13. කුසනාළිවග්ගො
121. කුසනාළිජාතකං
121. කරෙ සරික්ඛො අථ වාපි සෙට්ඨො, නිහීනකො වාපි කරෙය්‍ය එකො;
කරෙය්‍යුමෙතෙ [කරෙය්‍යුං තෙ (සී. පී.)] බ්‍යසනෙ උත්තමත්ථං, යථා අහං කුසනාළි රුචායන්ති.
කුසනාළිජාතකං පඨමං.
122. දුම්මෙධජාතකං
122. යසං ලද්ධාන දුම්මෙධො, අනත්ථං චරති අත්තනො;
අත්තනො ච පරෙසඤ්ච, හිංසාය පටිපජ්ජතීති.
දුම්මෙධජාතකං දුතියං.
123. නඞ්ගලීසජාතකං
123. අසබ්බත්ථගාමිං වාචං, බාලො සබ්බත්ථ භාසති;
නායං දධිං වෙදි න [න වෙදි (ක.)] නඞ්ගලීසං, දධිප්පයං [දධිම්පයං (සී. පී.)] මඤ්ඤති නඞ්ගලීසන්ති.
නඞ්ගලීසජාතකං තතියං.
124. අම්බජාතකං
124. වායමෙථෙව පුරිසො, න නිබ්බින්දෙය්‍ය පණ්ඩිතො;
වායාමස්ස ඵලං පස්ස, භුත්තා අම්බා අනීතිහන්ති.
අම්බජාතකං චතුත්ථං.
125. කටාහකජාතකං
125. බහුම්පි සො විකත්ථෙය්‍ය, අඤ්ඤං ජනපදං ගතො;
අන්වාගන්ත්වාන දූසෙය්‍ය, භුඤ්ජ භොගෙ කටාහකාති.
කටාහකජාතකං පඤ්චමං.
126. අසිලක්ඛණජාතකං
126. තදෙවෙකස්ස [තථෙවෙකස්ස (සී. ස්‍යා. පී. අට්ඨ. මූලපාඨො)] කල්‍යාණං, තදෙවෙකස්ස පාපකං;
තස්මා සබ්බං න කල්‍යාණං, සබ්බං වාපි න පාපකන්ති.
අසිලක්ඛණජාතකං ඡට්ඨං.
127. කලණ්ඩුකජාතකං
127. තෙ දෙසා තානි වත්ථූනි, අහඤ්ච වනගොචරො;
අනුවිච්ච ඛො තං ගණ්හෙය්‍යුං, පිව [පිප (සී. පී.)] ඛීරං කලණ්ඩුකාති.
කලණ්ඩුකජාතකං සත්තමං.
128. බිළාරවතජාතකං
128. යො වෙ ධම්මං ධජං [ධම්මධජං (ස්‍යා. පී. ක.)] කත්වා, නිගූළ්හො පාපමාචරෙ;
විස්සාසයිත්වා භූතානි, බිළාරං නාම තං වතන්ති.
බිළාරවතජාතකං අට්ඨමං.
129. අග්ගිකභාරද්වාජජාතකං
129. නායං සිඛා පුඤ්ඤහෙතු, ඝාසහෙතු අයං සිඛා;
නාඞ්ගුට්ඨගණනං යාති, අලං තෙ හොතු අග්ගිකාති.
අග්ගිකභාරද්වාජජාතකං නවමං.
130. කොසියජාතකං
130. යථා වාචා ච භුඤ්ජස්සු, යථා භුත්තඤ්ච බ්‍යාහර;
උභයං තෙ න සමෙති, වාචා භුත්තඤ්ච කොසියෙති.
කොසියජාතකං දසමං.
කුසනාළිවග්ගො [සරික්ඛවග්ගො (ක.)] තෙරසමො.
තස්සුද්දානං –
කුසනාළිසිරිව්හයනො ච යසං, දධි මම්බ කටාහකපඤ්චමකො;
අථ පාපක ඛීර බිළාරවතං, සිඛි කොසියසව්හයනෙන දසාති.