6. ආසීසවග්ගො
51.මහාසීලවජාතකං
51. ආසීසෙථෙව [ආසිංසෙථෙව (සී. ස්‍යා. පී.)] පුරිසො, න නිබ්බින්දෙය්‍ය පණ්ඩිතො;
පස්සාමි වොහං අත්තානං, යථා ඉච්ඡිං තථා අහූති.
මහාසීලවජාතකං පඨමං.
52. චූළජනකජාතකං
52. වායමෙථෙව පුරිසො, න නිබ්බින්දෙය්‍ය පණ්ඩිතො;
පස්සාමි වොහං අත්තානං, උදකා ථලමුබ්භතන්ති.
චූළජනකජාතකං දුතියං.
53. පුණ්ණපාතිජාතකං
53. තථෙව පුණ්ණා පාතියො, අඤ්ඤායං වත්තතෙ කථා;
ආකාරණෙන [ආකාරකෙන (සී. ස්‍යා. පී.)] ජානාමි, න චායං භද්දිකා සුරාති.
පුණ්ණපාතිජාතකං තතියං.
54. කිංඵලජාතකං
54. නායං රුක්ඛො දුරාරුහො, නපි ගාමතො ආරකා;
ආකාරණෙන ජානාමි, නායං සාදුඵලො දුමොති.
කිංඵලජාතකං චතුත්ථං.
55. පඤ්චාවුධජාතකං
55. යො අලීනෙන චිත්තෙන, අලීනමනසො නරො;
භාවෙති කුසලං ධම්මං, යොගක්ඛෙමස්ස පත්තියා;
පාපුණෙ අනුපුබ්බෙන, සබ්බසංයොජනක්ඛයන්ති.
පඤ්චාවුධජාතකං පඤ්චමං.
56. කඤ්චනක්ඛන්ධජාතකං
56. යො පහට්ඨෙන චිත්තෙන, පහට්ඨමනසො නරො;
භාවෙති කුසලං ධම්මං, යොගක්ඛෙමස්ස පත්තියා;
පාපුණෙ අනුපුබ්බෙන, සබ්බසංයොජනක්ඛයන්ති.
කඤ්චනක්ඛන්ධජාතකං ඡට්ඨං.
57. වානරින්දජාතකං
57. යස්සෙතෙ චතුරො ධම්මා, වානරින්ද යථා තව;
සච්චං ධම්මො ධිති [ධිතී (සී. පී.)] චාගො, දිට්ඨං සො අතිවත්තතීති.
වානරින්දජාතකං සත්තමං.
58. තයොධම්මජාතකං
58. යස්සෙතෙ ච [යස්ස එතෙ (සී. පී.)] තයො ධම්මා, වානරින්ද යථා තව;
දක්ඛියං සූරියං පඤ්ඤා, දිට්ඨං සො අතිවත්තතීති.
තයොධම්මජාතකං අට්ඨමං.
59. භෙරිවාදකජාතකං
59. ධමෙ ධමෙ නාතිධමෙ, අතිධන්තඤ්හි පාපකං;
ධන්තෙන හි සතං ලද්ධං, අතිධන්තෙන නාසිතන්ති.
භෙරිවාදකජාතකං නවමං.
60. සඞ්ඛධමජාතකං
60. ධමෙ ධමෙ නාතිධමෙ, අතිධන්තඤ්හි පාපකං;
ධන්තෙනාධිගතා භොගා, තෙ තාතො විධමී ධමන්ති.
සඞ්ඛධමජාතකං දසමං.
ආසීසවග්ගො ඡට්ඨො.
තස්සුද්දානං –
යථා ඉච්ඡිං තථාහුදකා ථලා, සුර සාදුඵලො ච අලීනමනො;
සම්පහට්ඨමනො චතුරො ච තයො, සතලද්ධක භොගධනෙන දසාති.