7. ඉත්ථිවග්ගො
61. අසාතමන්තජාතකං
61. අසා ලොකිත්ථියො නාම, වෙලා තාසං න විජ්ජති;
සාරත්තා ච පගබ්භා ච, සිඛී සබ්බඝසො යථා;
තා හිත්වා පබ්බජිස්සාමි, විවෙකමනුබ්‍රූහයන්ති.
අසාතමන්තජාතකං පඨමං.
62. අණ්ඩභූතජාතකං
62. යං බ්‍රාහ්මණො අවාදෙසි, වීණං සමුඛවෙඨිතො;
අණ්ඩභූතා භතා භරියා, තාසු කො ජාතු විස්සසෙති.
අණ්ඩභූතජාතකං දුතියං.
63. තක්කපණ්ඩිතජාතකං
63. කොධනා අකතඤ්ඤූ ච, පිසුණා මිත්තභෙදිකා [පිසුණා ච විභෙදිකා (සී. ස්‍යා. පී.)];
බ්‍රහ්මචරියං චර භික්ඛු, සො සුඛං න විහාහසීති [පිහාහිසීති (සී. ස්‍යා. පී.), විහායසි (ක.)].
තක්කපණ්ඩිතජාතකං [තක්කජාතකං (සී. ස්‍යා. පී. අට්ඨ.)] තතියං.
64. දුරාජානජාතකං
64. මා සු නන්දි ඉච්ඡති මං, මා සු සොචි න මිච්ඡති [න ඉච්ඡති (සී. ස්‍යා. පී.)];
ථීනං භාවො දුරාජානො, මච්ඡස්සෙවොදකෙ ගතන්ති.
දුරාජානජාතකං චතුත්ථං.
65. අනභිරතිජාතකං
65. යථා නදී ච පන්ථො ච, පානාගාරං සභා පපා;
එවං ලොකිත්ථියො නාම, නාසං කුජ්ඣන්ති පණ්ඩිතාති.
අනභිරතිජාතකං පඤ්චමං.
66. මුදුලක්ඛණජාතකං
66. එකා ඉච්ඡා පුරෙ ආසි, අලද්ධා මුදුලක්ඛණං;
යතො ලද්ධා අළාරක්ඛී, ඉච්ඡා ඉච්ඡං විජායථාති.
මුදුලක්ඛණජාතකං ඡට්ඨං.
67. උච්ඡඞ්ගජාතකං
67. උච්ඡඞ්ගෙ දෙව මෙ පුත්තො, පථෙ ධාවන්තියා පති;
තඤ්ච දෙසං න පස්සාමි, යතො සොදරියමානයෙති [සොදරියං නයෙ (ක.)].
උච්ඡඞ්ගජාතකං සත්තමං.
68. සාකෙතජාතකං
68. යස්මිං මනො නිවිසති, චිත්තඤ්චාපි [චිත්තං වාපි (කත්ථචි)] පසීදති;
අදිට්ඨපුබ්බකෙ පොසෙ, කාමං තස්මිම්පි විස්සසෙති.
සාකෙතජාතකං අට්ඨමං.
69. විසවන්තජාතකං
69. ධිරත්ථු තං විසං වන්තං, යමහං ජීවිතකාරණා;
වන්තං පච්චාවමිස්සාමි [පච්චාහරිස්සාමි (ක.)], මතං මෙ ජීවිතා වරන්ති.
විසවන්තජාතකං නවමං.
70. කුද්දාලජාතකං
70. න තං ජිතං සාධු ජිතං, යං ජිතං අවජීයති;
තං ඛො ජිතං සාධු ජිතං, යං ජිතං නාවජීයතීති.
කුද්දාලජාතකං දසමං.
ඉත්ථිවග්ගො සත්තමො.
තස්සුද්දානං –
සිඛීසබ්බඝසොපි ච වීණවරො, පිසුණා මිත්තභෙදිකා නන්දී නදී;
මුදුලක්ඛණ සොදරියා ච මනො, විස සාධුජිතෙන භවන්ති දසාති.