5. අත්ථකාමවග්ගො
41. ලොසකජාතකං
41. යො අත්ථකාමස්ස හිතානුකම්පිනො, ඔවජ්ජමානො න කරොති සාසනං;
අජියා පාදමොලම්බ [පාදමොලුම්බ (සී. ස්‍යා. පී.)], මිත්තකො විය සොචතීති.
ලොසකජාතකං පඨමං.
42. කපොතජාතකං
42. යො අත්ථකාමස්ස හිතානුකම්පිනො, ඔවජ්ජමානො න කරොති සාසනං;
කපොතකස්ස වචනං අකත්වා, අමිත්තහත්ථත්ථගතොව සෙතීති.
කපොතජාතකං දුතියං.
43. වෙළුකජාතකං
43. යො අත්ථකාමස්ස හිතානුකම්පිනො, ඔවජ්ජමානො න කරොති සාසනං;
එවං සො නිහතො සෙති, වෙළුකස්ස යථා පිතාති.
වෙළුකජාතකං තතියං.
44. මකසජාතකං
44. සෙය්‍යො අමිත්තො මතියා උපෙතො, න ත්වෙව මිත්තො මතිවිප්පහීනො;
මකසං වධිස්සන්ති හි එළමූගො, පුත්තො පිතු අබ්භිදා උත්තමඞ්ගන්ති.
මකසජාතකං චතුත්ථං.
45. රොහිණිජාතකං
45. සෙය්‍යො අමිත්තො මෙධාවී, යඤ්චෙ බාලානුකම්පකො;
පස්ස රොහිණිකං ජම්මිං, මාතරං හන්ත්වාන සොචතීති.
රොහිණිජාතකං පඤ්චමං.
46. ආරාමදූසකජාතකං
46. න වෙ අනත්ථකුසලෙන, අත්ථචරියා සුඛාවහා;
හාපෙති අත්ථං දුම්මෙධො, කපි ආරාමිකො යථාති.
ආරාමදූසකජාතකං ඡට්ඨං.
47. වාරුණිදූසකජාතකං
47. න වෙ අනත්ථකුසලෙන, අත්ථචරියා සුඛාවහා;
හාපෙති අත්ථං දුම්මෙධො, කොණ්ඩඤ්ඤො වාරුණිං යථාති.
වාරුණිදූසකජාතකං සත්තමං.
48. වෙදබ්බජාතකං
48. අනුපායෙන යො අත්ථං, ඉච්ඡති සො විහඤ්ඤති;
චෙතා හනිංසු වෙදබ්බං [වෙදබ්භං (සී. පී.)], සබ්බෙ තෙ බ්‍යසනමජ්ඣගූති.
වෙදබ්බ [වෙදබ්භ (සී. පී.)] ජාතකං අට්ඨමං.
49. නක්ඛත්තජාතකං
49. නක්ඛත්තං පටිමානෙන්තං, අත්ථො බාලං උපච්චගා;
අත්ථො අත්ථස්ස නක්ඛත්තං, කිං කරිස්සන්ති තාරකාති.
නක්ඛත්තජාතකං නවමං.
50. දුම්මෙධජාතකං
50. දුම්මෙධානං සහස්සෙන, යඤ්ඤො මෙ උපයාචිතො;
ඉදානි ඛොහං යජිස්සාමි, බහු [බහූ (සී. පී.), බහුං (ක.)] අධම්මිකො ජනොති.
දුම්මෙධජාතකං දසමං.
අත්ථකාමවග්ගො පඤ්චමො.
තස්සුද්දානං –
අථ මිත්තක මාතු කපොතවරො, තථා වෙළූක එළමූගො රොහිණී;
කපි වාරුණි චෙතචරා ච පුන, තථා තාරක යඤ්ඤවරෙන දසාති.
පඨමො පණ්ණාසකො.