14. අසම්පදානවග්ගො

131. අසම්පදානෙනිතරීතරස්ස, බාලස්ස මිත්තානි කලී භවන්ති;

තස්මා හරාමි භුසං අඩ්ඪමානං, මා මෙ මිත්ති ජීයිත්ථ සස්සතායන්ති.

අසම්පදානජාතකං පඨමං.

132. කුසලූපදෙසෙ ධිතියා දළ්හාය ච, අනිවත්තිතත්තාභයභීරුතාය [අවත්ථිතත්තාභයභීරුතාය (සී. ස්‍යා. පී.)] ච;

න රක්ඛසීනං වසමාගමිම්හසෙ, ස සොත්ථිභාවො මහතා භයෙන මෙති.

භීරුක [පඤ්චගරුක (සී. පී.), පඤ්චභීරුක (ස්‍යා.), අභයභීරුත§(?)] ජාතකං දුතියං.

133. ඛෙමං යහිං තත්ථ අරී උදීරිතො [අරි උද්ධරිතො (ක.)], දකස්ස මජ්ඣෙ ජලතෙ ඝතාසනො;

න අජ්ජ වාසො මහියා මහීරුහෙ, දිසා භජව්හො සරණාජ්ජ නො භයන්ති.

ඝතාසනජාතකං තතියං.

134. යෙ සඤ්ඤිනො තෙපි දුග්ගතා, යෙපි අසඤ්ඤිනො තෙපි දුග්ගතා;

එතං උභයං විවජ්ජය, තං සමාපත්තිසුඛං අනඞ්ගණන්ති.

ඣානසොධනජාතකං චතුත්ථං.

135. චන්දාභං සූරියාභඤ්ච, යොධ පඤ්ඤාය ගාධති.

අවිතක්කෙන ඣානෙන, හොති ආභස්සරූපගොති.

චන්දාභජාතකං පඤ්චමං.

136. යං ලද්ධං තෙන තුට්ඨබ්බං, අතිලොභො හි පාපකො;

හංසරාජං ගහෙත්වාන, සුවණ්ණා පරිහායථාති.

සුවණ්ණහංසජාතකං ඡට්ඨං.

137. යත්ථෙකො ලභතෙ බබ්බු, දුතියො තත්ථ ජායති;

තතියො ච චතුත්ථො ච, ඉදං තෙ බබ්බුකා බිලන්ති.

බබ්බුජාතකං සත්තමං.

138. කිං තෙ ජටාහි දුම්මෙධ, කිං තෙ අජිනසාටියා;

අබ්භන්තරං තෙ ගහනං, බාහිරං පරිමජ්ජසීති.

ගොධජාතකං අට්ඨමං.

139. අක්ඛී භින්නා පටො නට්ඨො, සඛිගෙහෙ ච භණ්ඩනං;

උභතො පදුට්ඨා කම්මන්තා [පදුට්ඨකම්මන්තො (සී.), පදුට්ඨො කම්මන්තො (පී.)], උදකම්හි ථලම්හි චාති.

උභතොභට්ඨජාතකං නවමං.

140. නිච්චං උබ්බිග්ගහදයා, සබ්බලොකවිහෙසකා;

තස්මා නෙසං වසා නත්ථි, කාකානම්හාක [කාකානස්මාක (සී. ස්‍යා. පී.)] ඤාතිනන්ති.

කාකජාතකං දසමං.

අසම්පදානවග්ගො චුද්දසමො.

තස්සුද්දානං –

ඉතරීතර රක්ඛසි ඛෙමියො ච, පරොසතපඤ්හෙන ආභස්සරො පුන;

අථ හංසවරුත්තමබබ්බුජටං, පටනට්ඨක කාකවරෙන දසාති.