8. වරුණවග්ගො
71. වරුණජාතකං
71. යො පුබ්බෙ කරණීයානි, පච්ඡා සො කාතුමිච්ඡති;
වරුණකට්ඨ [වරණකට්ඨ (සී. පී.)] භඤ්ජොව, ස පච්ඡා මනුතප්පතීති.
වරුණජාතකං පඨමං.
72. සීලවහත්ථිජාතකං
72. අකතඤ්ඤුස්ස පොසස්ස, නිච්චං විවරදස්සිනො;
සබ්බං චෙ පථවිං [පඨවිං (සී. ස්‍යා. පී.)] දජ්ජා, නෙව නං අභිරාධයෙති.
සීලවහත්ථිජාතකං දුතියං.
73. සච්චංකිරජාතකං
73. සච්චං කිරෙවමාහංසු, නරා එකච්චියා ඉධ;
කට්ඨං නිප්ලවිතං [විප්ලාවිතං (සී. පී.)] සෙය්‍යො, න ත්වෙවෙකච්චියො නරොති.
සච්චංකිරජාතකං තතියං.
74. රුක්ඛධම්මජාතකං
74. සාධූ සම්බහුලා ඤාතී, අපි රුක්ඛා අරඤ්ඤජා;
වාතො වහති එකට්ඨං, බ්‍රහන්තම්පි වනප්පතින්ති.
රුක්ඛධම්මජාතකං චතුත්ථං.
75. මච්ඡජාතකං
75. අභිත්ථනය පජ්ජුන්න, නිධිං කාකස්ස නාසය;
කාකං සොකාය රන්ධෙහි, මඤ්ච සොකා පමොචයාති.
මච්ඡජාතකං පඤ්චමං.
76. අසඞ්කියජාතකං
76. අසඞ්කියොම්හි ගාමම්හි, අරඤ්ඤෙ නත්ථි මෙ භයං;
උජුං මග්ගං සමාරූළ්හො, මෙත්තාය කරුණාය චාති.
අසඞ්කියජාතකං ඡට්ඨං.
77. මහාසුපිනජාතකං
77. උසභා රුක්ඛා ගාවියො ගවා ච, අස්සො කංසො සිඞ්ගාලී [සිගාසී (සී. ස්‍යා. පී.)] ච කුම්භො;
පොක්ඛරණී ච අපාකචන්දනං, ලාබූනි සීදන්ති සිලා ප්ලවන්ති.
මණ්ඩූකියො කණ්හසප්පෙ ගිලන්ති, කාකං සුපණ්ණා පරිවාරයන්ති;
තසා වකා එළකානං භයාහි, විපරියාසො [විපරියායො (ස්‍යා. ක.)] වත්තති නයිධ මත්ථීති.
මහාසුපිනජාතකං සත්තමං.
78. ඉල්ලිසජාතකං
78. උභො ඛඤ්ජා උභො කුණී, උභො විසමචක්ඛුකා [චක්ඛුලා (සී. පී.)];
උභින්නං පිළකා [පීළකා (ස්‍යා.)] ජාතා, නාහං පස්සාමි ඉල්ලිසන්ති.
ඉල්ලිසජාතකං අට්ඨමං.
79. ඛරස්සරජාතකං
79. යතො විලුත්තා ච හතා ච ගාවො, දඩ්ඪානි ගෙහානි ජනො ච නීතො;
අථාගමා පුත්තහතාය පුත්තො, ඛරස්සරං ඩිණ්ඩිමං [දෙණ්ඩිමං (සී. ස්‍යා. පී.), ඩින්දිමං (ක.)] වාදයන්තොති.
ඛරස්සරජාතකං නවමං.
80. භීමසෙනජාතකං
80. යං තෙ පවිකත්ථිතං පුරෙ, අථ තෙ පූතිසරා සජන්ති පච්ඡා;
උභයං න සමෙති භීමසෙන, යුද්ධකථා ච ඉදඤ්ච තෙ විහඤ්ඤන්ති.
භීමසෙනජාතකං දසමං.
වරුණවග්ගො [වරණවග්ගො (සී. පී.)] අට්ඨමො.
තස්සුද්දානං –
වරුණා අකතඤ්ඤූවරෙ තු සච්චවරං, සවනප්පතිනා ච අභිත්ථනය;
කරුණාය සිලාප්ලව ඉල්ලිසතො, පුන ඩිණ්ඩිමපූතිසරෙන දසාති.