකායාතිකර;
අතිවෙල විසෙසමනාචරියොව, ධීරාපභාසරතෙන දසාති.