15. කකණ්ටකවග්ගො

141. ගොධජාතකං

141. න පාපජනසංසෙවී, අච්චන්තසුඛමෙධති;

ගොධාකුලං [ගොධක්කුලං (ක.)] කකණ්ටාව [කකණ්ටකා (ක.)], කලිං පාපෙති අත්තනන්ති.

ගොධජාතකං පඨමං.

142. සිඞ්ගාලජාතකං

142. එතඤ්හි තෙ දුරාජානං, යං සෙසි මතසායිකං;

යස්ස තෙ කඩ්ඪමානස්ස, හත්ථා දණ්ඩො න මුච්චතීති.

සිඞ්ගාලජාතකං දුතියං.

143. විරොචජාතකං

143. ලසී ච තෙ නිප්ඵලිතා, මත්ථකො ච පදාලිතො [විදාලිතො (සී. පී.)];

සබ්බා තෙ ඵාසුකා භග්ගා, අජ්ජ ඛො ත්වං විරොචසීති.

විරොචජාතකං තතියං.

144. නඞ්ගුට්ඨජාතකං

144. බහුම්පෙතං අසබ්භි [බහුපෙතමසබ්භි (ක.)] ජාතවෙද, යං තං වාලධිනාභිපූජයාම;

මංසාරහස්ස නත්ථජ්ජ මංසං, නඞ්ගුට්ඨම්පි භවං පටිග්ගහාතූති.

නඞ්ගුට්ඨජාතකං චතුත්ථං.

145. රාධජාතකං

145. න ත්වං රාධ විජානාසි, අඩ්ඪරත්තෙ අනාගතෙ;

අබ්‍යයතං [අබ්‍යායතං (සී. ස්‍යා. පී.), අබ්‍යත්තතං (?)] විලපසි, විරත්තා කොසියායනෙති.

රාධජාතකං පඤ්චමං.

146. සමුද්දකාකජාතකං

146. අපි නු හනුකා සන්තා, මුඛඤ්ච පරිසුස්සති;

ඔරමාම න පාරෙම, පූරතෙව මහොදධීති.

සමුද්දකාකජාතකං ඡට්ඨං.

147. පුප්ඵරත්තජාතකං

147. නයිදං දුක්ඛං අදුං දුක්ඛං, යං මං තුදති වායසො;

යං සාමා පුප්ඵරත්තෙන, කත්තිකං නානුභොස්සතීති.

පුප්ඵරත්තජාතකං සත්තමං.

148. සිඞ්ගාලජාතකං

148. නාහං පුනං න ච පුනං, න චාපි අපුනප්පුනං;

හත්ථිබොන්දිං පවෙක්ඛාමි, තථා හි භයතජ්ජිතොති.

සිඞ්ගාලජාතකං අට්ඨමං.

149. එකපණ්ණජාතකං

149. එකපණ්ණො අයං රුක්ඛො, න භූම්‍යා චතුරඞ්ගුලො;

ඵලෙන විසකප්පෙන, මහායං කිං භවිස්සතීති.

එකපණ්ණජාතකං නවමං.

150. සඤ්ජීවජාතකං

150. අසන්තං යො පග්ගණ්හාති, අසන්තං චූපසෙවති;

තමෙව ඝාසං කුරුතෙ, බ්‍යග්ඝො සඤ්ජීවකො යථාති.

සඤ්ජීවජාතකං දසමං.

කකණ්ටක [පාපසෙවන (ක.)] වග්ගො පන්නරසමො.

තස්සුද්දානං –

සුඛමෙධති දණ්ඩවරො ච පුන, ලසි වාලධි පඤ්චමරාධවරො;

සමහොදධි කත්තික බොන්දි පුන, චතුරඞ්ගුලබ්‍යග්ඝවරෙන දසාති.

(උපරිමො පණ්ණාසකො.) [( ) සීහළපොත්ථකෙයෙව දිස්සති]

අථ වග්ගුද්දානං –

අපණ්ණකං සීලවග්ගකුරුඞ්ග, කුලාවකං අත්ථකාමෙන පඤ්චමං;

ආසීසො ඉත්ථිවරුණං අපායි, ලිත්තවග්ගෙන තෙ දස;

පරොසතං හංචි කුසනාළි [හංසි සරික්ඛං (සබ්බත්ථ)], අසම්පදං කකණ්ටකවග්ගො.

එකනිපාතම්හිලඞ්කතන්ති.

එකකනිපාතං නිට්ඨිතං.